‘ପାଣି ଓ ରକ୍ତ ଏକାସଙ୍ଗେ ବୋହିପାରିବ ନାହିଁ’ ସିନ୍ଧୁ ନଦୀକୁ ନେଇ ଏଭଳି ସଂକେତ ଦେଇସାରିଥିଲେ ମୋଦୀ
ନୂଆଦିଲ୍ଲୀ : ଇଣ୍ଡସ ୱାଟର ଟ୍ରିଟି (ଆଇଡବ୍ଲ୍ୟୁଟି) ତଥା ସିନ୍ଧୁ ଜଳ ଚୁକ୍ତିରେ ପରିବର୍ତ୍ତନ ଆଣିବାପାଇଁ ଭାରତ ପାକିସ୍ତାନକୁ ନୋଟିସ୍ କରିଛି। ଆଇଡବ୍ଲ୍ୟୁଟିର ଧାରା ଏକ୍ସଆଇଆଇ (୩) ଅନୁଯାୟୀ ସିନ୍ଧୁ ଜଳ ଚୁକ୍ତିର କମିସନରଙ୍କ ଦ୍ବାରା ଭାରତ ଜାନୁଆରି ୨୫ରେ ପାକିସ୍ତାନକୁ ଏହି ନୋଟିସ ପଠାଇଛି। ଆଉ ପ୍ରଥମ ଥର ପାଇଁ ୬ ଦଶନ୍ଧି ପୁରୁଣା ଚୁକ୍ତିନାମା କାର୍ଯ୍ୟକାରୀ ହେବା ସହ ବିବାଦର ସମାଧାନ କରିବା ଉପରେ ନୋଟିସ ପାକିସ୍ତାନକୁ ପଠାଯାଇଛି। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୧୬ ମସିହାରେ ଉରି ଆକ୍ରମଣ ପରେ ପାକିସ୍ତାନକୁ ଏନେଇ ସଙ୍କେତ ଦେଇସାରିଥିଲେ। ଆଉ ମୋଦୀଙ୍କ ସେତେବେଳର ବୟାନକୁ ନେଇ ଏବେ ଆଲୋଚନା ଜୋର ଧରିଛି | କୁହାଯାଉଛି ଯେ ସେତେବେଳେ ମୋଦୀ ଦେଇଥିବା ଇଙ୍ଗିତ ଏବେ କାର୍ଯ୍ୟକାରୀ ହେବାକୁ ଯାଉଛି | ପ୍ରଧାନମନ୍ତ୍ରୀ କହିଥିଲେ ଯେ ରକ୍ତ ଏବଂ ଜଳ ଏକାଠି ପ୍ରବାହିତ ହୋଇପାରିବ ନାହିଁ। ଉରି ଆକ୍ରମଣରେ ୧୮ ଜଣ ଭାରତୀୟ ସୈନିକ ସହିଦ ହୋଇଥିଲେ। ଆଉ ଏହା ପରେ ଦୁଇ ବର୍ଷ ତଳେ ମେ ୨୦୧୮ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାନ୍ଦିପୋରରେ ୩୩୦ ମେଗାୱାଟ କିଶନଗଙ୍ଗା ଜଳ ବିଦ୍ୟୁତ୍ ପ୍ରକଳ୍ପ ଉଦଘାଟନ କରିଥିବାବେଳେ ଜମ୍ମୁକଶ୍ମୀରର କିଶତବାଡୱାରରେ ୧୦୦୦ ମେଗାୱାଟ ପ୍ରକଳ୍ପର ଶିଳାନ୍ୟାସ କରିଥିଲେ |
Sambad is now on WhatsApp
Join and get latest news updates delivered to you via WhatsApp
ଏଥି ସହିତ, ସେପ୍ଟେମ୍ବର ୨୦୧୬ ରେ ସିନ୍ଧୁ ଚୁକ୍ତିନାମା ସମୀକ୍ଷା ବୈଠକ ପରେ ଅନ୍ୟ ଦୁଇଟି ବୃହତ ଜଳ ବିଦ୍ୟୁତ୍ ପ୍ରକଳ୍ପ, ୧୮୫୬ ମେଗାୱାଟର ସାଭାଲକୋଟ ଏବଂ ୮୦୦ ମେଗାୱାଟର ବର୍ସର ମଧ୍ୟ ଜୋରସୋରରେ କାମ ଆରମ୍ଭ କରାଯାଇଥିଲା | ବିଶେଷ କରି ଚେନାବର ଦୁଇ ଶାଖାନଦୀ କିଶନଗଙ୍ଗା ଓ ମରୁସୁଦରରେ ମଧ୍ୟ ବିଭିନ୍ନ ପ୍ରକଳ୍ପ ସୂଚାଇ ଦେଇଥିଲା ଯେ ସରକାର ପ୍ରତ୍ୟେକ ବିକଳ୍ପ ସହିତ ପାକିସ୍ତାନକୁ ଜବାବ ଦେବାକୁ ପ୍ରସ୍ତୁତ ଅଛନ୍ତି। ସେହିପରି ମୋଦୀ ସରକାରଙ୍କ ଯୋଜନା ଅନୁଯାୟୀ ସିନ୍ଧୁ ଚୁକ୍ତିନାମା ଅନୁଯାୟୀ କିଭଳି ଭାରତ ଅଧିକ ଜଳ ବ୍ୟବହାର କରିପାରିବ, ସେନେଇ ବ୍ୟବସ୍ଥା କରାଯାଇଥିଲା |