ଆପକୁ ୨୦୧୭ ଭଳି ମିଛ ଆଶ୍ୱାସନା ଦେବ ନାହିଁ ତ ଏକଜିଟ ପୋଲ!

ନୂଆଦିଲ୍ଲୀ: ଏଥର ପଞ୍ଜାବରେ ଆମ୍ ଆଦମୀ ପାର୍ଟି ସରକାର ଗଢ଼ିବା ସମ୍ଭାବନା ରହିଛି । ଗତକାଲି ବିଭିନ୍ନ ଗଣମାଧ୍ୟମ ଓ ରିସର୍ଚ୍ଚ ସଂସ୍ଥା ପକ୍ଷରୁ କରାଯାଇଥିବା ଏକଜିଟ ପୋଲରେ ପଞ୍ଜାବରେ ଆଗରେ ରହିଛି ଆପ୍। ପଞ୍ଜାବରେ କଂଗ୍ରେସକୁ ଗାଦିଚ୍ୟୁତ କରିବ କେଜ୍ରିୱାଲଙ୍କ ଆପ୍‌ (ଆମ୍ ଆଦମି ପାର୍ଟି)। ଏହି ପାର୍ଟିକୁ ଉଲ୍ଲେଖନୀୟ ସଫଳତା ମିଳିବ ବୋଲି ସର୍ଭେରେ କୁହାଯାଇଛି। ୧୧୭ ଆସନ ବିଶିଷ୍ଟ ରାଜ୍ୟ ବିଧାନସଭାରେ ସରକାର ଗଠନ ପାଇଁ ୫୯ଟି ଆସନର ଆବଶ୍ୟକତା ଥିବାବେଳେ ଆପ୍‌ ଏଠାରେ ୬୩ଟି ଆସନରେ ଜିତିବ ବୋଲି କୁହାଯାଇଛି।

ଆଉ ଯଦି ଏକଜିଟ ପୋଲର ଆକଳନ ସତ ହୁଏ ତେବେ ଆପ୍‌ ଦିଲ୍ଲୀ ବାହାରେ ପ୍ରଥମ ଥର ପାଇଁ ସରକାର ଗଠନ କରିବ। ତେବେ ୨୦୧୭ ନିର୍ବାଚନରେ ​​ମଧ୍ୟ ସମାନ ଘଟଣା ଦେଖିବାକୁ ମିଳିଥିଲା ​​| ସେଥର ଏକଜିଟ୍ ପୋଲରେ ଆପ ସଂଖ୍ୟାଗରିଷ୍ଠତା ହାସଲ କରିଥିବାର ଆକଳନ କରାଯାଇଥିଲେ ବି ଦଳ ମାତ୍ର ୨୦ଟି ଆସନ ପାଇଥିଲା | ଏଭଳି ପରିସ୍ଥିତିରେ ଲୋକମାନେ ଏକଜିଟ୍ ପୋଲର ଫଳାଫଳକୁ ସେତେ ଗୁରୁତ୍ୱ ଦେଉନଥିବାର ଦେଖିବାକୁ ମିଳିଛି |

ଗତକାଲି ପ୍ରକାଶ ପାଇଥିବା ଏକଜିଟ ପୋଲରେ ଇଣ୍ଡିଆ ଟୁଡେ ଆକ୍ସିସ ଇଣ୍ଡିଆର ରିପୋର୍ଟ ଅନୁଯାୟୀ ଆପ ପଞ୍ଜାବରେ ୭୬-୯୦ଟି ଆସନରେ ଆଗୁଆ ରହିବ ବୋଲି ଆଶା କରାଯାଉଥିବା ବେଳେ କଂଗ୍ରେସ ୧୯-୩୧, ଅକାଳୀ ଦଳ ୭-୧୧ ଏବଂ ବିଜେପି ୧-୪ରେ ଅଟକିବ ବୋଲି କୁହାଯାଇଥିଲା | ସେହିପରି ରିପବ୍ଲିକ୍ ଟିଭି ପକ୍ଷରୁ ପ୍ରକାଶ ପାଇଥିବା ଏକଜିଟ୍ ପୋଲ୍ ଫଳାଫଳ ଅନୁସାରେ ଆପ ପଞ୍ଜାବରେ ୬୨-୭୦ଟି ଆସନରେ ଆଗୁଆ ରହିବ ବୋଲି ଆକଳନ କରାଯାଇଥିଲା | ସୂଚନା ଥାଉ କି ପଞ୍ଜାବରେ ଏଥର ୨.୧୪ କୋଟି ଭୋଟରଙ୍କ ମଧ୍ୟରୁ ୧.୫୪ କୋଟି (୭୨%) ମତଦାନ ହୋଇଥିବାବେଳେ ୨୦୧୭ ବିଧାନସଭା ନିର୍ବାଚନରେ ମତଦାନ ​​୫% ହ୍ରାସ ପାଇଛି।