କୋଲକାତା: ୨୦୨୪ ଲୋକସଭା ନିର୍ବାଚନ‌ ନିମନ୍ତେ ଭାରତୀୟ ଜନତା ପାର୍ଟି ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି। ବିଜେପିର ଉତ୍ତରଭାରତ ଓ ପୂର୍ବଭାରତ ସଂଯୋଗ ଦୃଷ୍ଟିରୁ ରାଜନୈତିକ ଗୁରୁତ୍ବପୂର୍ଣ୍ଣ ରହିଥିବା ପଶ୍ଚିମବଙ୍ଗ ପାଇଁ ୧୫ଜଣିଆ କମିଟି ଗଠନ କରାଯାଇଛି। ଆଜି କୋଲକାତା ଠାରେ ଅପରାହ୍‌ଣରେ ଦଳର ରାଷ୍ଟ୍ରୀୟ ସଭାପତି ଜେ ପି ନଡ୍ଡା, ଗୃହମନ୍ତ୍ରୀ ଅମିତ ଶାହଙ୍କ ସହ ପଶ୍ଚିମବଙ୍ଗର ନେତାଙ୍କ ସହ ଆଲୋଚନା ହୋଇଥିଲା। ଆଲୋଚନା ପରେ କମିଟିର ସଦସ୍ୟଙ୍କ ନାମ ଘୋଷଣା କରାଯାଇଛି।

Advertisment

ଗଠିତ ହୋଇଥିବା କମିଟିରେ ପଶ୍ଚିମବଙ୍ଗର ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ, ସାଂସଦ ତଥା ରାଜ୍ୟ ଶାଖା ସଭାପତି ସୁକାନ୍ତ ମଜୁମଦାର, ସାଂସଦ ଲକେଟ ଚାଟାର୍ଜୀ, ଦିଲୀପ ଘୋଷ, ଜ୍ୟୋତିର୍ମୟ ସିଂହ ମହାତୋ, ବିଧାୟକ ଅଗ୍ନିମିତ୍ର ପାଉଲ୍‌, ରାଜ୍ୟ କର୍ମକର୍ତା ରାହୁଲ ସିହ୍ନା, ଅମିତାଭ ଚକ୍ରବର୍ତୀ, ଜଗନ୍ନାଥ ଚଟ୍ଟୋପଧ୍ୟାୟ ଓ ଦୀପକ ବର୍ମନ ଅଛନ୍ତି। ଏହାସହ ରାଜ୍ୟର ପ୍ରଭାରୀ ଭାବେ କେନ୍ଦ୍ରୀୟ ନେତା ଆଶା ଲାକ୍ରା, ଅମିତ ମାଲବ୍ୟ, ସୁନୀଲ ବଂଶଲ, ମଙ୍ଗଳ ପାଣ୍ଡେ ଓ ସତୀଶ ଧଣ୍ଡକୁ ଦାୟିତ୍ବ ଦିଆଯାଇଛି। ପ୍ରଭାରୀଙ୍କୁ ରାଜ୍ୟ ଓ କେନ୍ଦ୍ର ନେତୃତ୍ବ ମଧ୍ୟରେ ସମନ୍ବୟ ରକ୍ଷା କରି ନିର୍ବାଚନ ରଣନୀତିକୁ କାର୍ଯ୍ୟକାରୀ କରିବାକୁ ପରାମର୍ଶ ଦିଆଯାଇଛି। ତେବେ ବର୍ତମାନ ମନ୍ତ୍ରିମଣ୍ଡଳରେ ଥିବା ପଶ୍ଚିମବଙ୍ଗର ଚାରି ମନ୍ତ୍ରୀ ନୀତୀଶ ପରମାଣିକ, ଜୋହନ ବାର୍ଲା, ସୁଭାଷ ସରକାର ଓ ଶାନ୍ତନୁ ଠାକୁରଙ୍କୁ ଏହି ଟିମରେ ସାମିଲ କରାଯାଇ ନଥିବାରୁ ବିଜେପିର ଆଗାମୀ ଯୋଜନା ସମ୍ପର୍କରେ ପଶ୍ଚିମବଙ୍ଗ ରାଜନୀତିରେ ନାନା କଳ୍ପନାଜଳ୍ପନା ପ୍ରକାଶ ପାଇଛି। ଗତ ସପ୍ତାହରେ ଦିଲ୍ଲୀରେ ଅନୁଷ୍ଠିତ ଦଳର ବୈଠକରେ ଦେଶର ୧୦୦ଟି ସଂସଦୀୟ କ୍ଷେତ୍ରରେ ନିଜର ପ୍ରାର୍ଥୀ ପରିବର୍ତନ କରିବାକୁ ସଂକେତ ଦିଆଯାଇଛି। ପଶ୍ଚିମବଙ୍ଗରେ ୪୨ଟି ସଂସଦୀୟ କ୍ଷେତ୍ରରୁ ୩୫ଟିରେ ଜିତିବାକୁ ବିଜେପି ଲକ୍ଷ୍ୟ ରଖିଛି। ୨୦୧୯ରେ ବିଜେପି ୧୮ଟି ଆସନରେ ଜିତିଥିଲା।