ଡେରାଡୁନ: ମେ ୩ ତାରିଖରୁ ଆରମ୍ଭ ହୋଇଥିବା ‘ଚାର୍‌ ଧାମ ଯାତ୍ରା’ରେ ଏବେ ସୁଦ୍ଧା ୨୦୩ ଜଣ ତୀର୍ଥଯାତ୍ରୀଙ୍କର ମୃତ୍ୟୁ ଘଟି ସାରିଲାଣି। ଉତ୍ତରାଖଣ୍ଡ ଜରୁରୀକାଳୀନ ଅପରେସନ ସେଣ୍ଟର ପକ୍ଷରୁ ପ୍ରକାଶ ପାଇଥିବା ରିପୋର୍ଟରୁ ଜାଣିବାକୁ ମିଳିଛି ଯେ ଅଧିକାଂଶ ତୀର୍ଥଯାତ୍ରୀଙ୍କ ମୃତ୍ୟୁ ହୃଦ୍‌ଘାତ ଓ ଅନ୍ୟାନ୍ୟ ଶାରୀରିକ ସମସ୍ୟା ପାଇଁ ହୋଇଥିବା ଜଣାପଡ଼ିଛି।

Advertisment

୨୦୩ ତୀର୍ଥଯାତ୍ରୀଙ୍କ ମଧ୍ୟରୁ ୯୭ ଜଣ ତୀର୍ଥଯାତ୍ରୀ କେଦାରନାଥ ଯାତ୍ରୀ ମାର୍ଗରେ, ୫୧ ଜଣ ବଦ୍ରିନାଥ ଧାମରେ, ୧୩ ଜଣ ଗଙ୍ଗୋତ୍ରିରେ ଏବଂ ୪୨ ଜଣ ଯମୁନୋତ୍ରିରେ ମୃତ୍ୟୁ ବରଣ କରିଛନ୍ତି। ତୀର୍ଥଯାତ୍ରୀମାନଙ୍କର ଏପରି ମୃତ୍ୟୁ ଆୟୋଜକ ଏବଂ ପ୍ରଶାସନର ଚିନ୍ତାର କାରଣ ପାଲଟିଛି। ତୀର୍ଥଯାତ୍ରୀମାନଙ୍କୁ କେଦାରାନାଥ ଓ ଯମୁନାତ୍ରୀ ଧାମ ପାଇଁ ଏକ କଷ୍ଟ ମାର୍ଗ ଦେଇ ଯିବାକୁ ପଡୁଛି। ଏହି ଅଞ୍ଚଳ ଦେଇ ଚାଲିବା ସମୟରେ ଥଣ୍ଡା ହେତୁ ଅମ୍ଳଯାନ କମ୍‌ ରହିଥାଏ। ଯାହାକି ହାଇପୋକ୍ସିଆ, ହୃଦ୍‌ଘାତ, ଉଚ୍ଚ ରକ୍ତଚାପ, ଶ୍ବାସ ଆସି ସମସ୍ୟାର କାରଣ ହୋଇଥାଏ।

ମିଳିଥିବା ସୂଚନା ମୁତାବକ, ମେ ୩ ତାରିଖରୁ ଆରମ୍ଭ ହୋଇଥିଲା ଚାର ଧାମ ଯାତ୍ରା। ମେ’ ୩ରୁ ଏପର୍ଯ୍ୟନ୍ତ ଚାର ଧାମ ଦର୍ଶନ କରି ଫେରିଥିବା ତୀର୍ଥଯାତ୍ରୀଙ୍କ ସଂଖ୍ୟା ୨୫ ଲକ୍ଷ ଟପିଯାଇଥିବା ଜଣାପଡ଼ିଛି। ତେବେ ଗତ ସପ୍ତାହରୁ ସେମାନଙ୍କ ସଂଖ୍ୟା ହ୍ରାସ ପାଇବାରେ ଲାଗିଛି । ଚଳିତ ବର୍ଷ ଚାର ଧାମ ଯାତ୍ରୀଙ୍କ ନିମନ୍ତେ ଉତ୍ତରାଖଣ୍ଡ ସରକାର ଏକ ପରାମର୍ଶ ଜାରି କରିଥିଲେ ଏବଂ ହିମାଳୟ ମନ୍ଦିରଗୁଡିକୁ ଯାତ୍ରା ଆରମ୍ଭ କରିବା ପୂର୍ବରୁ ସେମାନଙ୍କ ଡାକ୍ତରୀ ପରୀକ୍ଷା କରାଇନେବାକୁ କହିଥିଲେ।