ଦଙ୍ଗାକାରୀଙ୍କ ବିରୋଧରେ ୟୁପି ପୁଲିସର କଠୋର କାର୍ଯ୍ୟାନୁଷ୍ଠାନ, ଏପର୍ଯ୍ୟନ୍ତ ୨୩୦ ଗିରଫ, ଜବତ ହେବ ସମ୍ପତ୍ତି
ପ୍ରୟାଗରାଜ : ଉତ୍ତରପ୍ରଦେଶରେ ଶୁକ୍ରବାରଦିନ ହୋଇଥିବା ହିଂସା ପରେ ରାଜ୍ୟ ସରକାର ଉପଦ୍ରବକାରୀଙ୍କ ବିରୋଧରେ କଠୋର ପଦକ୍ଷେପ ନେବା ଆରମ୍ଭ କରିଛନ୍ତି । ଖୋଦ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସ୍ଥିତିର ସମୀକ୍ଷା କରିବା ସହ ସତର୍କ ରହିବାକୁ ଜିଲ୍ଲାପାଳ ଓ ଏସପିମାନଙ୍କୁ ନିର୍ଦ୍ଦେଶ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଉତ୍ତରପ୍ରଦେଶ ପୁଲିସର ଏଡିଜି (ଆଇନ ଶୃଙ୍ଖଳା) ପ୍ରଶାନ୍ତ କୁମାର କହିଛନ୍ତି ଯେ ଏପର୍ଯ୍ୟନ୍ତ ୨୩୦ ଜଣ ଉପଦ୍ରବକାରୀ ଗିରଫ ହୋଇସାରିଛନ୍ତି । ସ୍ଥିତି ଉପରେ କଡ଼ା ନଜର ରଖାଯାଇଛି । ସେମାନଙ୍କ ବିରୋଧରେ ଗାଙ୍ଗଷ୍ଟର ଆଇନ ଅଧିନରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଓ ସେମାନଙ୍କ ସଂପତ୍ତିକୁ ଜବତ କରାଯିବ । ସେହିପରି ଦଙ୍ଗାକାରୀମାନେ ଶୁକ୍ରବାରଦିନ ନଷ୍ଟ କରିଥିବା ସାଧାରଣ ସଂପତ୍ତି ଓ ବ୍ୟକ୍ତିଗତ ସଂପତ୍ତିର ମୂଲ୍ୟ ସେମାନଙ୍କଠାରୁ ଆଦାୟ କରାଯିବ ବୋଲି ସେ କହିଛନ୍ତି ।
କେବଳ ପ୍ରୟାଗରାଜରେ ୬୮ ଜଣଙ୍କୁ ଗିରଫ କରାଯାଇଛି ଓ ଦଙ୍ଗାର ମାଷ୍ଟରମାଇଣ୍ଡ କୁହାଯାଉଥିବା ଜାଭେଦ ଅହମ୍ମଦକୁ ଗିରଫ କରାଯାଇଛି ।
ସୂଚନାଯୋଗ୍ୟ ଯେ ଏକ ଟେଲିଭିଜନ ବିତର୍କ ବେଳେ ବିଜେପିର ପୂର୍ବତନ ମୁଖପାତ୍ର ଇସଲାମ ବିରୋଧୀ ମନ୍ତବ୍ୟ ଦେବାପରେ ତାହାକୁ ନେଇ ଏକ ବଡ଼ ଧରଣର ବିବାଦ ସୃଷ୍ଟି ହୋଇଛି । ପ୍ରଥମେ ଏହି ବୟାନକୁ ନେଇ ଇସ୍ଲାମିକ ଦେଶମାନେ ବିରୋଧ କରିବା ପରେ ଗତ ଶୁକ୍ରବାରଦିନ ଭାରତୀୟ ମୁସଲମାନମାନେ ରାସ୍ତାକୁ ଓହ୍ଲାଇଛନ୍ତି । ସେମାନେ ନୂପୁର ଶର୍ମାଙ୍କ ଗିରଫ ଦାବି କରି ହିଂସାତ୍ମକ ଆନ୍ଦୋଳନ କରିଥିଲେ ।