ନୂଆଦିଲ୍ଲୀ : କରୋନା ଭାଇରସ ସମଗ୍ର ବିଶ୍ୱର ଅର୍ଥନୈତିକ ଓ ସାମାଜିକ ବ୍ୟବସ୍ଥା ଉପରେ ସୁଦୂରପ୍ରସାରୀ ପ୍ରଭାବ ପକାଇବାର ଆଶଙ୍କା ଦେଖାଦେଇଛି । ବିଶେଷକରି ଅନୁନ୍ନତ ଓ ବିକାଶଶୀଳ ଦେଶମାନେ ଏହା ଦ୍ୱାରା ଅଧିକ କ୍ଷତିଗ୍ରସ୍ତ ହେବାର ଆଶଙ୍କା ରହିଛି । ବିଶ୍ୱରେ ଦାରିଦ୍ର୍ୟ ଓ ବେକାରୀ ସମସ୍ୟା ବଢିଚାଲିବ ବୋଲି ଜାତିସଂଘ ପକ୍ଷରୁ ପ୍ରକାଶିତ ଏକ ରିପୋର୍ଟରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଜାତିସଂଘ ଅଧିନସ୍ଥ ଅନ୍ତର୍ଜାତୀୟ ଶ୍ରମ ସଂଗଠନ (ଆଇଏଲଓ) ପକ୍ଷରୁ ପ୍ରକାଶିତ ଏକ ପ୍ରାରମ୍ଭିକ ରିପୋର୍ଟ ଅନୁସାରେ କରୋନା ଭାଇରସ ଯୋଗୁଁ ସମଗ୍ର ବିଶ୍ୱରେ ପ୍ରାୟ ୨ କୋଟି ୫୦ ଲକ୍ଷ ଲୋକ ପ୍ରତ୍ୟକ୍ଷଭାବେ ନିଯୁକ୍ତି ହରାଇବେ । ଏତେ ସଂଖ୍ୟାରେ ଛଟେଇ ବିଶ୍ୱ ପାଇଁ ଗୁରୁତର ମାନବୀୟ ପରିସ୍ଥିତି ସୃଷ୍ଟି କରିବ । କେବଳ ଏତିକି ନୁହେଁ ବିଶ୍ୱରେ ବେରୋଜଗାରଙ୍କ ସଂଖ୍ୟା ବଢିଚାଲିବ ।
ଆଉ ଏକ ରିପୋର୍ଟ ଅନୁସାରେ କରୋନା ଭାଇରସ ଯୋଗୁଁ କେବଳ ଭାରତୀୟ ପର୍ଯ୍ୟଟନ ଓ ହୋଟେଲ ଶିଳ୍ପରେ ପ୍ରାୟ ୩ କୋଟି ୮୦ ଲକ୍ଷ ଲୋକ ପ୍ରତ୍ୟକ୍ଷ ଓ ପରେକ୍ଷଭାବେ ନିଯୁକ୍ତି ହରାଇବେ । ଭାରତୀୟ ପର୍ଯ୍ୟଟନ ଓ ହୋଟେଲ ମହାସଂଘ ପକ୍ଷରୁ ଏହି ରିପୋର୍ଟ ପ୍ରସ୍ତୁତ କରାଯାଇଛି ।
ଏହାକୁ ସୀମିତ କରିବାକୁ ହେଲେ ଅନ୍ତର୍ଜାତୀୟ ସ୍ତରରେ ମିଳିତ ଉଦ୍ୟମ ଆବଶ୍ୟକ ହେବ । ନିଯୁକ୍ତି ଗୁଡ଼ିକର ସୁରକ୍ଷା ପାଇଁ ଆର୍ଥିକ ଅଭିବୃଦ୍ଧିକୁ ଗୁରୁତ୍ୱ ଦେବାକୁ ହେବ, ଶିଳ୍ପସଂସ୍ଥାଗୁଡ଼ିକୁ ଆର୍ଥିକ ସହାୟତା ଦେବାକୁ ହେବ । ଆଇଏଲଓ ସ୍ପଷ୍ଟ କରିଦେଇଛି ଯେ କରୋନା ଭାଇରସ ଆଉ କେବଳ ଏକ ସ୍ୱାସ୍ଥ୍ୟ ସମସ୍ୟା ହୋଇରହିନାହିଁ, ଏହା ବିଶ୍ୱ ପାଇଁ ଏକ ଆର୍ଥିକ ସଂକଟରେ ପରିଣତ ହେବାକୁ ଯାଉଛି ।