ନୂଆଦିଲ୍ଲୀ : ଓଡ଼ିଶା ସମେତ ଦେଶରେ ଥିବା ୨୯ଟି ସ୍ଥାନରେ ଜାତୀୟ ରାଜପଥ ଉପରେ ଏୟାରଷ୍ଟ୍ରିପ ନିର୍ମାଣ କରାଯିବ । ଯୁଦ୍ଧ ସମୟରେ ଯୁଦ୍ଧବିମାନ ଉଠିବା ପାଇଁ ଏସବୁ ଏୟାରଷ୍ଟ୍ରିପକୁ ବ୍ୟବହାର କରାଯିବ । ଯେଉଁ ଯେଉଁ ରାଜ୍ୟରେ ଏସବୁ ଏୟାରଷ୍ଟ୍ରିପ ନିର୍ମାଣ ପାଇଁ ଯୋଜନା କରାଯାଇଛି ସେଗୁଡ଼ିକ ହେଲା ଜାମ୍ମୁ ଓ କାଶ୍ମୀର, ପଂଜାବ, ହରିୟାନା, ରାଜସ୍ଥାନ, ଗୁଜରାଟ, ଉତ୍ତରାଖଣ୍ଡ, ମଣିପୁର, ପଶ୍ଚିମବଙ୍ଗ, ଓଡ଼ିଶା, ଝାଡ଼ଖଣ୍ଡ ଓ ଛତିଶଗଡ଼ । ସେହିପରି ଦକ୍ଷିଣଭାରତୀୟ ରାଜ୍ୟ ତାମିଲନାଡୁ ଓ ଆନ୍ଧ୍ରପ୍ରଦେଶରେ ମଧ୍ୟ ସମାନ ଯୋଜନା କରାଯାଇଛି । ନିକଟରେ ଲୋକସଭାରେ ଏ ସଂପର୍କରେ ସୂଚନା ଦେଇଥିଲେ କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ମନସୁଖଲାଲ ମାଣ୍ଡବ୍ୟ ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ ଏସବୁ ପ୍ରକଳ୍ପଗୁଡ଼ିକର ସମ୍ଭାବ୍ୟତାକୁ ପରଖିବା ପାଇଁ କେନ୍ଦ୍ର ସରକାର ୨୦୧୬ରେ ଏକ ଅନ୍ତଃମନ୍ତ୍ରୀମଣ୍ଡଳୀୟ କମିଟି ଗଠନ କରିଥିଲେ । ଏଥିରେ କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରାଳୟ, ପ୍ରତିରକ୍ଷା ମନ୍ତ୍ରାଳୟ ଓ ବାୟୁସେନାର ବିଶେଷଜ୍ଞମାନେ ସଦସ୍ୟ ଅଛନ୍ତି । ଗତ ନଭେମ୍ବର ମାସରେ ମାଣ୍ଡବ୍ୟ ସୂଚନା ଦେଇଥିଲେ ଯେ ସରକାର ସାରାଦେଶରେ ଏପରି ୧୩ଟି ରାଜପଥକୁ ଚିହ୍ନଟ କରିଛନ୍ତି ଯେଉଁଠାରେ ଯୁଦ୍ଧବିମାନ ଜରୁରୀ ସମୟରେ ଓହ୍ଲାଇପାରିବ ।