ନୂଆଦିଲ୍ଲୀ: ଆଜି ନୂଆଦିଲ୍ଲୀର ପ୍ରଗତି ମୈଦାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୬ଷ୍ଠ ‘ଇଣ୍ଡିଆ ମୋବାଇଲ୍ କଂଗ୍ରେସ’ (ଆଇଏମ୍ସି) ଉଦ୍ଘାଟନ କରିବା ଅବସରରେ ଭାରତରେ ‘୫ଜି’ (ଫିଫ୍ଥ୍ ଜେନେରେସନ୍) ମୋବାଇଲ୍ ସେବାର ଶୁଭାରମ୍ଭ କରିଛନ୍ତି। ତେବେ ୫ଜି ଯାତ୍ରା ସେତେ ସହଜ ନଥିଲା | କାରଣ ୧୯୯୫ ମସିହାରେ ଭାରତରେ ୨ଜି ସର୍ଭିସ ଆରମ୍ଭ ହେବା ସହିତ ଦେଶରେ ଇଣ୍ଟରନେଟ୍ ବିପ୍ଳବ ଆରମ୍ଭ ହୋଇଥିଲା | ୨ଜି ରୁ ୩ଜି ପର୍ଯ୍ୟନ୍ତ ଯାତ୍ରା କରିବାକୁ ଦେଶ ୧୪ ବର୍ଷ ସମୟ ନେଇଥିଲା | ୩ଜି ସର୍ଭିସ ୨୦୦୯ ରେ ଆରମ୍ଭ କରାଯାଇଥିଲା | ସେହିପରି ୪ଜି ସର୍ଭିସ ୨୦୧୨ରେ ଆରମ୍ଭ ହୋଇଥିଲା ଏବଂ ବର୍ତ୍ତମାନ ୨୦୨୨ରେ ୫ଜି ସେବା ଆରମ୍ଭ ହୋଇଛି | ବିଶ୍ୱର ଅନେକ ଦେଶରେ ୫ଜି ସର୍ଭିସ ଜାରି ରହିଛି | ଭାରତକୁ ୨ଜି ରୁ ୫ଜି ପର୍ଯ୍ୟନ୍ତ ପହଂଚିବାକୁ ୨୭ ବର୍ଷ ଲାଗିଥିବାବେଳେ ୪ଜି ରୁ ୫ଜିକୁ ପହଞ୍ଚିବା ପାଇଁ ୧୦ ବର୍ଷ ସମୟ ଲାଗିଥିଲା |
Sambad is now on WhatsApp
Join and get latest news updates delivered to you via WhatsApp
ଭାରତରେ ଦ୍ରୁତ ଗତିରେ ଇଣ୍ଟରନେଟ୍ ବ୍ୟବହାରକାରୀଙ୍କ ସଂଖ୍ୟା ବଢ଼ୁଥିବାରୁ ଇଣ୍ଟରନେଟର ସ୍ପିଡ଼ ବଢାଇବା ପାଇଁ ନିରନ୍ତର ପ୍ରୟାସ କରାଯାଉଛି | ତେବେ ଭାରତରେ ଇଣ୍ଟରନେଟର ଭବିଷ୍ୟତ କଣ ଓ ୫ଜି କିଭଳି ସାହାଯ୍ୟ କରିବ ସେନେଇ ଏକ ରିପୋର୍ଟ ପ୍ରକାଶ ପାଇଛି | ଲଣ୍ଡନ ଭିତ୍ତିକ ଡାଟା ଆନାଲିଟିକ୍ସ ଏବଂ ବ୍ରାଣ୍ଡ କନ୍ସଲ୍ଟିଂ କମ୍ପାନି କଣ୍ଟର ଗ୍ରୁପ ନିକଟରେ ଏକ ଅଧ୍ୟୟନର ଆଧାରରେ, ଆଗାମୀ ଦିନରେ ଭାରତରେ ଇଣ୍ଟରନେଟ୍ ସେବା ବ୍ୟବହାରରେ ବୃଦ୍ଧି ହେବାର ସମ୍ଭାବନା ଅଛି ବୋଲି କହିଛି | ଚଳିତ ବର୍ଷ ଏପ୍ରିଲରେ ପ୍ରକାଶିତ ଅଧ୍ୟୟନରେ କୁହାଯାଇଛି ଯେ ପୂର୍ବ ତିନିବର୍ଷ ତୁଳନାରେ ଚଳିତ ବର୍ଷ ଦୈନିକ ଇଣ୍ଟରନେଟ ବ୍ୟବହାରକାରୀଙ୍କ ସଂଖ୍ୟାରେ ୩୦ ପ୍ରତିଶତ ବୃଦ୍ଧି ଘଟିଛି।
ଏହି ଅଧ୍ୟୟନରେ ଆଗାମୀ ତିନି ବର୍ଷ ମଧ୍ୟରେ ଭାରତର ଡିଜିଟାଲ ଇକୋସିଷ୍ଟମର ବିସ୍ତାର ହେବାର ସମ୍ଭାବନାକୁ ଆକଳନ କରିଛି। ଏଥିରେ କୁହାଯାଇଥିଲା ଯେ ଇଣ୍ଟରନେଟ ଦ୍ୱାରା ଇ-ସରକାର ଏବଂ କୃଷି ପ୍ରଯୁକ୍ତିବିଦ୍ୟାରେ ଉଲ୍ଲେଖନୀୟ ବୃଦ୍ଧି ଘଟିବ। ଅଧ୍ୟୟନରେ କୁହାଯାଇଛି ଯେ ୨୦୨୫ ସୁଦ୍ଧା ପ୍ରାୟ ୮୭% ଭାରତୀୟ ପରିବାରର ଘରେ ଇଣ୍ଟରନେଟ୍ ସଂଯୋଗ ଥିବ। ଅଧ୍ୟୟନରେ କୁହାଯାଇଛି ଯେ ଏପର୍ଯ୍ୟନ୍ତ ଭାରତରେ ଏକ କୋଟି ୮୦ ଲକ୍ଷ ସହରୀ ପରିବାର ପାଖରେ ସ୍ମାର୍ଟ ଟିଭି, ସ୍ମାର୍ଟ ସେଟ୍-ଟପ୍ ବକ୍ସ ଏବଂ ଅନ୍ୟାନ୍ୟ ସ୍ମାର୍ଟ ଡିଭାଇସ ବ୍ୟବହାର କରୁଥିବାବେଳେ ୨୦୨୫ ସୁଦ୍ଧା ଏହିପରି ପରିବାର ସଂଖ୍ୟା ୫ କୋଟିକୁ ବୃଦ୍ଧି ପାଇବ।