୧୫-୧୮ ବର୍ଷ ପିଲାଙ୍କୁ ୨ୟ ଡୋଜ ଟିକାଦାନ ତ୍ବରାନ୍ବିତ କର, ରାଜ୍ୟଗୁଡ଼ିକୁ ସ୍ବାସ୍ଥ୍ୟ ମନ୍ତ୍ରାଳୟର ପରାମର୍ଶ
ନୂଆଦିଲ୍ଲୀ : ଗତ ଜାନୁଆରି ୩ରେ ପ୍ରଥମ ଡୋଜ୍ ଟିକା ନେଇଥିବା ୧୫ରୁ ୧୮ ବର୍ଷ ବୟସ୍କ ପିଲାମାନଙ୍କ ୨ୟ ଡୋଜ ନେବାର ସମୟ ଆସିଯାଇଛି । ଏଣୁ ସେମାନଙ୍କ ୨ୟ ଡୋଜ୍ ଟିକାଦାନକୁ ତ୍ବରାନ୍ବିତ କରିବାକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ରାଜ୍ୟ ସରକାରମାନଙ୍କୁ ନିର୍ଦ୍ଦେଶ ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ସରକାରମାନଙ୍କୁ ପତ୍ର ଲେଖି କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ କହିଛନ୍ତି ଯେ ଯେଉଁମାନଙ୍କ ୨ୟ ଡୋଜ ନେବାର ସମୟ ଆସିଯାଇଛି ସେମାନଙ୍କ ଟିକାକରଣକୁ ସମୟବଦ୍ଧ ଉପାୟରେ ଶେଷ କରାଯାଉ । ଏହା ସହିତ ଯେଉଁମାନେ ପ୍ରଥମ ଡୋଜ୍ ନେଇନାହାନ୍ତି, ସେମାନଙ୍କ ଟିକାକରଣକୁ ଯଥାଶୀଘ୍ର ସଂପୂର୍ଣ୍ଣ କରାଯାଉ ।
ସେ କହିଛନ୍ତି ଯେ ଜାନୁଆରି ୩ରେ ସାରା ଦେଶରେ ୧୫-୧୮ ବର୍ଷ ପିଲାମାନଙ୍କ ଟିକାଦାନ ଆରମ୍ଭ ହୋଇଥିଲା । ଇତି ମଧ୍ୟରେ ପ୍ରାୟ ୪.୬୬ କୋଟି ପିଲା ଟିକା ନେଇସାରିଲେଣି । ଜାନୁଆରି ୩ରେ ଯେଉଁ ୪୨ଲକ୍ଷ ପିଲା ଟିକା (କୋଭାକ୍ସିନ) ନେଇଥିଲେ ସେମାନଙ୍କ ୨ୟ ଡୋଜ ନେବାର ସମୟ ଜାନୁଆରି ୩୧ରୁ ଆରମ୍ଭ ହୋଇଯାଇଛି । ଠିକ ସମୟରେ ଟିକା ନେଲେ ହିଁ ଶରୀରକୁ ଉପଯୁକ୍ତ ସୁରକ୍ଷା ମିଳିଥାଏ । ଏଣୁ ଏସବୁ ପିଲାମାନଙ୍କର ୨ୟ ଡୋଜ ଟିକାଦାନ ଯେପରି ସୁଚାରୁ ରୂପରେ ସଂପୂର୍ଣ୍ଣ ହେବ ସେ ନେଇ ଜିଲ୍ଲା ଓ ରାଜ୍ୟ ସ୍ତରରେ ଦୈନିକ ଭିତ୍ତିରେ ତଦାରଖ କରାଯିବା ଉଚିତ ।