ଯେଉଁ ହୋଟେଲରେ ରହୁଥିଲେ କୋହଲି, ସେଠାରୁ ଗିରଫ ହେଲେ ୩ ଦୁର୍ଦ୍ଦାନ୍ତ ଅପରାଧୀ

ନୂଆଦିଲ୍ଲୀ: ଏବେ ଆଇପିଏଲ୍ ଲଢେଇ ଜାରି ରହିଛି | ତେବେ ଫଟାଫଟ କ୍ରିକେଟର ଏହି ମାହୋଲ ଭିତରେ ଖେଳାଳିଙ୍କ ସୁରକ୍ଷା ଅବହେଳାକୁ ନେଇ ଏକ ସମ୍ବେଦନଶୀଳ ମାମଲା ସାମ୍ନାକୁ ଆସିଛି | ବାସ୍ତବରେ ଏହି ସିଜିନରେ 'ହୋମ ଆଣ୍ଡ ଆୱେ' ଫର୍ମାଟରେ ଖେଳାଯାଉଛି, ଯେଉଁ କାରଣରୁ ଦଳମାନେ ସେମାନଙ୍କର ଅଧା ମ୍ୟାଚ୍ ଘରୋଇ ଗ୍ରାଉଣ୍ଡରେ ଏବଂ ଅନ୍ୟ ମ୍ୟାଚ ବିପକ୍ଷ ଦଳର ଘରୋଇ ଗ୍ରାଉଣ୍ଡରେ ଖେଳୁଛନ୍ତି | ଏହି କାରଣରୁ ଦଳଗୁଡିକ ପ୍ରତ୍ୟେକ ମ୍ୟାଚ୍ ପାଇଁ ବିଭିନ୍ନ ସହରକୁ ଯାଉଛନ୍ତି | ଏହି ସମୟରେ ଏଭଳି ଏକ ମାମଲା ସାମ୍ନାକୁ ଆସିଛି ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଯେଉଁ ହୋଟେଲରେ ଆଇପିଏଲ୍ ଦଳ ରହିଥିଲେ ସେହି ହୋଟେଲରୁ ଦୁର୍ଦ୍ଦାନ୍ତ ଅପରାଧୀମାନଙ୍କୁ ଗିରଫ କରାଯାଇଛି। ରିପୋର୍ଟ ଅନୁଯାୟୀ, ଆଇପିଏଲ୍ ଟିମ୍ ରହୁଥିବା ସେହି ହୋଟେଲରେ ତିନିଜଣ ଅପରାଧୀ ସେହି ସମୟରେ ରହିଥିଲେ।

କିନ୍ତୁ ବର୍ତ୍ତମାନ ପୁଲିସ ଏହି ତିନି ଅଭିଯୁକ୍ତଙ୍କୁ ଗିରଫ କରିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଏପ୍ରିଲ୍ ୨୦ରେ ମୋହାଲିରେ ଆରସିବି ଏବଂ ପଞ୍ଜାବ କିଙ୍ଗସ୍ ମଧ୍ୟରେ ଖେଳାଯାଇଥିବା ମ୍ୟାଚ୍ ପାଇଁ ବିରାଟଙ୍କ ସମେତ ବହୁ ପ୍ରସିଦ୍ଧ ଖେଳାଳି ଆଇଟି ପାର୍କରେ ଅବସ୍ଥିତ ଏକ ହୋଟେଲରେ ରହିଥିଲେ। ଏହି ସମୟରେ ପୁଲିସ ସୂଚନା ପାଇଥିଲା ଯେ ଯେଉଁ ହୋଟେଲରେ ଖେଳାଳିମାନେ ରହିଛନ୍ତି, ସେହି ହୋଟେଲରେ ତିନିଜଣ ସୁପାରୀ କିଲର ମଧ୍ୟ ରହିଛନ୍ତି | ଆଉ ପୁଲିସ ରାତି ପ୍ରାୟ ସାଢେ ୧୦ଟାବେଳେ ହୋଟେଲ ଉପରେ ଚଢ଼ାଉ କରି ଅପରାଧୀମାନଙ୍କୁ ଗିରଫ କରିଥିଲା | ଯଦି ରିପୋର୍ଟକୁ ବିଶ୍ୱାସ କରାଯାଏ, ତେବେ କୋହଲିଙ୍କ ସମେତ ଦଳର ଖେଳାଳିମାନେ ହୋଟେଲର ପଞ୍ଚମ ମହଲାରେ ରହିଥିଲେ | ଯେତେବେଳେ କି, ଟିମ୍ ସହିତ ଆସିଥିବା କର୍ମଚାରୀମାନେ ଚତୁର୍ଥ ମହଲାରେ ରହୁଥିଲେ | ଅନ୍ୟପଟେ ଅଭିଯୁକ୍ତମାନେ ହୋଟେଲର ତୃତୀୟ ମହଲାରେ ରହିଥିଲେ | ସେଠାରୁ ପୁଲିସ ସେମାନଙ୍କୁ ଗିରଫ କରିଥିଲା। ଖବର ଅନୁଯାୟୀ, ଏହି ତିନି ଅଭିଯୁକ୍ତଙ୍କ ନାମରେ ଏକାଧିକ ଜଘନ୍ୟ ମାମଲା ଥିବାବେଳେ ଖେଳାଳିଙ୍କ ସୁରକ୍ଷା ଅବହେଳାକୁ ନେଇ ଚର୍ଚ୍ଚା ଜୋର ଧରିଛି |