ଅମରାବତୀ: ମୁହାଁମୁହିଁ ଧକ୍କା ହେଲା ୨ଟି କାର୍। ଦ୍ରୁତ ଗତିରେ ଆସୁଥିବା ଏକ କଳା ରଙ୍ଗର କାର୍ ନିୟନ୍ତ୍ରଣ ହରାଇ ରାସ୍ତାର ଅପରପାର୍ଶ୍ବକୁ ଆସିଯିବାରୁ ଅନ୍ୟ ଏକ କାର୍ ସହ ଧକ୍କା ଖାଇଥିଲା। ଦୁଇଟି କାର୍ ଦ୍ରୁତ ଗତିରେ ଥିବା ବେଳେ ମୁହାଁମୁହିଁ ଧକ୍କା ହେବାରୁ ୩ଜଣକ ଜୀବନ ଯାଇଥିବା ଜଣାପଡ଼ିଛି। ଦୁର୍ଘଟଣାଟି ଏତେ ତୀବ୍ର ଥିଲା ଯେ, କାର୍ ସାମ୍ନା ପଟ ଭିତରକୁ ପଶିଯାଇଥିଲା। ଏମିତି କି କାରର କବାଟ ଭାଙ୍ଗି କିଛି ଦୂରରେ ପଡ଼ିଥିବା ଭିଡିଓରେ ଦେଖିବାକୁ ମିଳିଛି। ଘଟଣାଟି ଘଟିଛି ଆନ୍ଧ୍ରପ୍ରଦେଶର ଦେବରପଲ୍ଲୀ ମଣ୍ଡଳରେ।

Advertisment

ମିଳିଥିବା ସୂଚନା ମୁତାବକ, ଗୋଟାଏ କାରରେ ୭ଜଣ ଯାତ୍ରୀ ଥିବା ବେଳେ ଅନ୍ୟ କାରରେ ୪ଜଣ ଥିଲେ। ଏହି ଦୁର୍ଘଟଣାରେ ୩ଜଣକ ମୃତ୍ୟୁ ହୋଇଥିବା ବେଳେ ଅନ୍ୟ ଗୁରୁତର ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ଜଣାପଡ଼ିଛି। ପୁଲିସ ଏହି ଘଟଣାକୁ ନେଇ ଏବେ ଏତଲା ରୁଜୁ କରି ଆଗାମୀ ତଦନ୍ତ ଆରମ୍ଭ କରିଛି।

ଏହି ଘଟଣାର ଯେଉଁ ଭିଡିଓ ଭାଇରାଲ ହେଉଛି, ତାହା ଦେଖି ଲୋକଙ୍କ‌ ଲୋମ ଟାଙ୍କୁରି ଉଠିବ ନିଶ୍ଚୟ। ଭିଡିଓରେ ଦେଖାଯାଇଛି ଯେ, ବହୁତ ଦୂରରୁ ଏକ କଳା ରଙ୍ଗର କାର ଦ୍ରୁତ ଗତିରେ ଆସୁଛି। ଏହି ସମୟରେ ଚାଳକ ନିୟନ୍ତ୍ରଣ ହରାଇ ନିଜ ଲେନ୍ ଡେଇଁ ଅନ୍ୟ ଲେନକୁ ଚାଲି ଆସୁଛନ୍ତି। ଏହି ସମୟରେ ସେହି ଲେନରେ ଆସୁଥିବା ଏକ ଧଳା ରଙ୍ଗର କାର୍ ଦୁର୍ଘଟଣାକୁ ଏଡାଇବା ପାଇଁ ଗାଡ଼ି ମୋଡ଼ିଥିଲେ ବି କଳା ରଙ୍ଗର କାରଟି ଆସି ଧକ୍କା ଖାଉଛି। ଦୁର୍ଘଟଣା ପରେ କିଛି କାର୍ ଓ ବାଇକ୍ ଆରୋହୀ ସାହାଯ୍ୟ ପାଇଁ ଅଟକୁଛନ୍ତି। ଜଣେ ବାଇକ୍ ଆରୋହୀ ଭିତରର ଦୃଶ୍ୟ ଦେଖି ମୁଣ୍ଡରେ ହାତ ଦେଇ ତଳେ ବସିପଡ଼ୁଥିବା ଭିଡିଓରେ ଦେଖାଯାଇଛି।