ସେନାରୁ ଘରକୁ ଚୋରି କରିଆଣିଥିଲେ ବୋମା, ଫୁଟିଯିବାରୁ ପରିବାରର ୩ ଜଣଙ୍କର ମୃତ୍ୟୁ

ଭୋପାଳ: ମଧ୍ୟପ୍ରଦେଶର ଶିବପୁରୀରେ ବୋମା ବିସ୍ଫୋରଣରେ ଗୋଟିଏ ପରିବାରର ତିନିଜଣଙ୍କର ମୃତ୍ୟୁ ହୋଇଯାଇଛି | ପୁଲିସର କହିବା ମୁତାବକ ପିତ୍ତଳ ତରଳେଇବା ପାଇଁ ଶ୍ୟାମ ଜାଟବା ପାଖରେ ଥିବା ସେନା କ୍ୟାମ୍ପରୁ ଏକ ପୁରୁଣା ବୋମା ଚୋରି କରି ନେଇଆସିଥିଲେ | ସୋମବାର ପିତଳ ଓ ଅନ୍ୟ କିଛି ଧାତୁକୁ ତରଳେଇବା ପାଇଁ ଏହି ବୋମାକୁ ଲଗାଇବା ମାତ୍ରେ ଏହା ଫାଟିଯାଇଥିଲା |

ଏଥିରେ ଶ୍ୟାମଙ୍କ ସହ ତାଙ୍କର ଝିଅ ଓ ନାତୁଣୀର ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା | ଏହି ବିସ୍ଫୋରଣରେ ପରିବାରର ଅନ୍ୟ ଜଣେ ସଦସ୍ୟ ଗୁରୁତର ଭାବେ ଆହତ ହୋଇଛନ୍ତି | ତେବେ ପୁଲିସ ଶବ ବ୍ୟବଛେଦ କରି ଏହି ଘଟଣାର ତଦନ୍ତ କରୁଛି | ବେଆଇନ ଭାବେ କିଭଳି ସେ କ୍ୟାମ୍ପ ଭିତରେ ପଶିଥିଲେ ପୁଲିସ ଏହାର ତଦନ୍ତ ଆରମ୍ଭ କରିଛି |

ସେପଟେ ଶ୍ୟାମଙ୍କ ପୁଅ କହିଛନ୍ତି ଯେ ପିତ୍ତଳ ତରଳେଇବା କାମ ଆରମ୍ଭ ହୋଇଥିବାବେଳେ ନିଆଁର ସଂସ୍ପର୍ଶରେ ଆସି ଏହି ବୋମାଟି ଫୁଟିଯାଇଥିଲା | ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ସୃଷ୍ଟି କରିଛି |