ବିଚାରପତି ପରୀକ୍ଷା ପାଇଁ ୩ ବର୍ଷ ଓକିଲାତି ଅଭ୍ୟାସ ପ୍ରସଙ୍ଗ: ରାୟ ବିରୋଧରେ ରିଭ୍ୟୁ ପିଟିସନ୍‌

ନୂଆଦିଲ୍ଲୀ: ବିଚାରପତି ପରୀକ୍ଷା ଦେବାପାଇଁ ଅତି କମ୍‌ରେ ୩ ବର୍ଷର ଓକିଲାତି ଅଭ୍ୟାସ ବାଧ୍ୟତାମୂଳକ ବୋଲି ସୁପ୍ରିମକୋର୍ଟ ମେ’ ୨୦ ତାରିଖରେ ଦେଇଥିବା ରାୟ ବିରୋଧରେ ରିଭ୍ୟୁ ପିଟିସନ୍‌ ଦାଖଲ ହୋଇଛି। ଏହାଦ୍ବାରା ଆଇନ ଶିକ୍ଷା ଶେଷ କରୁଥିବା ସଦ୍ୟ ଗ୍ରାଜୁଏଟ୍‌ମାନେ ନ୍ୟାୟିକ ସେବା ପରୀକ୍ଷାରୁ ବଞ୍ଚିତ ହେବେ। ପ୍ରଧାନ ବିଚାରପତି ବି. ଆର୍‌. ଗୱାଇ, ଜଷ୍ଟିସ ଅଗଷ୍ଟାଇନ ଜର୍ଜ‌୍ ମସିହ ଏବଂ କେ ବିନୋଦ ଚନ୍ଦ୍ରନଙ୍କ ଖଣ୍ଡପୀଠ ମେ’ ୨୦ ତାରିଖରେ ଏକ ଗୁରୁତ୍ବପୂର୍ଣ୍ଣ ରାୟ ଦେଇ କହିଥିଲେ ଯେ ସିଭିଲ୍‌ ବିଚାରପତି ହେବାପାଇଁ ଆଶାୟୀ ପ୍ରାର୍ଥୀ ଅତି କମ୍‌ରେ ୩ ବର୍ଷର ନ୍ୟାୟିକ ଅଭ୍ୟ‌ାସ କରିବା ଉଚିତ।

ଉଲ୍ଳେଖଯୋଗ୍ୟ ଯେ ଆଇନଜୀବୀ ଭାବେ ନିକଟରେ ନାମ ତାଲିକାଭୁକ୍ତ କରିଥିବା ଚନ୍ଦ୍ର ସେନ ଯାଦବ ଏହି ରିଭ୍ୟୁ ପିଟିସନ୍‌ ଦାଖଲ କରିଛନ୍ତି। ଆବେଦନକାରୀ ଦର୍ଶାଇଛନ୍ତି ଯେ ସର୍ବୋଚ୍ଚ ଅଦାଲତ ଯେଉଁ ସର୍ତ୍ତ ରଖିଛନ୍ତି ତା’ଦ୍ବାରା ଧାରା ୧୪ ଏବଂ ୧୬ ଅଧୀନରେ ମୌଳିକ ଅଧିକାର ଉଲ୍ଲଂଘନ ହେଉଛି।  ଯାଦବ ୨୦୨୭ରୁ ୩ ବର୍ଷର ଅଭ୍ୟାସ ବାଧ୍ୟତାମୂଳକ ନିୟମ କାର୍ଯ୍ୟକାରୀ କରିବାପାଇଁ କୋର୍ଟଙ୍କୁ ଅନୁରୋଧ କରିଛନ୍ତି।  ୨୦୨୩-୨୫ ବ୍ୟାଚ୍‌ର ପରୀକ୍ଷାର୍ଥୀଙ୍କ ପାଇଁ ଏହି ନିୟମ ଲାଗୁ ନକରିବାପାଇଁ ସେ ଅନୁରୋଧ କରିଛନ୍ତି। ପୂର୍ବ ଯୋଗ୍ୟତା ଆଧାରରେ ଏମାନେ ନିଜକୁ ପ୍ରସ୍ତୁତ କରିଥିବାରୁ ସେମାନଙ୍କ ପାଇଁ ଏହି ନିୟମ ଲାଗୁ ନକରିବାପାଇଁ ଅନୁରୋଧ କରିଛନ୍ତି।