ନୂଆଦିଲ୍ଲୀ: କେବଳ ବିଜୟ ମାଲ୍ୟା ବା ନିରବ ମୋଦି ନୁହେଁ ପ୍ରାୟ ୩୧ ଜଣ ଆର୍ଥିକ ଠକ ଭାରତରୁ ପଳାୟନ କରିଛନ୍ତି ବୋଲି ସରକାର ସୂଚନା ଦେଇଛନ୍ତି । ଲୋକସଭାରେ ଏକ ପ୍ରଶ୍ନର ଲିଖିତ ଉତ୍ତର ଦେଇ କେନ୍ଦ୍ର ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ଏମ.ଜେ.ଆକବର କହିଛନ୍ତି ଯେ ଦେଶରୁ ବିଭିନ୍ନ ଆର୍ଥିକ ଠକେଇରେ ସଂପୃକ୍ତ ୩୧ ଜଣ ବ୍ୟକ୍ତି ଭାରତରୁ ପଳାଇଯାଇ ବିଦେଶରେ ରହୁଛନ୍ତି । ଏହି ତାଲିକାରେ ଥିବା ବ୍ୟକ୍ତିମାନଙ୍କ ମଧ୍ୟରେ ରହିଛନ୍ତି ନିରବ ମୋଦି, ତାଙ୍କ ମାମୁଁ ମେହୁଲ ଚୋକସୀ,ବିଜୟମାଲ୍ୟା, ଲଲିତ ମୋଦି, ଅସ୍ତ୍ର ବେପାରୀ ସଂଜୟ ଭଣ୍ଡାରୀ, ଆଶୀଷ ଯବନପୁତ୍ର, ପୁଷ୍ପେଷ ବୈଦ,ସଂଜୟ କାଲରା ଇତ୍ୟାଦି । ଏସବୁ ଠକମାନଙ୍କ ପ୍ରତ୍ୟାର୍ପଣ ପାଇଁ ସିବିଆଇ ବୈଦେଶିକ ମନ୍ତ୍ରାଳୟକୁ ଅନୁରୋଧ କରିଛି । ଏସବୁ ଲୋକମାନଙ୍କ ପ୍ରତ୍ୟାର୍ପଣ ପାଇଁ ସଂପୃକ୍ତ ଦେଶମାନଙ୍କୁ ଅନୁରୋଧ କରାଯାଇଛି ବୋଲି ଆକବର କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ବ୍ୟାଙ୍କରୁ କୋଟି କୋଟି ଟଙ୍କାର ଋଣ ନେଇ ପରିଶୋଧ କରୁନଥିବା ପ୍ରାୟ ୯୧ ଜଣ ବ୍ୟକ୍ତିଙ୍କ ତାଲିକା ପ୍ରସ୍ତୁତ କରିଛନ୍ତି କେନ୍ଦ୍ର ସରକାର । ଏହି ଲୋକମାନେ ଜାଣିଯୁଣି ଋଣ ପରିଶୋଧ କରୁନାହାନ୍ତି ବୋଲି ସରକାରଙ୍କ ହୃଦବୋଧ ହୋଇଛି । ଏଣୁ ଏହି ବ୍ୟକ୍ତି ମାନଙ୍କୁ ବିଦେଶ ଯିବା ଉପରେ କଟକଣା ଲଗାଯିବାକୁ ଯୋଜନା କରୁଛନ୍ତି ସରକାର । ପ୍ରଥମ ବିଜୟ ମାଲ୍ୟା ଓ ଏବର୍ଷ ନିରବ ମୋଦି ହଜାର ହଜାର କୋଟି ଟଙ୍କା ହଡ଼ପ କରି ବିଦେଶ ପଳାଇଯିବା ପରେ ସରକାର ସତର୍କ ହୋଇଉଠିଛନ୍ତି ।