୪ କନଷ୍ଟେବଳଙ୍କୁ ୭ ଦିନ ବାସନକୁସନ ସଫା କରିବା-ଜୋତା ପଲିସ୍ କରିବା ଦଣ୍ଡାଦେଶ

ରାୟପୁର : ଜଣେ ଶିଖ ଡ୍ରାଇଭରଙ୍କ ପଗଡି କାଢ଼ି ତାଙ୍କୁ ଆକ୍ରମଣ କରିଥିବାରୁ ପୁଲିସ୍ ବିଭାଗ ଶିଖ୍ ସମ୍ପ୍ରଦାୟକୁ କ୍ଷମା ମାଗିଛି। ଶିଖ୍ ସମ୍ପ୍ରଦାୟ ଏହି ଚାରିଜଣ କନଷ୍ଟେବଳଙ୍କୁ ଗୁରୁଦ୍ୱାରାରେ ସାତ ଦିନ ସେବା କରିବା ଦଣ୍ଡାଦେଶରେ ଦଣ୍ଡିତ କରିଛନ୍ତି। ଜୁନ୍ ୮ ରେ ଶିଖ ଡ୍ରାଇଭର ବାହାଦୂର ସିଂଙ୍କ କେଶ ଟାଣିବା ସହ ଚାରିଜଣ କନଷ୍ଟେବଳ ମାଡ଼ ମାରିଥିଲେ।

ଘଟଣାର ସିସିଟିଭି ଫୁଟେଜ ମଧ୍ୟ ପ୍ରକାଶ ପାଇଥିଲା। ଏହି ଘଟଣା ପରେ ଶିଖ୍ ସମ୍ପ୍ରଦାୟ ଏହାକୁ ନିନ୍ଦା କରିଥିଲେ। ଗୃହମନ୍ତ୍ରୀ ଏବଂ ଏସଏସପିଙ୍କୁ ମଧ୍ୟ ଅଭିଯୋଗ କରାଯାଇଥିଲା। ଅଭିଯୋଗ ପରେ ଏସଏସପି କନଷ୍ଟେବଳ ଚନ୍ଦ୍ରଭ‌େନ୍ ସିଂ ଭଦୋରିଆ, ସୁରେନ୍ଦ୍ର ସିଂ ସେଙ୍ଗର, ରବିନ୍ଦ୍ର ସିଂ ରାଜପୁତ ଏବଂ ଦାନେଶ୍ୱର ସାହୁଙ୍କୁ ନିଲମ୍ବିତ କରାଯାଇଥିଲା।

ଶିଖ୍ ଯୁବକଙ୍କ ପଗଡି ଟାଣିବା ସହ କେଶ ଟାଣିବା ଘଟଣାରେ ଜୁନ୍ ୮ ରେ ରାୟପୁରର ଟିକରାପରା ପୁଲିସ୍ ଷ୍ଟେସନ ଅନ୍ତର୍ଗତ ଆନ୍ତଃରାଜ୍ୟ ବସଷ୍ଟାଣ୍ଡରେ ପୀଡିତ ଯୁବକ ଜଣକ ଶିଖ୍ ସମ୍ପ୍ରଦାୟ ବିରୋଧରେ ଅଭିଯୁକ୍ତମାନେ ଧାର୍ମିକ ଅପମାନ କରିଥିବା ବିଷୟରେ ଅବଗତ କରାଇଥିଲେ।

ଏହି ଘଟଣାର ସିସିଟିଭି ଫୁଟେଜରେ କନଷ୍ଟେବଳମାନଙ୍କ ଦ୍ବାରାକରାଯାଇଥିବା ଅସଦାଚରଣକୁ ଦେଖି ସମାଜ ଏହାକୁ ନିନ୍ଦା କରି ବରିଷ୍ଠ ପୋଲିସ ଅଧୀକ୍ଷକଙ୍କ ନିକଟରେ ଏକ ସ୍ମାରକପତ୍ର ଦାଖଲ କରିଥିଲା। ଧାରା ୨୯୫-ଏ ଅନୁଯାୟୀ କନଷ୍ଟେବଳଙ୍କ ବିରୋଧରେ ଏକ ମାମଲା ପଞ୍ଜିକୃତ ହୋଇଥିଲା ଏବଂ କାର୍ଯ୍ୟାନୁଷ୍ଠାନ ଦାବି କରାଯାଇଥିଲା।

ଶିଖ୍ ସମ୍ପ୍ରଦାୟର ଅଭିଯୋଗ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ବରିଷ୍ଠ ପୋଲିସ ଅଧୀକ୍ଷକ ସନ୍ତୋଷ କୁମାର ସିଂ କନଷ୍ଟେବଳଙ୍କୁ ନିଲମ୍ବିତ କରିଥିଲେ। କିନ୍ତୁ ଶିଖ୍ ସମ୍ପ୍ରଦାୟ ଏହି କାର୍ଯ୍ୟରେ ସନ୍ତୁଷ୍ଟ ନ ଥିଲେ। ଯୁବକଙ୍କୁ ଆକ୍ରମଣ କରିଥିବା କନେଷ୍ଟବଳମାନେ ତେଲିବନ୍ଧାସ୍ଥିତ ଗୁରୁଦ୍ୱାରାରେ ଶ୍ରୀ ଗୁରୁ ଗ୍ରନ୍ଥ ସାହେବଙ୍କ ଆଗରେ ପ୍ରଣାମ କରି ସେମାନଙ୍କ ଭୁଲ ପାଇଁ ଶିଖ୍ ସମ୍ପ୍ରଦାୟକୁ କ୍ଷମା ମାଗିଥିଲେ।

ଷ୍ଟେସନ୍ ରୋଡ୍ ଗୁରୁଦ୍ୱାରାର ଅଧ୍ୟକ୍ଷ ସୁରେନ୍ଦ୍ର ସିଂ ଛାବ୍ରା କନଷ୍ଟେବଳଙ୍କ ଅଭିଯୋଗକୁ ଗୁରୁତର କହିଥିଲେ। ଶିଖ୍ ସମାଜ ସେମାନଙ୍କୁ କ୍ଷମା କରିବ ନାହିଁ ବ‌ୋଲି କହି କନଷ୍ଟେବଳଙ୍କୁ ୭ ଦିନ ପାଇଁ ଗୁରୁଦ୍ୱାରାକୁ ଆସୁଥିବା ଶ୍ରଦ୍ଧାଳୁଙ୍କ ଜୋତାକୁ ସଫା କରିବା ଏବଂ ଲଙ୍ଗରରେ ଖାଇଥିବା ଲୋକଙ୍କ ବାସନକୁସନ ସଫା କରିବା ପାଇଁ ଦଣ୍ଡାଦେଶ ସ୍ଥିର କରିଛନ୍ତି। ଏବେ ଦୋଷୀ କନଷ୍ଟେବଳମାନେ ଗୁରୁଦ୍ବାରାରେ ୭ ଦିନ ବାସନକୁସନ ସଫା କରିବା ସହିତ ଜୋତା ପଲିସ୍ କରିବେ।

ସମ୍ବନ୍ଧିତ ଖବର