ଔରଙ୍ଗାବାଦ ଜିଲ୍ଲାରେ ବିଷ ପିଇଦେଲେ ୪ ସାଙ୍ଗ, ୨ ମୃତ

ଔରଙ୍ଗାବାଦ: ରବିବାର ସନ୍ଧ୍ୟାରେ ଔରଙ୍ଗାବାଦ ଜିଲ୍ଲାରେ ଦୁଇ ଭଉଣୀଙ୍କ ସମେତ ୧୮ରୁ ୨୦ ବର୍ଷ ବୟସର ୪ ଝିଅ ବିଷାକ୍ତ ପଦାର୍ଥ ଖାଇଛନ୍ତି। ସେମାନଙ୍କ ମଧ୍ୟରୁ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇଜଣ ଗୟାର ଏକ ଡାକ୍ତରଖାନାରେ ଜୀବନ ସହ ସଂଗ୍ରାମ କରୁଛନ୍ତି। ଦୁଇ ଭଉଣୀ ପ୍ରଥମେ ବିଷ ପିଇଥିଲେ ଏବଂ ସେମାନଙ୍କ ସାଙ୍ଗମାନେ ଏହା ଜାଣିବା ପରେ ବିଷ ପିଇଥିଲେ ବୋଲି ପୁଲିସ କହିଛି। କୌଣସି କଥାକୁ ନେଇ ଦୁଇ ଭଉଣୀ ଅସନ୍ତୁଷ୍ଟ ହୋଇ ଘରେ ବିଷ ଖାଇଥିଲେ।

ଖବର ପାଇ ତାଙ୍କ ଦୁଇ ସାଙ୍ଗ ତା’ର ଅନୁସରଣ କରିଥିଲେ। ୪ ଝିଅଙ୍କ ଅବସ୍ଥା ସଙ୍କଟାପନ୍ନ ହେବାରୁ ପରିବାର ଲୋକେ ସେମାନଙ୍କୁ ଔରଙ୍ଗାବାଦ ସଦର ଡାକ୍ତରଖାନାରେ ଭର୍ତ୍ତି କରିଥିଲେ। ପରେ ଚାରିଜଣଙ୍କୁ ଗୟାସ୍ଥିତ ଅନୁଗ୍ରହ ନାରାୟଣ ମଗଧ ମେଡିକାଲ କଲେଜ ଓ ହସ୍ପିଟାଲ (ଏଏନ୍ଏମ୍ଏମ୍‌ସିଏଚ୍)କୁ ନେବା ବାଟରେ ଦୁଇ ଭଉଣୀଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଥିବା ବେଳେ ସୋମବାର ସେହି ହସ୍ପିଟାଲରେ ତାଙ୍କର ଜଣେ ବନ୍ଧୁଙ୍କ ମୃତ୍ୟୁ ଘଟିଛି। ଔରଙ୍ଗାବାଦ ସବ୍‌ଡିଭିଜନାଲ ପୁଲିସ ଅଧିକାରୀ ମହମ୍ମଦ ଅମାନୁଲ୍ଲା ଖାନ କହିଛନ୍ତି ଯେ ଝିଅମାନଙ୍କ ପରିବାର ସଦସ୍ୟଙ୍କୁ ପଚରାଉଚରା କରାଯାଉଛି। ସେମାନଙ୍କ ଏପରି କାର୍ଯ୍ୟ ପଛର କାରଣ ଜଣାପଡ଼ି ନାହିଁ।