୨୦୧୪ ବର୍ଦ୍ଧମାନ ବୋମା ବିସ୍ଫୋରଣ ଘଟଣାରେ ୪ ବାଂଲାଦେଶୀ ଆତଙ୍କବାଦୀଙ୍କୁ ଦୋଷୀ ସାବ୍ୟସ୍ତ
କୋଲକତା : ପଶ୍ଚିମବଙ୍ଗର ବର୍ଦ୍ଧମାନ ଜିଲ୍ଲାରେ ୨୦୧୪ରେ ହୋଇଥିବା ବୋମା ବିସ୍ଫୋରଣରେ ୪ ଜଣ ଜମାଏତ-ଉଲ-ମୁଜାହିଦ୍ଦିନ ବାଂଲାଦେଶ (ଜେଏମବି) ସଦସ୍ୟଙ୍କୁ ଦୋଷୀ ସାବ୍ୟସ୍ତ କରିଛନ୍ତି ଏକ ଏନଆଇଏ ସ୍ୱତନ୍ତ୍ର କୋର୍ଟ । ଏହି ୪ ଆତଙ୍କବାଦୀ ଜିଆଉଲ ହକ, ମୋତିଉର ରେହମାନ,ମହମ୍ମଦ ୟୁସୁଫ ଓ ଜାହିରୁଲ ଶେଖକୁ ଦୋଷୀ ସାବ୍ୟସ୍ତ କରିବା ସହ ୭ ବର୍ଷ ଲେଖାଏଁ ଜେଲ ଦଣ୍ଡ ଶୁଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
୨୦୧୪, ଅକ୍ଟୋବର ୨ରେ ବର୍ଦ୍ଧମାନର ଖଗ୍ରାଗଡ଼ ଟାଉନରେ ଥିବା ଏକ ଭଡ଼ାଘରର ପ୍ରଥମ ମହଲାରେ ଏହି ଶକ୍ତିଶାଳୀ ଆଇଇଡି ବିସ୍ଫୋରଣ ହୋଇଥିଲା । ଏହି ବିସ୍ଫୋରଣରେ ଦୁଇଜଣ ବ୍ୟକ୍ତି ପ୍ରାଣ ହରାଇଥିବାବେଳେ ଆଉ ଜଣେ ବ୍ୟକ୍ତି ଗୁରୁତର ଆହତ ହୋଇଥିଲା । ଏ ସମସ୍ତ ବ୍ୟକ୍ତି ଜେଏମବି ଆତଙ୍କବାଦୀ ଥିଲେ ବୋଲି ଏନଆଇଏ ତଦନ୍ତରୁ ଜଣାପଡ଼ିଥିଲା । ଏହି ବ୍ୟକ୍ତିମାନେ ବର୍ଦ୍ଧମାନରେ ବୋମା ବିସ୍ଫୋରଣ କରିବାକୁ ଆଇଇଡି ପ୍ରସ୍ତୁତ କରୁଥିବାବେଳେ ଦୁର୍ଘଟଣାବଶତଃ ତାହା ବିସ୍ଫାରିତ ହୋଇଥିଲା ।
ଏହି ଷଡ଼ଯନ୍ତ୍ରରେ ସଂପୃକ୍ତ ଥିବା ଜିଆ-ଉଲ ରେହମାନ ୨୦୧୪ରେ ଗିରଫ ହୋଇଥିଲା । ତାକୁ ଜେରା ପରେ ମିଳିଥିବା ସୂଚନା ଆଧାରରେ ଅନ୍ୟମାନଙ୍କୁ ଗିରଫ କରାଯାଇଥିଲା ।
ପ୍ରଥମେ ପଶ୍ଚିମ ବଙ୍ଗ ପୁଲିସ ଏହି ଘଟଣାର ତଦନ୍ତ କରୁଥିବାବେଳେ ଆତଙ୍କବାଦୀ ଲିଙ୍କ ବାହାରିବାରୁ ପରେ ଏହାର ତଦନ୍ତ ଭାର ଏନଆଇଏ ହାତକୁ ଯାଇଥିଲା । ଏନଆଇଏ ପକ୍ଷରୁ କୁହାଯାଇଛି ଭାରତରେ ନିଜର ସଦସ୍ୟ ସଂଖ୍ୟା ବଢାଇ ଆତଙ୍କବାଦୀ କାର୍ଯ୍ୟକଳାପ ବଢାଇବାକୁ ଉଦ୍ୟମ କରୁଥିଲା ଜେଏମବି ।