ସମୁଦ୍ର କୂଳରେ ପିକନିକ କରୁଥିବାବେଳେ ଢେଉରେ ଭାସିଗଲେ ଗୋଟିଏ ପରିବାରର ୪ ସଦସ୍ୟ

ଅହମ୍ମଦାବାଦ: ଆଜି ଗୁଜୁରାଟର ଦାଣ୍ଡି ବେଳାଭୂମିରୁ ୪ ଜଣଙ୍କ ମୃତଦେହ ଉଦ୍ଧାର କରାଯାଇଛି | ବାସ୍ତବରେ ଗତକାଲି ପିକନିକ୍ କରୁଥିବା ସମୟରେ ଜଣେ ମହିଳା, ତାଙ୍କ ଦୁଇ ପୁଅ ଏବଂ ଭାଣେଜୀ ସମୁଦ୍ରରେ ଭାସିଯାଇଥିଲେ | ଆଉ ଆଜି ସେମାନଙ୍କର ମୃତଦେହ ଉଦ୍ଧାର କରାଯାଇଛି | ମିଳିଥିବା ସୂଚନା ମୁତାବକ ଗତକାଲି ଗୋଟିଏ ପରିବାରର କିଛି ସଦସ୍ୟ ପିକନିକ୍ ପାଇଁ ଦାଣ୍ଡି ବେଳାଭୂମିକୁ ଯାଇଥିଲେ | ସେମାନଙ୍କ ମଧ୍ୟରୁ ୭ ଜଣ ସମୁଦ୍ରରେ ଗାଧୋଉଥିଲେ | ତେବେ ଉଚ୍ଚ ଜୁଆରରେ ୭ ଜଣ ଭାସିଯାଇଥିଲେ | ଏନେଇ ସୂଚନା ପାଇବା ପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା। ପରିବାରର ତିନିଜଣ ସଦସ୍ୟଙ୍କୁ ଠିକ୍ ସମୟରେ ଉଦ୍ଧାର କରାଯାଇଥିଲା, କିନ୍ତୁ ସୁଶୀଲା ଗୋପାଳସିଂହ ରାଜପୁତ (୪୨), ତାଙ୍କ ପୁଅ ଦକ୍ଷ (୧୧) ଏବଂ ଯୁବରାଜ (୧୭) ଏବଂ ଭଉଣୀଙ୍କ ଝିଅ ଦୁର୍ଗା (୧୭) ସମୁଦ୍ରରେ ନିଖୋଜ ହୋଇଯାଇଥିଲେ।

ଏହାପରେ ଜିଲ୍ଲା କର୍ତ୍ତୃପକ୍ଷ, ଅଗ୍ନିଶମ ବାହିନୀ ଏବଂ ସ୍ଥାନୀୟ ପୋଲିସ ସର୍ଚ୍ଚ ଓ ଉଦ୍ଧାର କାର୍ଯ୍ୟ କରିଥିଲେ। ତେବେ ଆଜି ସକାଳେ ଦାଣ୍ଡି ଏବଂ ଅଞ୍ଜଲ ମଧ୍ୟରେ ଥିବା ବେଳାଭୂମିରୁ ମୃତ ମହିଳା ସୁଶୀଲା ଗୋପାଳ ସିଂ ରାଜପୁତ ଏବଂ ପୁଅ ଦକ୍ଷଙ୍କ ମୃତଦେହ ମିଳିଥିଲା। ଅନ୍ୟପଟେ ଯୁବରାଜ ଏବଂ ଦୁର୍ଗାଙ୍କ ମୃତଦେହ ଭାନସି-ବୋର୍ସି ବେଳାଭୂମିରୁ ଉଦ୍ଧାର କରାଯାଇଥିଲା | ପୁଲିସର ସୂଚନା ମୁତାବକ ମୃତକମାନେ ମୁଖ୍ୟତଃ ରାଜସ୍ଥାନର ଭିଲୱାରା ସହରର ବାସିନ୍ଦା ଥିଲେ | କିନ୍ତୁ କିଛିଦିନ ହେଲା ନାଭସାରୀ ଜିଲ୍ଲାର ଖଡସୁପା ଗ୍ରାମରେ ରହୁଥିଲେ। ଏନେଇ ସ୍ଥାନୀୟ ଉପଜିଲ୍ଲାପାଳ କହିଛନ୍ତି ଯେ ତିନିଜଣ ସଦସ୍ୟଙ୍କୁ ଉଦ୍ଧାର କରାଯାଇଥିଲା, କିନ୍ତୁ ଅନ୍ୟ ଚାରିଜଣଙ୍କୁ ଉଦ୍ଧାର କରାଯାଇ ପାରିନଥିଲା |