ଲଣ୍ଡନ: ବ୍ରିଟେନ୍‌ର ରାସ୍ତାରେ ୪୦୦ରୁ ଅଧିକ ଲୋକ ମୁକ୍ତ ଭାବରେ ବୁଲୁଛନ୍ତି।  ସେମାନେ ଇସଲାମିକ୍ ଷ୍ଟେଟ୍ (ଆଇଏସଆଇଏସ) ପାଇଁ ଲଢ଼ି ସାରିଛନ୍ତି। ସେମାନେ ସେହି ଲୋକ ଯେଉଁମାନେ ଥରେ ସିରିଆ ଏବଂ ଇରାକ ଯାଇ ଆତଙ୍କବାଦୀ ସଂଗଠନର ଅଂଶ ହୋଇଥିଲେ। ଏବେ ବ୍ରିଟିଶ ସଂସଦରେ ଏକ ରିପୋର୍ଟ ସ୍ପଷ୍ଟ ଭାବରେ କହୁଛି ଯେ, ସେମାନଙ୍କ ମଧ୍ୟରୁ କାହାକୁ ମଧ୍ୟ ସେମାନଙ୍କ ଅପରାଧ ପାଇଁ ଦଣ୍ଡ ଦିଆଯାଇ ନାହିଁ। 

Advertisment

ସଂସଦର ମାନବାଧିକାର ସମ୍ପର୍କିତ ମିଳିତ କମିଟି (ଜେସିଏଚଆର)ର ରିପୋର୍ଟରେ କୁହାଯାଇଛି ଯେ ଏହି ୪୦୦  ଲୋକଙ୍କ ମଧ୍ୟରୁ ଅନେକ ସିରିଆ ଏବଂ ଇରାକରେ ନରସଂହାର, ଆତଙ୍କବାଦୀ ଆକ୍ରମଣ ଏବଂ ଧାର୍ମିକ ସଂଖ୍ୟାଲଘୁଙ୍କ ଉପରେ ନିର୍ଯାତନା ଭଳି ଅପରାଧ କରିଛନ୍ତି। ଏହା ସତ୍ତ୍ୱେ, ବ୍ରିଟେନ୍ ଫେରିବା ପରେ ତାଙ୍କୁ ଦଣ୍ଡ ଦିଆଯାଇ ନଥିଲା। କମିଟି କହିଛି ଯେ, ଏହି ଲୋକମାନେ ଏବେ ଦେଶ ଭିତରେ  ଚଳପ୍ରଚଳ ହେଉଥିବା  ବୋମା ପାଲଟିଛନ୍ତି। ଏହି ପରିସ୍ଥିତି ସେମାନେ କେବଳ ଆଇନ ଶୃଙ୍ଖଳା ପାଇଁ ବିପଦ ନୁହେଁ ବରଂ ଅନ୍ତର୍ଜାତୀୟ ନ୍ୟାୟ ପ୍ରତି ସମସ୍ୟା ପାଲଟିଛନ୍ତି।

ସରକାର ଏପର୍ଯ୍ୟନ୍ତ କହିଛନ୍ତି ଯେ,  ଘଟିଥିବା ଏହି ଘଟଣାଗୁଡ଼ିକ ବିଚାର କରାଯିବ। ସ୍ଥାନୀୟ ଆଇନ ଅନୁଯାୟୀ ଏହି ଅପରାଧଗୁଡ଼ିକର ତଦନ୍ତ  କରାଯାଇ  ଦଣ୍ଡ ଦିଆଯିବା ଉଚିତ୍। କିନ୍ତୁ ସଂସଦୀୟ କମିଟି ସ୍ପଷ୍ଟ କରିଛି ଯେ, ସିରିଆ ଏବଂ ଇରାକରେ ଏପରି ମାମଲାରେ ତଦନ୍ତ ଏବଂ ଦଣ୍ଡର କୌଣସି ଗ୍ୟାରେଣ୍ଟି ନାହିଁ। ଜେସିଏଚଆର ରିପୋର୍ଟରେ ଦାବି କରାଯାଇଛି ଯେ, ଯଦି ବ୍ରିଟେନ୍‌ର ଏହି ଅପରାଧ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାର କ୍ଷମତା ଅଛି, ତେବେ  ଏହାକୁ ବ୍ୟବହାର କରିବା ଉଚିତ୍। ଏଥିପାଇଁ ସଂସଦରେ ଉପସ୍ଥାପିତ 'କ୍ରାଇମ୍ ଆଣ୍ଡ୍ ପୁଲିସିଂ ବିଲ୍'ରେ ମଧ୍ୟ ପରିବର୍ତ୍ତନ ସୁପାରିଶ କରାଯାଇଛି, ଯାହା ଦ୍ଵାରା ଅଣ-ବ୍ରିଟିଶ ଲୋକଙ୍କ ବିରୁଦ୍ଧରେ ମଧ୍ୟ ମାମଲା ରୁଜୁ କରାଯାଇପାରିବ।

ଅଧିକ ପଢ଼ନ୍ତୁ: ଇମ୍ରାନ ଖାନଙ୍କ ଦୁଇ ପଦକ୍ଷେପ: ପାକିସ୍ତାନ ରାଜନୀତିରେ ଭୂକମ୍ପ

ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, ପୁଲିସ ଏବଂ କ୍ରାଉନ୍ ପ୍ରସିକ୍ୟୁସନ୍ ସର୍ଭିସ୍ ମଧ୍ୟରେ ସମନ୍ୱୟର ଅଭାବ ରହିଛି। ଯେଉଁ କାରଣରୁ ଆବଶ୍ୟକୀୟ ପ୍ରମାଣ ସଠିକ୍ ସମୟରେ ସଂଗ୍ରହ ହୋଇପାରୁନାହିଁ ଏବଂ ଅଭିଯୁକ୍ତମାନେ ଖସି ଯାଉଛନ୍ତି। କମିଟିର ଅଧ୍ୟକ୍ଷ ଲର୍ଡ ଏଲଟନ୍ କହିଛନ୍ତି, ଅପରାଧ ବିଦେଶରେ ଘଟିଥିବା କହି ମାମଲାକୁ ଖାରଜ କରାଯାଇପାରିବ ନାହିଁ। ଆମେ ଜାଣୁ ଯେ, ବ୍ରିଟିଶ ନାଗରିକମାନେ ଆଇଏସଆଇଏସରେ ସେବା କରିବା ସମୟରେ ଭୟଙ୍କର ଅପରାଧ କରିଛନ୍ତି। ଏବେ ସେମାନଙ୍କୁ ଦଣ୍ଡ ଦେବା ଆମର ଦାୟିତ୍ୱ।

ରିପୋର୍ଟରେ ଆଉ ଏକ ଗୁରୁତ୍ୱପୂର୍ଣ୍ଣ ଦିଗ ଉଠାଯାଇଛି।ଏବଂ ତାହା ହେଉଛି ସିରିଆର ଶିବିରରେ ଫସି ରହିଥିବା ବ୍ରିଟିଶ ପିଲାମାନଙ୍କର ପ୍ରତ୍ୟାବର୍ତ୍ତନ। କମିଟି କହିଛି ଯେ, ଏହି ପିଲାମାନଙ୍କୁ ଖରାପ ପରିସ୍ଥିତିରେ ରହିବାକୁ ବାଧ୍ୟ କରାଯାଉଛି ଏବଂ ଯଦି ସେମାନଙ୍କୁ ସମୟ ମଧ୍ୟରେ ଫେରାଇ ଅଣା ନଯାଏ, ତେବେ ସେମାନେ ଭବିଷ୍ୟତରେ ମୌଳବାଦର ପଥ ଗ୍ରହଣ କରିବାର ଯଥେଷ୍ଟ ଆଶଙ୍କା ରହିଛି।

ଅଧିକ ପଢ଼ନ୍ତୁ: ଶତ୍ରୁ ଦେଶରୁ ସ୍ବାମୀ ଫେରିବା ପରେ ଖୁସିରେ ଆତ୍ମହରା ହେଲେ ସ୍ତ୍ରୀ: କହିଲେ, ମୋ ‘ସିନ୍ଦୂର’କୁ ଫେରାଇ ଆଣିଲେ ମୋଦୀ, ଯେଉଁଠି ମୋଦୀ ଥିବେ ସେଠି ସବୁ ସମ୍ଭବ...

 britain | ISIS | JCHR