ଗତ ୨୪ ଘଣ୍ଟାରେ ୪୨୧୩ଟି ନୂଆ କରୋନା ସଂକ୍ରମଣ ମାମଲା, ଦେଶରେ ଗୋଷ୍ଠୀ ସଂକ୍ରମଣ ହୋଇନି : ଲବ ଅଗ୍ରଓ୍ୱାଲ
ନୂଆଦିଲ୍ଲୀ : ଗତ ୨୪ ଘଣ୍ଟାରେ ଦେଶରେ ୧୫୫୯ ଜଣ କରୋନା ରୋଗୀ ଆରୋଗ୍ୟ ହୋଇଛନ୍ତି । ଏହା ଫଳରେ ଦେଶର ମୋଟ ଆରୋଗ୍ୟ ସଂଖ୍ୟା ୨୦୯୧୭ ଓ ଆରୋଗ୍ୟ ହାର ୩୧.୧୫ ପ୍ରତିଶତ ରହିଛି । ଗତ ୨୪ ଘଣ୍ଟାରେ ଦେଶରେ ମୋଟ ୪୨୧୩ଟି ନୂଆ ସଂକ୍ରମଣ ମାମଲା ଦେଖାଦେଇଛି, ଏହାକୁ ମିଶାଇ ମୋଟ ସଂକ୍ରମିତ ସଂଖ୍ୟା ୬୭୧୫୨ରେ ପହଞ୍ଚିଛି ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରଓ୍ୱାଲ କହିଛନ୍ତି । ତେବେ ଦେଶରେ ଗୋଷ୍ଠୀ ସଂକ୍ରମଣ ହୋଇନଥିବା ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାର କରୋନା ରୋଗୀଙ୍କ ଡିସଚାର୍ଜ ପଲିସୀ ବା ଡାକ୍ତରଖାନାରୁ ଛାଡ଼ ନୀତିରେ ଆଣିଥିବା ସଂଶୋଧନ ସଂପର୍କରେ ସେ କହିଛନ୍ତି ଯେ ବିଶ୍ୱର ଅନ୍ୟ ଦେଶମାନେ ମଧ୍ୟ ନିଜର ଡିସଚାର୍ଜ ପଲିସୀରେ ପରିବର୍ତ୍ତନ ଆଣିଛନ୍ତି । ପୂର୍ବରୁ ଏହା ପରୀକ୍ଷା-ଭିତ୍ତିକ ଥିବାବେଳେ ଏବେ ତାହା ଲକ୍ଷଣ ବା ସମୟ ଭିତ୍ତିକ ହୋଇଛି । ଏପରି ନୀତି ଭାରତ ସରକାର ମଧ୍ୟ ଗ୍ରହଣ କରିଛନ୍ତି ।
ଏହି ଅବସରରେ କେନ୍ଦ୍ର ଗୃହ ମନ୍ତ୍ରାଳୟର ଯୁଗ୍ମ ସଚିବ ପୁଣ୍ୟା ସଲିଳା ଶ୍ରୀବାସ୍ତବ କହିଛନ୍ତି ଯେ ବନ୍ଦେ ଭାରତ ମିଶନ ଅଧିନରେ ଏପର୍ଯ୍ୟନ୍ତ ପ୍ରାୟ ୪ ହଜାର ଭାରତୀୟଙ୍କୁ ୨୩ଟି ଫ୍ଲାଇଟ ମାଧ୍ୟମରେ ଭାରତ ଫେରାଇ ଅଣାଯାଇଛି । ସେହିପରି ଦେଶର ବିଭିନ୍ନ ସ୍ଥାନରେ ଫସିରହିଥିବା ପ୍ରାୟ ୫ ଲକ୍ଷ ପ୍ରବାସୀ ଶ୍ରମିକ, କର୍ମଜୀବିଙ୍କୁ ୪୬୮ଟି ସ୍ୱତନ୍ତ୍ର ଟ୍ରେନରେ ନିଜ ନିଜ ଗୃହରାଜ୍ୟକୁ ପଠାଇଦିଆଯାଇଛି । ଗତକାଲି ପ୍ରାୟ ୧୦୧ଟି ସ୍ୱତନ୍ତ୍ର ଟ୍ରେନ ଚାଲିଥିଲା ।