ବାର୍ଷିକ ସମାରୋହରେ କରୋନା ନିୟମ ପାଳନ ନକରାଯିବାରୁ ୪୩ଜଣ ଛାତ୍ର ହେଲେ କରୋନା ଆକ୍ରାନ୍ତ

ନୂଆଦିଲ୍ଲୀ: କରୋନାର ଓମିକ୍ରନ ଭାରିଆଣ୍ଟକୁ ନେଇ ସାରା ଦେଶ ଚିନ୍ତାରେ ଥିବା ବେଳେ ତେଲେଙ୍ଗାନାର ଏକ ମେଡିକାଲ କଲେଜରୁ ୪୩ ଜଣ ଛାତ୍ର କରୋନା ସଂକ୍ରମିତ ଚିହ୍ନଟ ହେବା ପୁଣି ଚିନ୍ତା ବଢାଇଛି । ତେଲେଙ୍ଗାନାର କରିମ ନଗର ଜିଲ୍ଲାରେ ଥିବା ଚଲମେଦା ରାଓ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନସ କଲେଜରେ ୪୩ ଜଣ ଛାତ୍ର କରୋନା ସଂକ୍ରମିତ ହୋଇଛନ୍ତି ।

ଏହାପରେ କଲେଜ ପରିଚାଳନା ପକ୍ଷରୁ ପାଠପଢ଼ା ବନ୍ଦ କରାଯିବା ସହ କ୍ୟାମ୍ପସକୁ ୭ ଦିନ ପାଇଁ ବନ୍ଦ କରିଦିଆଯାଇଛି । ପାଖାପାଖି ଗୋଟିଏ ସପ୍ତାହ ପୂର୍ବରୁ କଲେଜରେ ବାର୍ଷିକ ଉତ୍ସବ ସମାରୋହ ପାଳିତ ହୋଇଥିଲା । ଏହି ବାର୍ଷିକ ଉତ୍ସବରୁ କରୋନା ସଂକ୍ରମଣ ବଢିଥିବା କଥା ଅନୁମାନ କରାଯାଉଛି । କରିମ ନଗର ଜିଲ୍ଲାର ସ୍ୱାସ୍ଥ୍ୟ ଅଧିକାରୀ ଡ. ଜୁବେରିଆ କହିଛନ୍ତି କି କଲେଜ ପକ୍ଷରୁ ବାର୍ଷିକ ଉତ୍ସବ ପାଳନ ନେଇ ପ୍ରଶାସନକୁ ସୂଚନା ଦିଆଯାଇ ନଥିଲା । ଏହାସହ ସମାରୋହରେ ଯୋଗଦେଇଥିବା ଲୋକମାନେ କୋଭିଡ ନିୟମ ପାଳନ କରିନଥିଲେ ।