୫୪ ଜଣଙ୍କୁ ମିଳିଲା ପଦ୍ମ ସମ୍ମାନ: ମୁଲାୟମଙ୍କ ସମେତ ୭ ଜଣଙ୍କୁ ମରଣୋତ୍ତର ପଦ୍ମ ପୁରସ୍କାର,ବିର୍ଲା ଗ୍ରହଣ କଲେ ପଦ୍ମଭୂଷଣ
ନୂଆଦିଲ୍ଲୀ: ବୁଧବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ୧୦୬ ଜଣ ପଦ୍ମ ପୁରସ୍କୃତଙ୍କ ମଧ୍ୟରୁ ୫୪ ଜଣଙ୍କୁ ପଦ୍ମ ପୁରସ୍କାରରେ ସମ୍ମାନିତ କରିଛନ୍ତି। ଗତ ଜାନୁଆରି ୨୬ରେ ଏହି ପୁରସ୍କାର ଘୋଷଣା କରାଯାଇଥିଲା। ପଦ୍ମବିଭୂଷଣ ପାଇଥିବା ୬ ଜଣ କୃତୀଙ୍କ ମଧ୍ୟରେ ଅଛନ୍ତି ଜାକିର ହୁସେନ (କଳା), ଏସ୍ଏମ୍ କ୍ରିଷ୍ଣା (ଜନ ବ୍ୟାପାର) ଓ ଶ୍ରୀନିବାସ ବର୍ଦ୍ଧନ (ବିଜ୍ଞାନ ଓ ଇଂଜିନିୟରିଂ)। ଅନ୍ୟ ତିନିଜଣ ହେଉଛନ୍ତି ବାଲକୃଷ୍ଣ ଦୋଶୀ (ସ୍ଥାପତ୍ୟ- ମରଣୋତ୍ତର), ଦିଲୀପ ମହାଲନବିସ (ଔଷଧ-ମରଣୋତ୍ତର) ଓ ମୁଲାୟମ ସିଂହ ଯାଦବ (ଜନ ବ୍ୟାପାର- ମରଣୋତ୍ତର)।
ପଦ୍ମଭୂଷଣ ପୁରସ୍କୃତଙ୍କ ମଧ୍ୟରେ ପ୍ରମୁଖ ହେଉଛନ୍ତି ଆଦିତ୍ୟ ବିର୍ଲା ଗ୍ରୁପ୍ର ଅଧ୍ୟକ୍ଷ କୁମାର ମଙ୍ଗଳମ୍ ବିର୍ଲା, ଯେ କି ବିର୍ଲା ପରିବାରର ପଦ୍ମ ପୁରସ୍କାର ପାଇଥିବା ଚତୁର୍ଥ ବ୍ୟକ୍ତି। ଲେଖିକା ସୁଧା ମୂର୍ତ୍ତିଙ୍କୁ ସମାଜସେବା ପାଇଁ ପଦ୍ମଭୂଷଣରେ ସମ୍ମାନିତ କରାଯାଇଥିଲା। କନ୍ନଡ଼ ଔପନ୍ୟାସିକା ଏସ୍ଏଲ୍ ବୀରାପ୍ପାଙ୍କୁ ସାହିତ୍ୟ, ଭାରତୀୟ ପ୍ରଚ୍ଛଦପଟ ଗାୟିକା ବାଣୀ ଜୟରାମଙ୍କୁ ସଂଗୀତ, ଭାଷାତତ୍ତ୍ବବିଦ୍ ତଥା ଜେଏନ୍ୟୁ କୁଳପତି କପିଲ କପୁରଙ୍କୁ ପଦ୍ମଭୂଷଣ ମିଳିଥିଲା। ପ୍ରଚ୍ଛଦପଟ ଗାୟିକା ସୁମନ କଲ୍ୟାଣପୁରଙ୍କୁ କଳା, ଦୀପକ ଧରଙ୍କୁ ବିଜ୍ଞାନ ଓ ଇଂଜିନିୟରିଂ, ସ୍ବାମୀ ଚିନ୍ନା ଜିୟରଙ୍କୁ ଆଧ୍ୟାତ୍ମିକତା ଏବଂ କମଳେଶ ଡି ପଟେଲଙ୍କୁ ଆଧ୍ୟାତ୍ମିକତା ପାଇଁ ପଦ୍ମଭୂଷଣ ପୁରସ୍କାର ପ୍ରଦାନ କରାଯାଇଥିଲା।