ଲୁଗା ସଫା କରୁକରୁ ଖସିଗଲା ଗୋଡ଼, ଉଛୁଳା ନଈରେ ୧୦ କିଲୋମିଟର ଭାସିଗଲେ ବୃଦ୍ଧ

ବେଙ୍ଗାଲୁରୁ: ପାଣି ପାଟିରୁ ବଞ୍ଚିଗଲା ଜୀବନ । ନଈର ପ୍ରଖର ସୁଅରୁ ଫେରିଲା ଜୀବନ । ଜଳର ଆଁ ଭିତରୁ ପ୍ରାୟ ୧୦ କିଲୋମିଟର ସଂଘର୍ଷ କରି ଶେଷରେ ଜୀବନ ବଞ୍ଚାଇ ଫେରିଲେ ୬୦ ବର୍ଷର ବ୍ୟକ୍ତି । ଏଭଳି ଏକ ଘଟଣା ଆସିଛି କର୍ଣ୍ଣାଟକ ହାଭେରୀ ଜିଲ୍ଲାରୁ ।

କୁମାରାପାଟନମ ଆୟପ୍ପା ସ୍ବାମୀ ମନ୍ଦିର ନିକଟରେ ବହି ଯାଇଥିବା ତୁଙ୍ଗଭଦ୍ରା ନଦୀ ନିକଟରେ ୬୦ ବର୍ଷୀୟ ଜୟାନ୍ନା ଲୁଗା ସଫା କରୁଥିବା ବେଳେ ହଠାତ୍ ତାଙ୍କ ଗୋଡ ଖସିଯାଇଥିଲା । ପାଣିରେ ପଡିଯିବା ପରେ ସେ ଭିତରକୁ ଭିତରକୁ ଭାସି ଯାଉଥିଲେ । ପହଁରି ପହଁରି କୂଳକୁ ଫେରିବାକୁ ଯେତେ ଚେଷ୍ଟା କରୁଥିଲେ ବି ଫେରି ପାରୁନଥିଲେ । ନଦୀରେ ସ୍ରୋତ ଏତେ ପ୍ରଖର ଥିଲା ଏବଂ ପାଣିରେ କରେଣ୍ଟର ମାତ୍ରା ଏତେ ଥିଲା ଯେ ତାଙ୍କୁ ଭିତରକୁ ଭିରତକୁ ଚାଣି ନେଉଥିଲା । ତାଙ୍କୁ ପାଣି ୧୦ କିଲୋମିଟର ଯାଏଁ ଟାଣି ନେଇଥିଲା । ଆଉ ସେ ଦୂର ଗାଁରେ ଯାଇ ଲାଗିଥିଲେ । 

ନଈରେ ପହଁରି ପହଁରି ଥକି ଯିବା ପରେ ସେ ନଈରେ ବଞ୍ଚାଅ ବଞ୍ଚାଅ ବୋଲି ଚିତ୍କାର କରିଥିଲେ । ଯାହାକୁ ଶୁଣି ସ୍ଥାନୀୟ ଲୋକେ ଏକ ମାଛଧରା ଡଙ୍ଗା ଜରିଆରେ ତାଙ୍କୁ ଉଦ୍ଧାର କରିଥିଲେ ଏବଂ ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ ।