ବିଧାନସଭା ନିର୍ବାଚନ ପୂର୍ବରୁ ଏହି ୭ ନେତାଙ୍କୁ ଦଳରୁ ନିଲମ୍ବନ କଲା ବିଜେପି
ଅହମ୍ମଦାବାଦ: ଗୁଜୁରାଟରେ ବିଧାନସଭା ନିର୍ବାଚନକୁ ନେଇ ଏବେ ବିଜେପି, କଂଗ୍ରେସ ଓ ଆମ ଆଦମୀ ପାର୍ଟି ମଧ୍ୟରେ ରାଜନୀତି ତୀବ୍ର ହୋଇଛି | ଏହା ସହ ଏବେ ଦଳ ଡିଆଁ ପର୍ବ ମଧ୍ୟ ଜାରି ରହିଛି | ତେବେ ୨୭ ବର୍ଷ ଧରି ରାଜ୍ୟରେ କ୍ଷମତାରେ ଥିବା ବିଜେପିର ପ୍ରଦର୍ଶନ ଉପରେ ସମସ୍ତଙ୍କ ନଜର ରହିଛି। ବିଜେପି ପୁଣି ଥରେ ନିର୍ବାଚନରେ ଜିତିବାକୁ ପ୍ରୟାସ ଆରମ୍ଭ କରିଥିବାବେଳେ ଏବେ କିନ୍ତୁ ବିଦ୍ରୋହୀ ନେତାମାନେ ଖେଳ ବିଗାଡିବାକୁ ଚେଷ୍ଟା କରୁଛନ୍ତି। ତେବେ ବିଦ୍ରୋହୀଙ୍କ ବିରୋଧରେ ଏବେ ବିଜେପି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଗୁଜରାଟ ବିଜେପି ରାଜ୍ୟ ସଭାପତି ସିଆର ପାଟିଲ ଦଳ ବିରୋଧରେ ବିଦ୍ରୋହ କରିଥିବା ୭ ନେତାଙ୍କୁ ବହିଷ୍କାର କରିଛନ୍ତି। ଦଳରୁ ଟିକେଟ୍ ନ ପାଇ ଏହି ନେତାମାନେ ନିରପେକ୍ଷ ନାମାଙ୍କନ ଦାଖଲ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ଦଳରୁ ବହିଷ୍କୃତ ହୋଇଥିବା ନେତାଙ୍କ ମଧ୍ୟରେ ମଧୁ ଶ୍ରୀବାସ୍ତବ, ଅରବିନ୍ଦ ଲଡାନି, ଦୀନୁ ପଟେଲ, ହର୍ଷଦ ଭାସାଭା ଏବଂ ଧୱାଲ ସିଂ ଜାଲା ପ୍ରମୁଖ ରହିଛନ୍ତି | ଦଳରୁ ଟିକେଟ୍ ନ ପାଇ ଏହି ବିଜେପି ନେତାମାନେ ସ୍ୱାଧୀନ ଭାବେ ନାମାଙ୍କନପତ୍ର ଦାଖଲ କରିଛନ୍ତି। ଏଥିରେ ଅନେକ ବିଧାୟକ ଏବଂ ପୂର୍ବତନ ବିଧାୟକ ମଧ୍ୟ ରହିଛନ୍ତି । ସେହିପରି ବିଜେପି ଟିକେଟ୍ରେ ୱାଗୋଡିଆରୁ ୬ ଥର ବିଧାୟକ ଥିବା ମଧୁ ଶ୍ରୀବାସ୍ତବଙ୍କୁ ଏଥର ଟିକେଟ୍ ମିଳିନଥିଲା | ଆଉ ଏହାପରେ ସେ ସ୍ୱାଧୀନ ପ୍ରାର୍ଥୀ ଭାବରେ ନାମାଙ୍କନ ଦାଖଲ କରିଛନ୍ତି | ସୂଚନା ଥାଉ କି ଯେ ଗୁଜୁରାଟରେ ପ୍ରଥମ ପର୍ଯ୍ୟାୟ ମତଦାନ ଡିସେମ୍ବର ୧ ରେ ଏବଂ ଦ୍ୱିତୀୟ ପର୍ଯ୍ୟାୟ ମତଦାନ ଡିସେମ୍ବର ୫ ରେ ଅନୁଷ୍ଠିତ ହେବ। ଏହା ପରେ ଡିସେମ୍ବର ୮ ରେ ନିର୍ବାଚନର ଫଳାଫଳ ଆସିବ। ସେହି ଦିନ ହିମାଚଳ ପ୍ରଦେଶର ନିର୍ବାଚନ ଫଳାଫଳ ମଧ୍ୟ ଘୋଷଣା କରାଯିବ।