ପାଟନା : ଗୋପାଳ ଖେମ୍‌କା, ଅଜିତ କୁମାର, ରମାକାନ୍ତ ଯାଦବ, ବିକ୍ରମ ଝା, ଜିତେନ୍ଦ୍ର କୁମାର ମାହାତୋ, ସୁଶୀଳା ଦେବୀ, ସୁରେନ୍ଦ୍ର କେୱତ।  ବିହାରରେ ଏହି ନାଁ ଗୁଡ଼ିକୁ ନେଇ ଏବେ ରାଜନୀତି ସରଗରମ ହୋଇ ଉଠିଛି। ଚଳିତ ବର୍ଷ ଶେଷ ଆଡ଼କୁ ବିହାର ବିଧାନସଭା ନିର୍ବାଚନ ଥିବାବେଳେ ଏହା ପୂର୍ବରୁ ବିହାରରେ ଗତ ୧୦ ଦିନ ମଧ୍ୟରେ ଉପରୋକ୍ତ ୭ ବ୍ୟକ୍ତିଙ୍କୁ ହତ୍ୟା କରାଯାଇଛି। ଏହାକୁ  ନେଇ ବିରୋଧୀ ଦଳ ନେତାମାନେ ରାଜ୍ୟରେ ଆଇନ ଶୃଙ୍ଖଳା ସ୍ଥିତି ଉପରେ ପ୍ରଶ୍ନ ଉଠାଇଛନ୍ତି।  କଂଗ୍ରେସ ନେତା ରାହୁଲ ଗାନ୍ଧୀ ସୋମବାର ଏକ୍ସରେ ଏକ ପୋଷ୍ଟ୍‌ କରି ବିହାରକୁ ‘କ୍ରାଇମ୍‌ କ୍ୟାପିଟାଲ ଅଫ ଇଣ୍ଡିଆ’ ତଥା ଭାରତର ଅପରାଧ ରାଜଧାନୀ କହିଛନ୍ତି।  ଲୋକସଭାରେ ବିରୋଧୀ ଦଳ ନେତା ରାହୁଲ ଗଣମାଧ୍ୟମ ରିପୋର୍ଟକୁ ଦର୍ଶାଇ କହିଛନ୍ତି ଯେ ଗତ ୧୧ ଦିନ ମଧ୍ୟରେ ୩୧ ଜଣଙ୍କୁ ହତ୍ୟା କରାଯାଇଛି। ରାଜ୍ୟରେ ‘କଣ୍ଟ୍ରାକ୍ଟ କିଲିଂ ଇଣ୍ଡଷ୍ଟ୍ରି’ ଚାଲିଛି ବୋଲି ଦାବି କରି ରାହୁଲ କହିଛନ୍ତି, ବିହାର ଏବେ ଭାରତର ଅପରାଧ ରାଜଧାନୀରେ ପରିଣତ ହୋଇଛି। ଏଠି ପ୍ରତି ଘରେ ଭୟ । ‘ଗୁଣ୍ଡାରାଜ୍‌’ ଫଳରେ ବେକାରୀ ଯୁବକମାନେ ହତ୍ୟାକାରୀ ପାଲଟୁଛନ୍ତି। ଅନ୍ୟପକ୍ଷେ ବିହାରର ଉପମୁଖ୍ୟମନ୍ତ୍ରୀ ବିଜୟ କୁମାର ସିହ୍ନା କହିଛନ୍ତି, ଅପରାଧିକ କାର୍ଯ୍ୟକଳାପକୁ ପ୍ରତିହତ କରିବାପାଇଁ ତାଙ୍କ ସରକାର କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି। ସେହିଭଳି ଅନ୍ୟତମ ଉପମୁଖ୍ୟମନ୍ତ୍ରୀ ସମ୍ରାଟ ଚୌଧାରୀ କହିଛନ୍ତି, ‘ହତ୍ୟା ବନ୍ଦ କରିବା ସରକାରଙ୍କ ପାଇଁ ଜଟିଳ ହୋଇପଡ଼ୁଛି। କାରଣ ରାଜ୍ୟରେ ସଂଗଠିତ ଅପରାଧ ତୁଳନାରେ ବ୍ୟକ୍ତିଗତ ବିବାଦରୁ ଅଧିକ ହତ୍ୟା ବଢ଼ୁଛି। ସେ କହିଛନ୍ତି, ବିହାରରେ ସୁଶାସନ ଚାଲିଛି। ଏଠି କୌଣସି ସଂଗଠିତ ଅପରାଧ ନାହିଁ। ଯଦି କୌଣସି ବ୍ୟକ୍ତିଗତ ବିବାଦରୁ ହତ୍ୟା ଉପୁଜିଲା ତେବେ ସରକାରଙ୍କ ପାଇଁ ଏହା ବନ୍ଦ କରିବା ଜଟିଳ ହୋଇପଡ଼ିବ। ନୀତୀଶଙ୍କ ପାଇଁ ଅଧିକ ସମସ୍ୟା ସୃଷ୍ଟି କରିଛନ୍ତି ବିଜେପି ନେତୃତ୍ବାଧୀନ ଏନ୍‌ଡିଏ ମେଣ୍ଟରେ ତାଙ୍କର ଜଣେ ସହଯୋଗୀ ତଥା କେନ୍ଦ୍ର ମନ୍ତ୍ରୀ ଚିରାଗ ପାଶ୍ବାନ୍‌। ହତ୍ୟାକାଣ୍ଡକୁ ସମାଲୋଚନା କରି ଚିରାଗ କହିଛନ୍ତି, କେତେ ସଂଖ୍ୟକ ବିହାରୀଙ୍କୁ ହତ୍ୟା କରାଯିବ।  ବିହାର ପୁଲିସର ଦାୟିତ୍ବ କ’ଣ ତାହା ବୁଝି ହେଉନାହିଁ।  ଉଲ୍ଳେଖଯୋଗ୍ୟ ୬୦ ବର୍ଷୀୟା ହସ୍ପିଟାଲ କର୍ମୀ ସୁଶୀଳା ଦେବୀଙ୍କୁ ନାଳନ୍ଦାରେ ହତ୍ୟା କରାଯିବାପରେ ପାଶ୍ବାନ୍‌ ଏହି ଟିପ୍ପଣୀ ଦେଇଛନ୍ତି।  ଆର୍‌ଜେଡି ନେତା ତେଜସ୍ବୀ ଯାଦବ ମଧ୍ୟ ନୀତୀଶଙ୍କୁ କଡ଼ା ସମାଲୋଚନା କରିଛନ୍ତି।  ରାଜ୍ୟ‌ରେ ଅପରାଧ ବଢ଼ୁଥିବାବେଳେ ମୁଖ୍ୟମନ୍ତ୍ରୀଙ୍କ ନିରବତାକୁ ନେଇ ସେ ପ୍ରଶ୍ନ ଉଠାଇଛନ୍ତି।  ପ୍ରଥମେ ବ୍ୟବସାୟୀ ବିକ୍ରମ ଝା’ଙ୍କ ହତ୍ୟା ପାଇଁ ନୀତୀଶଙ୍କ ଉପରେ ବର୍ଷିଥିବା ତେଜସ୍ବୀ ପରେ ରବିବାର ଜଣେ ଆଇନଜୀବୀଙ୍କୁ ଗୁଳି କରି ହତ୍ୟା ଘଟଣା ପାଇଁ ନୀତୀଶଙ୍କ ଉପରେ ଆକ୍ରମଣ ତୀବ୍ର କରିଛନ୍ତି। ଜୁଲାଇ ୪ ତାରିଖରେ ପ୍ରଖ୍ୟାତ ଶିଳ୍ପପତି ଗୋପାଳ ଖେମକାଙ୍କୁ ଗୁଳି କରି ହତ୍ୟା‌ କରାଯାଇଥିଲା। 
  ଅନ୍ୟପକ୍ଷରେ ବିହାରର ଶ୍ରମ ସମ୍ବଳ ମନ୍ତ୍ରୀ ସନ୍ତୋଷ ସିଂହ ଅପରାଧୀମାନଙ୍କୁ ଚେତାବନୀ ଦେଇ କହିଛନ୍ତି, ରାଜ୍ୟରେ କୌଣସି ଅପରାଧୀ ଛାଡ଼ ପାଇବେ ନାହିଁ। ‌ଏନ୍‌ଡିଏ ସରକାର ଅଧୀନରେ ଯିଏ ବି ଗୁଳି ଚଳାଇବ ତାକୁ ହତ୍ୟା କରାଯିବ ବୋଲି ମନ୍ତ୍ରୀ କହିଛନ୍ତି ।