ପାଞ୍ଚ ଦିନ ପାଣି ପିଇ ବଞ୍ଚିଲେ ବାଥ୍ରୁମ୍ରେ ବନ୍ଦ ହୋଇ ରହିଯାଇଥିବା ୭ ବର୍ଷୀୟ ଝିଅ
ହାଇଦ୍ରାବାଦ: ଖେଳିବା ବେଳେ ପଡ଼ୋଶୀ ଘର ଗାଧୁଆଘରେ ପଡ଼ି ଯାଇଥିବା ଜଣେ ସାତ ବର୍ଷୀୟ ଝିଅ କେବଳ ପାଣି ପିଇ ପାଞ୍ଚ ଦିନ ବଞ୍ଚି ରହିଥିବା କଥା ପୁଲିସ କହିଛି।
Sambad is now on WhatsApp
Join and get latest news updates delivered to you via WhatsApp
ଚମକପ୍ରଦ ଘଟଣାଟି ଘଟିଛି ହାଇଦ୍ରାବାଦ ଠାରୁ ପ୍ରାୟ ୧୬୦ କିଲୋମିଟର ଦୂର ତେଲେଙ୍ଗାନାର ନାରାୟଣପେଟ୍ ଜିଲ୍ଲା ଅନ୍ତର୍ଗତ ମଖତାଲ୍ ସହରରେ।
ଟୁର୍ରେ ଯାଇଥିବା ଘରବାଲା ଗୁରୁବାର ଦିନ ଘରକୁ ଫେରି ବନ୍ଦ ଗାଧୁଆଘରେ ଝିଅଟିଏ ଶୋଇଥିବା ଦେଖି ଚମକି ପଡ଼ିଥିଲେ। ବିନା ଖାଦ୍ୟରେ କେବଳ ଗାଧୁଆଘରେ ଥିବା ପାଣି ପିଇ ବଞ୍ଚିଥିବା ଝିଅଟି ଖୁବ୍ ଜୀର୍ଣ୍ଣଶୀର୍ଣ୍ଣ ହୋଇ ଆସନ୍ନ ମୃତ୍ୟୁ ହେବା ପରିସ୍ଥିତିରେ ଥିଲା।
ପୁଲିସ ତଦନ୍ତରୁ ଜଣାପଡ଼ିଲା ଯେ ଏପ୍ରିଲ୍ ୨୦ ତାରିଖରେ ଦ୍ୱିତୀୟ ଶ୍ରେଣୀରେ ପଢୁଥିବା ସେ ଝିଅ କୁରାବାକଚେରି ଅଖିଳା ପାଖ କୋଠାର ଟେରାସ୍ରେ ଖେଳୁଥିବା ବେଳେ କେମିତି କ’ଣ ପଡ଼ୋଶୀ ଘରର ଗାଧୁଆଘର ଭିତରକୁ ଖସି ପଡ଼ିଥିଲା। ପ୍ଲାଷ୍ଟିକ୍ ଜାଲି ଲାଗିଥିବାରୁ ଛାତ ନ ଥିବା ସେ ଗାଧୁଆ ଘର ଭିତରକୁ ପଡ଼ିଲା ବେଳେ ଝିଅଟି ଆହତ ହୋଇ ନ ଥିଲା। ଭିତରେ ଲୁଗାପଟା ପଡ଼ିଥିବା ଉଲୁଗୁଣିର ଦଉଡ଼ିଟି ମଧ୍ୟ ତାକୁ ସାହା ହୋଇଥିଲା।
ଗାଧୁଆଘରର କବାଟ ବାହାରପଟୁ ବନ୍ଦ ଥିଲା ଏବଂ ଅନ୍ତେବାସୀମାନେ ଘରେ ନ ଥିଲେ। ତେଣୁ ସାହାଯ୍ୟ ପାଇଁ ଯେତେ ଚିତ୍କାର କଲେ ବି କେହି ଶୁଣିବା ସମ୍ଭବ ନ ଥିଲା। ପାଖ ଘରମାନଙ୍କରେ ମଧ୍ୟ କେହି ରହୁ ନ ଥିଲେ।
ତା’ର ପିତାମାତା ସୁରେଶ ଓ ମାଧଦେବମ୍ମା ଖୋଜାଖୋଜି କରି ତାକୁ ନ ପାଇବାରୁ ପର ଦିନ ଥାନାରେ ନିରୁଦ୍ଦେଶ ଅଭିଯୋଗ କଲେ। ସେମାନଙ୍କର ସନ୍ଦେହ ହୋଇଥିଲା କି, ପାଖରେ ପଡ଼ିଥିବା ମେଳାକୁ ଯାଇ ସେ ନିରୁଦ୍ଦେଶ ହୋଇ ଯାଇଛି।
ପୁଲିସ ଏକ ଟିମ୍ ଗଠନ କରି ପଡ଼ୋଶୀ ଜିଲ୍ଲା ଏବଂ ହାଇଦ୍ରାବାଦକୁ ସୂଚନା ଦେଲା କିନ୍ତୁ କିଛି ସନ୍ଧାନ ପାଇଲା ନାହିଁ।
ହାଇଦ୍ରାବାଦରୁ ବୁଧବାର ଦିନ ଘରମାଲିକ ତଥା ଶିକ୍ଷକ ଭେଙ୍କଟେଶ ଫେରିବା ପରେ ଝିଅଟିକୁ ଦେଖି ପଡ଼ିଶାମାନଙ୍କୁ ଖବର କରିଥିଲେ।
ସେମାନେ ଆସି ତାକୁ ଚିହ୍ନି କହିଥିଲେ କି, ଏ ହେଉଛି ସେମାନଙ୍କ ଘରପଛରେ ରହୁଥିବା ଭଡ଼ାଟିଆଙ୍କ ଝିଅ।
କଥା କହି ପାରୁ ନ ଥିବା ଅଖିଳାଙ୍କୁ ତୁରନ୍ତ ସ୍ଥାନୀୟ ଡାକ୍ତରଖାନାକୁ ନିଆଯାଇ ସାଲାଇନ୍ ଦିଆଯାଇଥିଲା।