ଆଟଲାଣ୍ଟିକ୍ ମହାସାଗର ତଳେ ମିଳିଲା ୮.୫ କିମି ଦୀର୍ଘ ବିଶାଳ ଗର୍ତ୍ତର ସନ୍ଧାନ
୬୬ ନିୟୁତ ବର୍ଷ ପୂର୍ବେ ହୋଇଥିବା ଧୂମକେତୁ ମାଡ଼ର ପ୍ରଭାବରୁ ସୃଷ୍ଟି ହୋଇଥିବା ସମ୍ଭାବନା
ନୂଆଦିଲ୍ଲୀ : ସମୁଦ୍ର ବକ୍ଷରେ ରହିଥିବା ଅନେକ ରହସ୍ୟକୁ ଏବେ ମଧ୍ୟ ମଣିଷ ଭେଦ କରିପାରିନାହିଁ । ଅତୀତରେ ହୋଇଥିବା ଅନେକ ଘଟଣା ଲକ୍ଷ ଲକ୍ଷ ବର୍ଷ ଧରି ସମୁଦ୍ର ତଳେ ଲୁଚିରହିଛି । ନିକଟରେ ଏହିପରି ଏକ ରହସ୍ୟର ସନ୍ଧାନ ମିଳିଛି ଆଟଲାଣ୍ଟିକ୍ ମହାସାଗର ବକ୍ଷରେ । ପଶ୍ଚିମ ଆଫ୍ରିକାର ଗିନି ଉପକୂଳରୁ ପ୍ରାୟ ୪୦୦ କିଲୋମିଟର ଦୂର ଆଟଲାଣ୍ଟିକ ମହାସାଗର ବକ୍ଷରେ ପ୍ରାୟ ୪୦୦ ମିଟର ଗଭୀରତାରେ ୮.୫ କିଲୋମିଟର ଚଉଡ଼ା ଏକ ବିରାଟ ଗାତର ସନ୍ଧାନ ମିଳିଛି । ପ୍ରଥମ ଥର ପାଇଁ ଏପରି ଏକ ଗର୍ତ୍ତର ଆବିଷ୍କାର ହୋଇଛି । ପ୍ରାୟ ୬୬ ନିୟୁତ ବର୍ଷ ପୂର୍ବେ ପୃଥିବୀରେ ମାଡ଼ ହୋଇଥିବା ଏକ ଧୂମକେତୁର ପ୍ରଭାବରୁ ଏହି ବିରାଟ ଗର୍ତ୍ତ ସୃଷ୍ଟି ହୋଇଥିବା ବୈଜ୍ଞାନିକମାନେ ଅନୁମାନ କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ତେବେ ଏହା ଏକ ପ୍ରାରମ୍ଭିକ ଆକଳନ ହୋଇଥିବାବେଳେ ସମୁଦ୍ର ଶଯ୍ୟାକୁ ଖୋଳି ନମୁନା ସଂଗ୍ରହ କରି ଆବଶ୍ୟକ ଗବେଷଣା ପରେ ଏ ସଂପର୍କରେ ପ୍ରକୃତ ତଥ୍ୟ ଜଣାପଡ଼ିବ ବୋଲି କୁହାଯାଉଛି । ଏହି ଗବେଷଣାରୁ ୬୬ ନିୟୁତ ବର୍ଷ ପୂର୍ବେ ପୃଥିବୀରେ ମାଡ଼ ହୋଇଥିବା ଧୂମକେତୁର ପ୍ରଭାବ ସଂପର୍କରେ ଜଣାପଡ଼ିବ । ସେହି ସମୟରେ ପୃଥିବୀ ପୃଷ୍ଠରେ ମାଡ଼ ହୋଇଥିବା ଏକ ଧୂମକେତୁ ଚିକଜୁଲୁବ୍ ପ୍ରଭାବରୁ ଡାଇନୋସର୍ସମାନେ ଲୋପ ପାଇଯାଇଥିଲେ ।
ଏହି ଗବେଷଣାରୁ ଆଉ ଏକ ତଥ୍ୟ ବି ଜଣାପଡ଼ିବ । ତାହା ହେଉଛି ପୃଥିବୀ ପୃଷ୍ଠରେ ଧୂମକେତୁ ମାଡ଼ ଯୋଗୁଁ ହେଉଥିବା ବିନାଶକାରୀ ପ୍ରଭାବ ସଂପର୍କରେ ଆକଳନ କରିହେବ ।