କରୋନା ସଂକଟ ଯୋଗୁଁ ୮୦% କର୍ମଜୀବୀ ଭାରତୀୟଙ୍କ ଆୟ କମିଛି : ସର୍ଭେ
ନୂଆଦିଲ୍ଲୀ : ଚଳିତ କରୋନା ଭାଇରସ ମହାମାରୀ ସରକାର, ଶିଳ୍ପଜଗତଠାରୁ ଆରମ୍ଭ କରି ସାଧାରଣ ଲୋକଙ୍କ ପର୍ଯ୍ୟନ୍ତ ସମସ୍ତଙ୍କୁ ଗୁରୁତରଭାବେ ପ୍ରଭାବିତ କରିଛି । ଏକ ଅଧ୍ୟୟନ ଅନୁସାରେ ଏହି ସଂକଟ ଯୋଗୁଁ ପ୍ରାୟ ୮୦ ପ୍ରତିଶତ କର୍ମଜୀବୀ ଭାରତୀୟଙ୍କ ଆୟ ହ୍ରାସ ପାଇଛି । ୯୨ ପ୍ରତିଶତ କର୍ମଜୀବି ଭାରତୀୟ ଆଗକୁ ଅବସ୍ଥା ଆହୁରି ଖରାପ ହେବ ବୋଲି ମନେ କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଜେନେରାଲି ପକ୍ଷରୁ କରାଯାଇଥିବା ଏହି ଅଧ୍ୟୟନ ଅନୁସାରେ ପ୍ରାୟ ୮୦ ପ୍ରତିଶତ କର୍ମଜୀବି ଭାରତୀୟ ଆୟ ହ୍ରାସ ପାଇଥିବା ପ୍ରକାଶ କରିଛନ୍ତି । ଆଗାମୀ ଦିନରେ ସ୍ଥିତି ଆହୁରି ଖରାପ ହେବ ବୋଲି ସେମାନେ ଆଶଙ୍କା କରୁଛନ୍ତି । ସେହିପରି ବ୍ୟବସାୟ କରୁଥିବା ଭାରତୀୟମାନେ ଆଶଙ୍କା କରିଛନ୍ତି ଯେ ଆଗାମୀ କିଛି ମାସ ମଧ୍ୟରେ ସେମାନେ ନିଜ ଆୟର ଅଧା ହରାଇବେ । ମୋଟାମୋଟିଭାବେ ଅଧିକାଂଶ କର୍ମଜୀବି ଓ ଆତ୍ମନିର୍ଭରଶୀଳ ଭାରତୀୟ ନିଜର ଭବିଷ୍ୟତକୁ ନେଇ ଚିନ୍ତିତ ଅଛନ୍ତି । ନିଜ ନିଜ ପରିବାରକୁ କିପରି ଭରଣପୋଷଣ କରିବେ ସେ ନେଇ ଭାରତୀୟମାନେ ଚିନ୍ତିତ ଅଛନ୍ତି ବୋଲି ଏହି ରିପୋର୍ଟରେ କୁହାଯାଇଛି ।
ଅନ୍ତର୍ଜାତୀୟ ସ୍ତରରେ ଏକ ପ୍ରମୁଖ ବୀମା କମ୍ପାନି ଭାବେ ଜଣାଶୁଣା ଜେନେରାଲି ଗ୍ରୁପ ୨୨ଟି ଦେଶରେ ଏହି ସର୍ଭେ କରିଥିଲା । ଭାରତରେ ଏହି ସର୍ଭେ ଏକ ମାର୍କେଟ ରିସର୍ଚ୍ଚ ସଂସ୍ଥା ଏପିଫଲି ସହ ମିଳିତଭାବେ କରାଯାଇଥିଲା ।