ବିଜେପି ସାଂସଦଙ୍କ ବିକାଶ ପାଣ୍ଠିରୁ ଉଡ଼ିଗଲା ୮୯ ଲକ୍ଷ ଟଙ୍କା, କିଏ ନେଲା ଟଙ୍କା ତାହାକୁ ନେଇ ତନାଘନା
ନୂଆଦିଲ୍ଲୀ: ସଂସଦୀୟ ପାଣ୍ଠିରୁ ଉଠାଣ ହେଲା ୮୯ ଲକ୍ଷ ଟଙ୍କା, ହେଲେ ଜାଣିପାରିଲେଣି ଖୋଦ ସାଂସଦ | ବିହାରର ଛାପରା ଜିଲ୍ଲାର ମହାରାଜଗଞ୍ଜ ସାଂସଦ ଜନାର୍ଦ୍ଦନ ସିଂହଙ୍କ ସାଂସଦ ପାଣ୍ଠିରୁ ଏଭଳି ଏକ ଠକେଇ ଘଟଣା ସାମ୍ନାକୁ ଆସିଛି | ଆଉ ବିଜେପି ସାଂସଦ ଜନାର୍ଦ୍ଦନ ସିଂହଙ୍କ ସଂସଦୀୟ ବିକାଶ ପାଣ୍ଠିରୁ ୮୯ ଲକ୍ଷ ଟଙ୍କା ଠକେଇ ମାମଲାରେ ତିନି ଦିନ ମଧ୍ୟରେ ରିପୋର୍ଟ ଦେବାକୁ ବିହାର ମୁଖ୍ୟ ସଚିବଙ୍କୁ କେନ୍ଦ୍ର ଗୃହ ସଚିବ ନିର୍ଦ୍ଦେଶ ଦେଇଛନ୍ତି । ଏହି ଠକେଇରେ ସମ୍ପୃକ୍ତ ବ୍ୟାଙ୍କ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ସାଂସଦ ଦାବି କରିଛନ୍ତି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ମହାରାଜଗଞ୍ଜର ବ୍ୟାଙ୍କ ଅଫ୍ ବରୋଦା ମୁଖ୍ୟ ଶାଖାରେ ସାଂସଦ ଜନାର୍ଦ୍ଦନ ସିଂହଙ୍କ ସାଂସଦ ଆଞ୍ଚଳିକ ବିକାଶ ପାଣ୍ଠିର ଆକାଉଣ୍ଟ ରହିଛି। ଏହି ବ୍ୟାଙ୍କ ଆକାଉଣ୍ଟରୁ ଥରେ ୪୨ ଲକ୍ଷ ଏବଂ ୪୭ ଲକ୍ଷ ଟଙ୍କା ଉଠାଯାଇଛି । ମହାରାଷ୍ଟ୍ରର ଅହମ୍ମଦନଗର ଜିଲ୍ଲାର ବ୍ୟାଙ୍କ ଅଫ୍ ବରୋଦା ଶାଖାରେ ଏହି ଚେକ୍ କ୍ଲୋନ୍ ହୋଇ ଆରଟିଜିଏସ୍ ହୋଇଛି ବୋଲି ଜଣାପଡିଛି। ସମସ୍ତ ଟଙ୍କା ଅହମ୍ମଦନଗରର ଜଣେ ବ୍ୟକ୍ତିଙ୍କ ଆକାଉଣ୍ଟକୁ ସ୍ଥାନାନ୍ତର କରାଯାଇଛି |
ତିନିମାସ ପୂର୍ବରୁ ନଭେମ୍ବର ୪ ରେ ଟଙ୍କା ଟ୍ରାନ୍ସଫର ହୋଇଥିବାବେଳେ ଫେବୃଆରୀ ୩ ରେ ସାଂସଦ ଏବାବଦରେ ଜାଣିବାକୁ ପାଇଥିଲେ | ଏହା ପରେ ସାଂସଦ ଗୃହ ମନ୍ତ୍ରାଳୟକୁ ଏବାବଦରେ ସୂଚନା ଦେଇଥିଲେ | ସାଂସଦଙ୍କ ଅଭିଯୋଗ ପରେ ଗୁରୁବାର ବିଳମ୍ବିତ ରାତିରେ ଅହମ୍ମଦନଗରରୁ ଅଭିଯୁକ୍ତ ବ୍ୟାଙ୍କ ଆକାଉଣ୍ଟାଣ୍ଟଙ୍କୁ ଗିରଫ କରାଯାଇଛି । ବର୍ତ୍ତମାନ ଅଭିଯୁକ୍ତଙ୍କୁ ପଚରାଉଚରା କରାଯାଉଛି। ଏହି ଘଟଣାରେ ଆଉ କେଉଁମାନେ ସମ୍ପୃକ୍ତ ସେ ନେଇ ତଦନ୍ତ ଚାଲିଛି |