ଅନଲାଇନ୍‌ରେ ୯ ନିୟୁତ ‌ଲୋକ ଦେଖିଲେ ଚନ୍ଦ୍ରଯାନ-୩ ଅବତରଣ

ନୂଆଦିଲ୍ଲୀ: ସାରା ବିଶ୍ବରେ ୯.୧ ନିୟୁତରୁ ଅଧିକ ଲୋକ ଅନ୍‌ଲାଇନ୍‌ରେ ଚନ୍ଦ୍ରଯାନ-୩ର ଚନ୍ଦ୍ରପୃଷ୍ଠରେ ଅବତରଣକୁ ଦେଖିଥିଲେ। ଫେସବୁକ୍‌ରେ ୩୫୫.୬ ହଜାର ଲୋକ ଏହାର ଲାଇଭ୍‌ ଷ୍ଟ୍ରିମିଂକୁ ଉପଭୋଗ କରିଥିଲେ। ୟୁଟ୍ୟୁବ୍‌ରେ ୮ ନିୟୁତରୁ ଅଧିକ ଲୋକ ଏହି ଐତିହାସିକ ମୁହୂର୍ତକୁ ଦେଖିଥିବା ବେଳେ ଦୂରଦର୍ଶନ ଟିଭିରେ ମଧ୍ୟ ତାହାର ସିଧା ପ୍ରସାରଣ କରାଯାଇଥିଲା। ଦୂରଦର୍ଶନର ୟୁଟ୍ୟୁବ୍ ଚ୍ୟାନେଲ୍‌ରେ ତାହାକୁ ୭ ଲକ୍ଷ ୫୦ ହଜାରରୁ ଅଧିକ ଲୋକ ଦେଖିଥିଲେ।

ଦି ୱାର୍ଲଡ୍‌ ରୢାଙ୍କିଙ୍ଗ୍‌ ତଥ୍ୟ ଅନୁସାରେ ୟ୍ୟୁଟ୍ୟୁବ୍‌ରେ ସର୍ବାଧିକ ଦେଖା‌ଯାଇଥିବା ଲାଇଭ୍‌ ଷ୍ଟ୍ରିମିଂ ତାଲିକାରେ ଚନ୍ଦ୍ରଯାନ-୩ ଅବତରଣ ଶୀର୍ଷ ସ୍ଥାନରେ ରହିଛି। ବିଶ୍ବବ୍ୟାପୀ ଏହାକୁ ୟୁଟ୍ୟୁବ୍‌ରେ ଅଧିକାଂଶ ଲୋକ ଦେଖିଥିଲେ। ଏହି ତାଲିକାରେ ଚନ୍ଦ୍ରଯାନ-୩ ଅବତରଣ ପଛକୁ ଦ୍ବିତୀୟ, ତୃତୀୟ ଓ ଚତୁର୍ଥ ସ୍ଥାନରେ ରହିଛି ତିନିଟି ଫୁଟ୍‌ବଲ୍‌ ମ୍ୟାଚ୍‌।