ଶୂନରୁ ଐଶ୍ବର୍ଯ୍ୟ ପର୍ଯ୍ୟନ୍ତ ଏକ ଯାତ୍ରାର ଅବସାନ : ସାହାରାଶ୍ରୀ ସୁବ୍ରତ ରାୟଙ୍କ ଉତ୍ଥାନ ଓ ପତନର କାହାଣୀ

ଦୁଇ ହଜାର ଟଙ୍କା, ୧୦ରେ ୧୨ ଫୁଟ୍‌ର ଏକ କକ୍ଷ, ଦୁଇ ଜଣ ସହାୟକ କର୍ମଚାରୀ। ଏହିଭଳି ଭାବେ ଆରମ୍ଭ ହୋଇଥିଲା ସାହାରା ଇଣ୍ଡିଆ ପରିବାରର ଯାତ୍ରା। କମ୍ପାନିକୁ ପ୍ରତିଷ୍ଠା କରିଥିଲେ ସୁବ୍ରତ ରାୟ। ଅଳ୍ପରୁ ଆରମ୍ଭ ହୋଇଥିବା ଏହି କମ୍ପାନି କିଛି ବର୍ଷ ଭିତରେ ଏକ ବିଶାଳ ଦ୍ରୁମରେ ପରିଣତ ହୋଇଥିଲା। ଏହାର ଶାଖାପ୍ରଶାଖା ଦେଶର କୋଣ ଅନୁକୋଣକୁ ଲମ୍ବି ଯାଇଥିଲା। ଘରେ ଘରେ ତାହା ପରିଚିତ ହୋଇଥିଲା। ଚାକଚକ୍ୟ ସିନେମା ଜଗତଠାରୁ ଆରମ୍ଭ କରି ବହୁଚର୍ଚ୍ଚିତ ରାଜନୈତିକ ମଞ୍ଚ, ‌କ୍ରିକେଟ୍‌ ପଡ଼ିଆ ଏବଂ ଦେଶଠାରୁ ଆରମ୍ଭ କରି ବିଦେଶ ପର୍ଯ୍ୟନ୍ତ ଚାରିଆଡ଼େ ସୁବ୍ରତ ରାୟଙ୍କୁ ଦେଖିବାକୁ ମିଳୁଥିଲା। ଏମିତି କୌଣସି ଚାକଚକ୍ୟ କାର୍ଯ୍ୟକ୍ରମ ନଥିଲା ଯେଉଁଠାରେ ତାଙ୍କୁ ଦେଖିବାକୁ ମିଳୁ ନଥିଲା। ଐଶ୍ବର୍ଯ୍ୟର ଶିଖରରେ ପହଞ୍ଚିଥିଲେ ସୁବ୍ରତ ରାୟ। ଈର୍ଷଣୀୟ ସଫଳତା ହାସଲ କରିଥିଲେ। କିନ୍ତୁ ସେ କେବେ ସ୍ବପ୍ନରେ ଭାବି ନଥିଲେ ଯେ ତାଙ୍କ ଜୀବନରେ ଦିନେ ଏଭଳି ସମସ୍ୟା ଆସିବ ଯେଉଁଥିପାଇଁ ତାଙ୍କୁ ଦୁର୍ନାମ ମୁଣ୍ଡାଇବାକୁ ପଡ଼ିବ। ଲୋକଙ୍କଠାରୁ ଟଙ୍କା ଠକିଥିବା ଭଳି ସଙ୍ଗୀନ ଅଭିଯୋଗ ତାଙ୍କ ନାମରେ ଆସିଲା। ସୁପ୍ରିମ୍‌କୋର୍ଟରୁ ଶକ୍ତ ଧକ୍କା ମିଳିଲା। ସେହି ସଙ୍କଟରୁ ସେ ‌ଆଉ ମୁକୁଳି ପାରି ନଥିଲେ। ଗିରଫ ହୋଇ ଜେଲ୍ ଯିବା ପାରୋଲ୍‌ରେ ଆସିବା ଓ ଯେତେ‌ ପ୍ରକାରରେ ଭୁଲ କରି ନଥିବା ନେଇ ସଫେଇ ‌ଦେଲେ ମଧ୍ୟ ତାଙ୍କ କଥା କେହି ଶୁଣି ନଥିଲେ। କିଛିଦିନ ତଳେ ମୁମ୍ବାଇରେ ହୃତ୍‌ଘାତ ଯୋଗୁଁ ସୁବ୍ରତ ରାୟଙ୍କ ଦେହାନ୍ତ ହୋଇଛି। ଏଥିପାଇଁ ତାଙ୍କ ଜୀବନୀ ପ୍ରତି ଲୋକଙ୍କ ଆଗ୍ରହ ପୁଣିଥରେ ବୃଦ୍ଧି ପାଇଛି।

Photo Courtesy: Jagran

ବିହାରରୁ ବିଶ୍ବ
ସୁବ୍ରତ ରାୟ ୧୯୪୮ ମସିହା ଜୁନ୍ ୧୦ ତାରିଖରେ ବିହାରର ଅରାରିଆଠାରେ ଜନ୍ମଗ୍ରହଣ କରିଥିଲେ। ସୁବ୍ରତ ରାୟ ଗୋରଖପୁରସ୍ଥିତ ସରକାରୀ ବୈଷୟିକ ଅନୁଷ୍ଠାନରୁ ମେକାନିକାଲ୍‌ ଇଞ୍ଜିନିୟରିଂ ଶିକ୍ଷା ନେଇ କ୍ୟାରିୟର କ୍ୟାରିୟର ଆରମ୍ଭ କରିଥିଲେ। ୧୯୭୬ ମସିହାରେ ସଂଘର୍ଷମୟ ଚିଟ୍‌ଫଣ୍ଡ୍‌ କମ୍ପାନି ସାହାରା ଫାଇନାନ୍‌ସକୁ ଅଧିଗ୍ରହଣ କରିବା ପୂର୍ବରୁ ସେ ଗୋରଖପୁରରେ ବ୍ୟବସାୟ ଆରମ୍ଭ କରିଥିଲେ । ୧୯୭୮ ବେଳକୁ ସେ ଏହାକୁ ସାହାରା ଇଣ୍ଡିଆ ପରିବାରରେ ପରିଣତ କରିଥିଲେ, ଯାହା ଭାରତର ସର୍ବବୃହତ ଗ୍ରୁପ୍ କମ୍ପାନିରେ ପରିଣତ ହୋଇଥିଲା। ଏକଦା ଭାରତୀୟ ରେଳବାଇ ପରେ ସାହାରା ଇଣ୍ଡିଆ ପରିବାରକୁ ଟାଇମ୍ ମାଗାଜିନ୍ ଭାରତର ଦ୍ୱିତୀୟ ବୃହତ୍ତମ ନିଯୁକ୍ତିଦାତା ଭାବରେ ମାନ୍ୟତା ଦେଇଥିଲା। ସାହାରା ପରିବାର ସହ ପ୍ରାୟ ୧୨ ଲକ୍ଷ ଲୋକ ଜଡ଼ିତ ଥିବା ସୂଚନା ମିଳିଛି। ସାହାରା ଗ୍ରୁପ୍‌ରେ ୯ କୋଟିରୁ ଅଧିକ ନିବେଶକ ଅଛନ୍ତି। ସୁବ୍ରତ ରାୟ ଭାରତୀୟ ବ୍ୟବସାୟ କ୍ଷେତ୍ରରେ ଜଣେ ପ୍ରମୁଖ ବ୍ୟକ୍ତିତ୍ୱ ଥିଲେ। ବ୍ୟବସାୟ କ୍ଷେତ୍ରରେ ସେ ଏକ ବିଶାଳ ସାମ୍ରାଜ୍ୟ ପ୍ରତିଷ୍ଠା କରିଥିଲେ। ତାଙ୍କର ସାମ୍ରାଜ୍ୟ ଫାଇନାନ୍‌ସ, ରିଅଲ ଇଷ୍ଟେଟ୍‌, ମିଡିଆ ଏବଂ ହୋଟେଲ୍‌ ସମେତ ଅନେକ କ୍ଷେତ୍ରରେ ବିସ୍ତାରିତ। ସୁବ୍ରତ ରାୟଙ୍କ ନେତୃତ୍ବରେ ସାହାରା ଅନେକ ବ୍ୟବସାୟରେ ବିସ୍ତାର କରିଥିଲା। ସାହାରା ଗ୍ରୁପ୍ ୧୯୯୨ ମସିହାରେ ହିନ୍ଦୀ ଭାଷାର ଖବରକାଗଜ ରାଷ୍ଟ୍ରୀୟ ସାହାରା ଆରମ୍ଭ କରିଥିଲା। ୧୯୯୦ ଦଶକର ଶେଷ ଭାଗରେ ପୁଣେ ନିକଟରେ ମହତ୍ତ୍ବାକାଂକ୍ଷୀ ଆମ୍ବି ଭ୍ୟାଲି ସିଟି ପ୍ରକଳ୍ପର ଶୁଭାରମ୍ଭ କରିଥିଲେ। ୧୯୯୦ ମସିହା ପରେ ସୁବ୍ରତ ରାୟ ସାହାରା ଟିଭି ଜରିଆରେ ଟେଲିଭିଜନ୍‌ ଇଣ୍ଡଷ୍ଟ୍ରିରେ ପ୍ରବେଶ କରିଥିଲେ, ଯାହାର ନାମ ପରେ ସାହାରା ୱାନ୍ ରଖାଯାଇଥିଲା। ୨୦୦୦ ଦଶକରେ ସାହାରା ଲଣ୍ଡନର ଗ୍ରୋସଭେନର ହାଉସ୍‌ ହୋଟେଲ୍‌ ଏବଂ ନ୍ୟୁୟର୍କ ସିଟିର ପ୍ଲାଜା ହୋଟେଲ୍‌ ଭଳି ଐତିହାସିକ ସମ୍ପତ୍ତି ଅଧିଗ୍ରହଣ କରି ଅନ୍ତର୍ଜାତୀୟ ସ୍ତରରେ ଚର୍ଚ୍ଚାକୁ ଆସିଥିଲା। ସୁବ୍ରତ ରାୟଙ୍କୁ ଅନେକ ପୁରସ୍କାର ଓ ସମ୍ମାନ ମିଳିଥିଲା। ସେ ୟୁନିଭର୍ସିଟି ଅଫ୍ ଇଷ୍ଟ୍‌ ଲଣ୍ଡନରୁ ବିଜିନେସ୍‌ ନେତୃତ୍ୱରେ ଡକ୍ଟରେଟ୍ ଡିଗ୍ରୀ ହାସଲ କରିଥିଲେ। ସେ ଲଣ୍ଡନର ପାୱାରବ୍ରାଣ୍ଡସ ହଲ୍ ଅଫ୍ ଫେମ୍ ଆୱାର୍ଡରେ ଏହି ବ୍ୟବସାୟ ପାଇଥିଲେ। ଗ୍ରୁପର କର୍ମଚାରୀମାନେ ତାଙ୍କୁ ‘ସାହାରା ଶ୍ରୀ’ ବୋଲି ସମ୍ବୋଧନ କରୁଥିଲେ।

‘ସାହାରା ଇଣ୍ଡିଆ’ର ପ୍ରତିଷ୍ଠାତା ସୁବ୍ରତ ରାୟଙ୍କ ସଫଳତା ଓ ବିଫଳତା କିମ୍ବା ଉତ୍ତରଣ ଓ ଅବତରଣ ମୁଦ୍ରାର ଦୁଇ ପାର୍ଶ୍ବ ଭଳି। ଯିଏ ଦିନେ ଐଶ୍ବର୍ଯ୍ୟ ଓ ପ୍ରଭାବରେ ସେ ଶୀର୍ଷରେ ଥିଲେ, ସେ ପୁଣି ଜେଲ୍‌ର ଅନ୍ଧାରୁଆ କୋଠରିରେ କାଳ କାଟିଥିଲେ। ସେ ବି ଲକ୍ଷ ଲକ୍ଷ ଜମାକାରୀଙ୍କ ସ୍ବପ୍ନ ଏବଂ ହତାଶବୋଧର କାରଣ। ନିକଟରେ ପ୍ରାଣ ହରାଇଥିବା ତାଙ୍କର ଜୀବନ ଯାତ୍ରା ସମ୍ପର୍କରେ ପ୍ରଭାତ ପଟ୍ଟନାୟକଙ୍କ ସ୍ବତନ୍ତ୍ର ପ୍ରତିବେଦନ।

ଦୁନିଆ ଦେଖିଥିଲା ପୁଅ ବାହାଘର
ଦୁଇ ଦଶନ୍ଧି ତଳେ ଯେତେବେଳେ ସୁବ୍ରତ ରାୟ ସାହାରା ଦୁଇ ପୁଅଙ୍କୁ ବିବାହ କରିଥିଲେ, ସେତେବେଳେ ସେମାନେ ଉତ୍ସବରେ କୋଟି କୋଟି ଟଙ୍କା ପାଣି ପରି ଛାଡ଼ି ଦେଇଥିଲେ। ସେହି ରାଜବିବାହକୁ ନେଇ ସାରାଦେଶରେ ଚର୍ଚ୍ଚା ହୋଇଥିଲା। ୨୦୦୪ ମସିହା ଫେବ୍ରୁଆରି ୧୦ ତାରିଖରେ ରାୟଙ୍କ ବଡ଼ ପୁଅ ସୁଶାନ୍ତଙ୍କ ବିବାହ ହୋଇଥିଲା ଏବଂ ଏହାର ୪ ଦିନ ପରେ ଫେବ୍ରୁଆରି ୧୪ ତାରିଖରେ ସାନ ପୁଅ ସୁଶାନ୍ତୋଙ୍କ ବିବାହ ହୋଇଥିଲା। ଏହି ବିବାହ ଉତ୍ସବରେ ଦେଶର ବିଭିନ୍ନ ସ୍ଥାନରୁ ୧୦,୫୦୦ ଭିଆଇପି ଅତିଥି ଯୋଗ ଦେଇଥିଲେ। ରାଜନୀତି, କ୍ରୀଡ଼ା, ବ୍ୟବସାୟ, ଚଳଚ୍ଚିତ୍ର ଆଦିରୁ ଲକ୍ଷ୍ନୌରେ ହୋଇଥିବା ଏହି ଦୁଇ ବିବାହରେ ସବୁ ବର୍ଗର ସେଲିବ୍ରିଟି ଯୋଗ ଦେଇଥିଲେ। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ, ଉପପ୍ରଧାନମନ୍ତ୍ରୀ ଲାଲକୃଷ୍ଣ ଆଡଭାନୀ, ସୋନିଆ ଗାନ୍ଧୀ, ଶରଦ ପାୱାର, ମୁଲାୟମ ସିଂହ ଯାଦବ, ଅମର ସିଂହ, ରାଜନାଥ ସିଂହ, ପୂର୍ବତନ ପ୍ରଧାନମନ୍ତ୍ରୀ ଚନ୍ଦ୍ରଶେଖର, ଲାଲୁ ପ୍ରସାଦ ଯାଦବ, ପ୍ରମୋଦ ମହାଜନ, ମାୟାବତୀ, ଶିବୁ ସୋରେନ, ସୁରେଶ କଲମାଡିଙ୍କ ଭଳି ରାଜନୀତିର ଏକାଧିକ ନେତା ଏହି ବିବାହକୁ ଦେଖିଥିଲେ। ଫିଲ୍ମ ଜଗତର ସମସ୍ତ ପ୍ରସିଦ୍ଧ ତାରକା ଏକାଠି ହୋଇଥିଲେ। ସୁପରଷ୍ଟାର ଅମିତାଭ ବଚ୍ଚନ ଏବଂ ବିଶିଷ୍ଟ ବ୍ୟବସାୟୀ ଅନିଲ ଅମ୍ବାନୀ ଅତିଥିଙ୍କ ନେତୃତ୍ୱରେ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହା ଏକ ଉତ୍ସବ ପରି ଯେମିତି ତାରକାମାନେ ମାଟିରେ ଅବତରଣ କରିଛନ୍ତି। ସେହି ଉତ୍ସବକୁ ଶତାବ୍ଦୀର ସବୁଠାରୁ ଚର୍ଚ୍ଚିତ ଏବଂ ଭବ୍ୟ ଭାରତୀୟ ବିବାହ ଭାବରେ ବର୍ଣ୍ଣନା କରାଯାଇଥିଲା। ହିସାବ ବିହୀନ ଖର୍ଚ୍ଚ ହୋଇଥିଲା।

ବିବାଦ ପିଛା ଛାଡ଼ି ନଥିଲା
ସୁବ୍ରତ ରାୟଙ୍କ ଜୀବନ ଅନେକ ସଫଳତା ସହ ବିବାଦରେ ଭରି ରହିଥିଲା। ସାହାରା କମ୍ପାନିର ଅନେକ ଯୋଜନାରେ ଲୋକମାନେ ଟଙ୍କା ବିନିଯୋଗ କରିଥିଲେ, କିନ୍ତୁ କ୍ଷତି ଯୋଗୁଁ କମ୍ପାନି ଲୋକଙ୍କ ଟଙ୍କା ଦେଇ ନଥିଲା ଏବଂ ମାମଲା ପାଟନା ହାଇକୋର୍ଟକୁ ଯାଇଥିଲା। ସାହାରା ଇଣ୍ଡିଆ ବିରୋଧରେ ପାଟନା ହାଇକୋର୍ଟରେ ମାମଲା ଚାଲିଥିଲା, କିନ୍ତୁ ମାମଲା ସୁପ୍ରିମ୍‌କୋର୍ଟରେ ପହଞ୍ଚିବା ପରେ ସାହାରା ମୁଖ୍ୟଙ୍କୁ ଏହି ମାମଲାରେ ଅଦାଲତରୁ ଆଶ୍ୱସ୍ତି ମିଳିଥିଲା। ତୁରନ୍ତ ଏହାର ଶୁଣାଣି କରି ସୁପ୍ରିମ୍‌କୋର୍ଟ ପାଟନା ହାଇକୋର୍ଟଙ୍କ ଗିରଫଦାରୀ ଆଦେଶ ଉପରେ ରୋକ୍ ଲଗାଇଥିଲେ। ସେ ଜାମିନରେ ବାହାରି କହିଥିଲେ ଯେ ସେ ଯେକୌଣସି ଉପାୟରେ ଲୋକଙ୍କ ପାଖରେ ଟଙ୍କା ପହଞ୍ଚାଇବାକୁ ଚାହୁଁଛନ୍ତି, କିନ୍ତୁ ତାଙ୍କ ମୃତ୍ୟୁ ପରେ ତାଙ୍କର ସ୍ୱପ୍ନ ଅଧୁରା ରହିଗଲା। ଅନ୍ୟପକ୍ଷରେ ସାହାରା ଇଣ୍ଡିଆ ଦାବି କରିଛି ଯେ ସେବି ନିକଟରେ ସମସ୍ତ ଟଙ୍କା ଜମା କରାଯାଇଛି। ଏଥିପାଇଁ ସୁପ୍ରିମ୍‌କୋର୍ଟ ସାହାରା-ସେବି ରିଫଣ୍ଡ୍‌ ଆକାଉଣ୍ଟ୍‌ ଖୋଲିଛନ୍ତି।

ଭାରତୀୟ ସଂସ୍କୃତିର ପ୍ରଚାରକ
ଭାରତୀୟ ସଂସ୍କୃତିର ପ୍ରଚାର ପ୍ରସାର ପାଇଁ ସେ ମାଇଁ ତୀର୍ଥ ଇଣ୍ଡିଆ ଷ୍ଟାର୍ଟଅପ୍‌କୁ ପୂର୍ଣ୍ଣ ସମର୍ଥନ ଜଣାଇଥିଲେ। ମାଇଁ ତୀର୍ଥ ଭାରତ ମାଧ୍ୟମରେ ଭାରତୀୟ ସଂସ୍କୃତିକୁ ସମଗ୍ର ବିଶ୍ୱରେ ପ୍ରସାରିତ କରିବା ତାଙ୍କର ଲକ୍ଷ୍ୟ ଥିଲା। ସେ ଚାହୁଁଥିଲେ ଯେ ମୋ ତୀର୍ଥ ଭାରତ ଏପରି ଏକ ଗୁରୁତ୍ୱପୂର୍ଣ୍ଣ ମଞ୍ଚ ହେଉ ଯେଉଁଠାରେ ପୃଥିବୀର ସମସ୍ତ ଭାରତୀୟଙ୍କ ସମସ୍ତ ଧାର୍ମିକ ଆବଶ୍ୟକତା ପୂରଣ ହୋଇପାରିବ। ସାହାରା ଶ୍ରୀଙ୍କ ଏହି ଲଷ୍ୟ ପୂରଣ କରିବା ପାଇଁ ମାଇଁ ତୀର୍ଥ ଭାରତ ଦିନରାତି କାମ କରୁଛି।

କ୍ରୀଡ଼ାପ୍ରେମୀ
ତାଙ୍କ ନେତୃତ୍ୱରେ ସାହାରା ଭାରତୀୟ କ୍ରିକେଟ୍‌ ଓ ହକି ଦଳକୁ ମଧ୍ୟ ପ୍ରୋତ୍ସାହନ ଦେଇଥିଲା। ସେ ଫର୍ମୁଲା ୱାନ୍ ରେସିଂ ଟିମର ମାଲିକ ହୋଇଥିଲେ। ବହୁ କ୍ରିକେଟ୍‌ ତାରକାଙ୍କୁ ତାଙ୍କ ଦ୍ବାରା ଆୟୋଜିତ କାର୍ଯ୍ୟକ୍ରମରେ ଦେଖିବାକୁ ମିଳୁଥିଲା। କ୍ରିକେଟ୍‌କୁ ସେ ବହୁତ ଭଲ ପାଉଥିଲେ। ଅନ୍ୟ କ୍ରୀଡ଼ାକୁ ପ୍ରୋତ୍ସାହନ ଦେବାରେ ମଧ୍ୟ ସେ କେବେ ଅବହେଳା କରୁ ନଥିଲେ।

ପତନ
ଭାଗ୍ୟ ଏମିତି ମୋଡ଼ ନେଇଥିଲା ଯେ ନିଜକୁ ସାହାରାଶ୍ରୀ କହୁଥିବା ସୁବ୍ରତ ରାୟଙ୍କ ଦିନ ଏମିତି ବଦଳିବ ଯେ ତାଙ୍କୁ ଜେଲ୍‌ର ସମ୍ମୁଖୀନ ହେବାକୁ ପଡ଼ିବ ବୋଲି କେହି ଭାବି ନଥିଲେ। ୨୦୦୯ ବେଳକୁ ସାହାରାର ଖରାପ ଦିନ ଆରମ୍ଭ ହୋଇଯାଇଥିଲା। ସେହିବର୍ଷ ଦୁଇ କମ୍ପାନି ସାହାରା ଇଣ୍ଡିଆ ରିଅଲ୍‌ ଇଷ୍ଟେଟ୍‌ କର୍ପୋରେସନ୍‌ ଲିମିଟେଡ୍‌ ଏବଂ ସାହାରା ହାଉସିଂ ଇନ୍‌ଭେଷ୍ଟ୍‌ମେଣ୍ଟ୍‌ କର୍ପୋରେସନ୍‌ ଲିମିଟେଡ୍‌ର ଆଇପିଓ ଆଣିବାକୁ ସାହାରା ଗ୍ରୁପ୍‌ ସେବିକୁ ପ୍ରସ୍ତାବ ଦେଇଥିଲା। ସେବି ସାହାରାର କାଗଜପତ୍ରରେ ଅସଙ୍ଗତି ପାଇଥିଲା। ସାହାରା ନିବେଶକଙ୍କ ଅର୍ଥର ଅପବ୍ୟବହାର କରିଥିବା ଅଭିଯୋଗ ହୋଇଥିଲା। ସେବି ଅଭିଯୋଗ କରିଛି ଯେ ସାହାରା ଏହାର ଦୁଇ କମ୍ପାନିର ୩ କୋଟି ନିବେଶକଙ୍କଠାରୁ ୨୪,୦୦୦ କୋଟି ଟଙ୍କା ସଂଗ୍ରହ କରିଛି। ନିୟମ ଉଲ୍ଲଂଘନ ଅଭିଯୋଗରେ ସାହାରା ଉପରେ ୧୨ ହଜାର କୋଟି ଟଙ୍କାର ଜରିମାନା ଲଗାଯାଇଥିଲା।

ଜେଲ୍‌ ଦର୍ଶନ
ଯେତେବେଳେ ସେବି ସାହାରାକୁ ନିବେଶକଙ୍କ ବିବରଣୀ ଓ ଦସ୍ତାବିଜ ମାଗିଥିଲା ସେତେବେଳେ ସାହାରା ତରଫରୁ ୧୨୭ ଟ୍ରକ୍ କାଗଜପତ୍ର ପଠାଯାଇଥିଲା। ଏହି ଟ୍ରକ୍‌ଗୁଡ଼ିକ ମୁମ୍ବାଇ ଉପକଣ୍ଠରେ ଟ୍ରାଫିକ୍ ଜାମ୍ ସୃଷ୍ଟି କରିଥିଲା। ମାମଲା ସୁପ୍ରିମ୍‌କୋର୍ଟରେ ପହଞ୍ଚିଥିଲା। ଯେଉଁଠାରେ ସୁବ୍ରତ ରାୟଙ୍କ ପକ୍ଷରୁ ପ୍ରସିଦ୍ଧ ଆଇନଜୀବୀ ରାମ ଜେଠମଲାନୀ ଯୁକ୍ତି ଉପସ୍ଥାପନ କରିଥିଲେ। ସୁବ୍ରତ ରାୟଙ୍କୁ ବଞ୍ଚାଇବାକୁ ସେ ଯଥାସମ୍ଭବ ଚେଷ୍ଟା କରିଥିଲେ ମଧ୍ୟ ସଫଳ ହୋଇପାରି ନଥିଲେ। ସୁବ୍ରତ ରାୟଙ୍କ ପାଇଁ ସୁପ୍ରିମ୍‌କୋର୍ଟଙ୍କ ଆଭିମୁଖ୍ୟ କଠୋର ରହିଥିଲା। ୧୫ ପ୍ରତିଶତ ସୁଧ ସହ ନିବେଶକଙ୍କୁ ୨୪,୦୦୦ କୋଟି ଟଙ୍କା ଫେରସ୍ତ କରିବାକୁ ସାହାରାକୁ ନିର୍ଦ୍ଦେଶ ଦିଆଯାଇଥିଲା। ସୁପ୍ରିମ୍‌କୋର୍ଟଙ୍କ ନିର୍ଦ୍ଦେଶକୁ ଅବମାନନା କରିବା ଅଭିଯୋଗରେ ସୁବ୍ରତ ରାୟଙ୍କୁ ୨୦୧୪ ଫେବ୍ରୁଆରିରେ ଗିରଫ କରାଯାଇଥିଲା। ଦୁଇ ବର୍ଷ ଜେଲ୍‌ରେ ରହିବା ପରେ ସେ ପାରୋଲରେ ବାହାରିଥିଲେ।