ହଲଦ୍ବାନୀ : ଜବରଦଖଲମୁକ୍ତ ଜମିରେ ନିର୍ମାଣ ହେବ ଥାନା

ହରିଦ୍ୱାର: ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ସୋମବାର ଘୋଷଣା କରିଛନ୍ତି ଯେ ହଲଦ୍ୱାନୀର ବନଭୁଲପୁରା ଅଞ୍ଚଳରେ ଜବରଦଖଲମୁକ୍ତ ଜମିରେ ଏକ ଥାନା ନିର୍ମାଣ କରାଯିବ। ନାରୀ ଶକ୍ତି ମହୋତ୍ସବରେ ଯୋଗ ଦେବାକୁ ଆସିଥିବା ମୁଖ୍ୟମନ୍ତ୍ରୀ ତାଙ୍କ ଅଭିଭାଷଣରେ ହଲଦ୍ୱାନୀ ହିଂସା ବିଷୟରେ ଉଲ୍ଲେଖ କରି କହିଥିଲେ ଯେ ମହିଳା ପୁଲିସ କର୍ମୀଙ୍କ ସମେତ ପୁଲିସ କର୍ମଚାରୀ ଓ ସାମ୍ବାଦିକଙ୍କୁ ଯେଉଁଭଳି ଭାବେ ଅରାଜକ ତତ୍ତ୍ୱମାନେ ଆକ୍ରମଣ କରୁଛନ୍ତି, ତାହାକୁ ଯେତେ ନିନ୍ଦା କରାଯିବ ତାହା କମ ହେବ। ବନଭୁଲପୁରାର ଏକ ବଗିଚାରୁ ଅନେକ ଏକର ଜମି ଜବରଦଖଲମୁକ୍ତ ହୋଇଛି। ମା' ଗଙ୍ଗାଙ୍କ ପବିତ୍ର କୂଳରୁ ଆଜି ମୁଁ ଘୋଷଣା କରୁଛି ଯେ ସେହି ସ୍ଥାନରେ ଏକ ଥାନା ନିର୍ମାଣ କରାଯିବ ।

ଗତ ଫେବ୍ରୁଆରି ୮ ତାରିଖରେ ବନଭୁଲପୁରା ଅଞ୍ଚଳରେ ଥିବା ମଲିକ କା ବାଗରେ ନିର୍ମିତ ଏକ ବେଆଇନ ମଦ୍ରାସା ଓ ନମାଜ ସ୍ଥଳ ଉଚ୍ଛେଦ ବେଳେ ଦୁର୍ବୃତ୍ତମାନେ ପ୍ରଶାସନିକ କର୍ମଚାରୀଙ୍କୁ ଆକ୍ରମଣ କରିଥିଲେ। ସେଠାରେ ପଥରମାଡ଼ ଓ ନିଆଁ ଲାଗିବା ସହ ବନଭୁଲପୁରା ଥାନା ମଧ୍ୟ ଜଳି ଯାଇଥିଲା। ଏହାର ଜବାବରେ ପୁଲିସ ବଳ ପ୍ରୟୋଗ କରିଥିଲା, ଯେଉଁଥିରେ ୬ ଜଣଙ୍କର ମୃତ୍ୟୁ ହୋଇଥିଲା। ଏହି ହିଂସାକାଣ୍ଡରେ ପୁଲିସ କର୍ମଚାରୀଙ୍କ ସମେତ ୧୦୦ରୁ ଅଧିକ ଲୋକ ଆହତ ହୋଇଛନ୍ତି।