ଆଧାର ଏକ ଗମ୍ଭୀର ମାମଲା, ଏଥିରେ ତ୍ରୁଟି ରହିଲେ ଗରିବ ଲୋକ ହଇରାଣ ହେବେ : ସୁପ୍ରିମକୋର୍ଟ
ନୂଆଦିଲ୍ଲୀ : ଆଧାରର ବୈଧତାକୁ ନେଇ ସୁପ୍ରିମକୋର୍ଟରେ ଚାଲିଥିବା ଶୁଣାଣୀ ଗୁରୁବାରଦିନ ସମାପ୍ତ ହୋଇଛି । ଏ ସଂପର୍କରେ ନିଜ ରାୟକୁ ସୁପ୍ରିମକୋର୍ଟ ସଂରକ୍ଷିତ ରଖିଛନ୍ତି । ତେବେ ଆଧାର ଏକ ଗମ୍ଭୀର ମାମଲା, ଏଥିରେ ତ୍ରୁଟି ରହିଲେ ଗରିବ ଲୋକ ହଇରାଣ ହେବାର ଆଶଙ୍କା ରହିଛି ବୋଲି ସୁପ୍ରିମକୋର୍ଟ୍ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ଶୁଣାଣିକୁ ଭାରତୀୟ ନ୍ୟାୟିକ ଇତିହାସରେ ୨ୟ ସର୍ବାଧିକ ସମୟ ଧରି ଚାଲିଥିବା ଶୁଣାଣି ବୋଲି କହିଛନ୍ତି ଆଟର୍ଣ୍ଣି ଜେନେରାଲ କେ.କେ. ଭେନୁଗୋପାଳ । ଏହି ଶୁଣାଣି ଦୀର୍ଘ ୩୮ ଦିନ ଧରି ଚାଲିିଥିଲା । ତେବେ ସବୁଠାରୁ ଲମ୍ବା ସମୟଧରି ଚାଲିଥିବା ଶୁଣାଣି ହେଉଛି କେଶବାନନ୍ଦ ଭାରତୀ ମାମଲା ଯାହାକି ଦୀର୍ଘ ୬୮ ଦିନ ପାଇଁ ଚାଲିଥିଲା । ଆଧାରର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ବିଭିନ୍ନ ସାମାଜିକ କର୍ମୀ ଓ ବୁଦ୍ଧିଜୀବି ଯଥା କର୍ଣ୍ଣାଟକ ହାଇକୋର୍ଟର ପୂର୍ବତନ ବିଚାରପତି କେଏସ ପୁଟ୍ଟୁସ୍ୱାମୀ, ମାଗାସେସେ ପୁରସ୍କାର ବିଜେତା ଶାନ୍ତା ସିହ୍ନା, ଗବେଷକ କଲ୍ୟାଣୀ ସେନ ମେନନ ପ୍ରମୁଖ ପିଟିସନ ଫାଇଲ କରିଥିଲେ । ଏହା ନାଗରିକର ବ୍ୟକ୍ତିଗତ ଗୋପନୀୟତାର ଅଧିକାରକୁ ହାନୀ ପହଞ୍ଚାଉଛି ବୋଲି ସେମାନେ ଦର୍ଶାଇଥିଲେ । ପ୍ରଧାନ ବିଚାରପତି ଦିପକ ମିଶ୍ରଙ୍କ ଅଧ୍ୟକ୍ଷତାରେ ଥିବା ୫ ଜଣିଆ ଖଣ୍ଡପୀଠ ଏସବୁ ଅଭିଯୋଗକାରୀଙ୍କୁ ଲିଖିତ ଅଭିଯୋଗ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।
ଦୀର୍ଘ ଚାରିମାସ ଧରି ଚାଲିଥିବା ଏହି ଶୁଣାଣି ବେଳେ ସରକାର ଆଧାରକୁ ମୋବାଇଲ ନମ୍ବର, ପ୍ୟାନକାର୍ଡ, ରାସନ କାର୍ଡ ଆଦି ସହ ଯୋଡିବା ନିଷ୍ପତ୍ତିକୁ ଠିକ ବୋଲି ଦର୍ଶାଇଥିଲେ । ତେବେ କୋର୍ଟ କହିଥିଲେ ଯେ ସରକାର କୋର୍ଟ ରାୟର ଭୁଲ ଅର୍ଥ ବାହାର କରି ଆଧାରକୁ ବାଧ୍ୟତାମୂଳକ କରିଛନ୍ତି ।