ମେହବୁବାଙ୍କ ମେଣ୍ଟ ପ୍ରସ୍ତାବକୁ ହସରେ ଉଡ଼ାଇଦେଲେ ଓମର ଅବଦୁଲ୍ଲା

ନୂଆଦିଲ୍ଲୀ: ଜମ୍ମୁ-କଶ୍ମୀରରେ ପ୍ରାୟ ୧୦ ବର୍ଷ ର ବ୍ୟବଧାନ ପରେ ବିଧାନସଭା ନିର୍ବାଚନ ହେବାକୁ ଯାଉଛି। କିଛି ଦିନ ତଳେ ନିର୍ବାଚନ କମିଶନ ଜମ୍ମୁ-କଶ୍ମୀରରେ ବିଧାନସଭା ନିର୍ବାଚନ କରିବାକୁ ଘୋଷଣା କରିଥିଲେ। ନିର୍ବାଚନ ତାରିଖ ମଧ୍ୟ ସ୍ଥିର ହୋଇଥିଲା। ଏହାପରଠାରୁ ଜମ୍ମୁ-କଶ୍ମୀରରେ ରାଜନୈତିକ ଉଷ୍ମତା ତୀବ୍ର ହେବାରେ ଲାଗିଛି। ବିଜେପି, ନ୍ୟାସନାଲ କନଫରେନ୍ସ, ପିଡିପି ଓ କଂଗ୍ରେସ ନିର୍ବାଚନ ପ୍ରସ୍ତୁତି ଜୋରଦାର କରିଛନ୍ତି । ନ୍ୟାସନାଲ କନଫରେନ୍ସ ଓ ପିଡିପି ମଧ୍ୟ ନିଜର ନିର୍ବାଚନୀ ଇସ୍ତାହାର ଜାରି କରିଛନ୍ତି । ଏଥିସହ ବିଭିନ୍ନ ରାଜନୈତିକ ଦଳ ମଧ୍ୟରେ ବୟାନବାଜି ମଧ୍ୟ ତୀବ୍ର ହେବାରେ ଲାଗିଛି। ମେହବୁବା ମୁଫତି ବନ୍ଧୁତାର ହାତ ବଢ଼ାଇବା ପରେ ଓମାର ଅବଦୁଲ୍ଲା ତାଙ୍କୁ ଉପହାସ କରିଛନ୍ତି। ସେପଟେ ନ୍ୟାସନାଲ କନଫରେନ୍ସ (ଏନସି) ଏବଂ ପିଡିପି ଲୋକଙ୍କୁ ବୋକା ବନାଉଛନ୍ତି ବୋଲି ବିଜେପି ଅଭିଯୋଗ କରିଛି।

 ମେହବୁବା ମୁଫତି କହିଥିଲେ ଯେ ବିଜେପିକୁ ପରାସ୍ତ କରିବା ପାଇଁ ସବୁ ଦଳ ଏକାଠି ଲଢ଼ିବା ଦରକାର। ବିଜେପିକୁ ପରାସ୍ତ କରିବା ପାଇଁ ଏହା ଜରୁରୀ ବୋଲି ପିଡିପି ମୁଖ୍ୟ କହିଛନ୍ତି। ଅନ୍ୟପକ୍ଷରେ ନ୍ୟାସନାଲ କନଫରେନ୍ସ ନେତା ଓମାର ଅବଦୁଲ୍ଲା କହିଛନ୍ତି ଯେ ପିଡିପି ଏନସି-କଂଗ୍ରେସ ପ୍ରାର୍ଥୀଙ୍କ ବିପକ୍ଷରେ ପ୍ରାର୍ଥୀ ଦେବା ଉଚିତ ନୁହେଁ। ଓମାର ଅବଦୁଲ୍ଲା ମଧ୍ୟ ମେହବୁବା ମୁଫତିଙ୍କୁ ତାଙ୍କ ଦଳ ପକ୍ଷରୁ ଜାରି କରାଯାଇଥିବା ଇସ୍ତାହାରକୁ ନକଲ କରିଥିବାରୁ ସମାଲୋଚନା କରିଛନ୍ତି। କଂଗ୍ରେସ-ଏନସି ପ୍ରାର୍ଥୀଙ୍କ ଏଜେଣ୍ଡା ସମାନ ଥିବାରୁ ସେମାନଙ୍କ ବିରୋଧରେ ପ୍ରାର୍ଥୀ ନଦେବାକୁ ସେ ପିଡିପିକୁ କହିଛନ୍ତି।