ଡିଭାଇଡରରେ ପିଟି ହେବା ପରେ ରାଜପଥରେ ୧୫ଥର ଓଲଟିଲା କାର

ନୂଆଦିଲ୍ଲୀ:ଗତମଙ୍ଗଳବାର ସକାଳେ କର୍ଣ୍ଣାଟକର ଜାତୀୟରାଜପଥ-୧୫୦ଏରେ ଏକ ଭୟାବହ ଦୁର୍ଘଟଣା ଘଟିଥିଲା। ଯାହାର ଭିଡିଓ ଏବେ ସୋସିଆଲ ମିଡିଆ ଜରିଆରେ ସାମ୍ନାକୁ ଆସିଛି। 

ସୂଚନାଯୋଗ୍ୟ, ଚିତ୍ରଦୁର୍ଗା ଜିଲ୍ଲାର ମୋନକଲମୁରୁ ଅଞ୍ଚଳସ୍ଥ ବୋମ୍ମକ୍କନହଲ୍ଲୀ ମସଜିଦ ନିକଟରେ ଏହି ଦୁର୍ଘଟଣା ଘଟି ଥିଲା। ଏହି ଦୁର୍ଘଟଣାରେ ତିନି ଜଣ ପ୍ରାଣ ହରାଇଛନ୍ତି। ମୃତକଙ୍କ ମଧ୍ୟରେ ଦୁଇ ଜଣ ଶିଶୁ ମଧ୍ୟ ଅଛନ୍ତି। 

ଦୁର୍ଘଟଣାଗ୍ରସ୍ତ କାରଟି ଚଲ୍ଲକେରେରୁ ମୋଲାକାଲମୁରୁ ଦେଇ ବେଲ୍ଲାରୀ ଅଭିମୁଖେ ଯାଉଥିଲା। ଏହି ମର୍ମନ୍ତୁଦ ଦୁର୍ଘଟଣାର ସିସିଟିଭି ଫୁଟେଜ୍ ସାମ୍ନାକୁ ଆସିଛି। ଯେଉଁଥିରେ ଏକ କାର ଡିଭାଇଡରରେ ପିଟି ହେବା ପରେ ୧୫ଥର ରାଜପଥରେ ଓଲଟି ପଡ଼ୁଥିବା ଦେଖିବାକୁ ମିଳୁଛି। 

ଏହି ଦୁର୍ଘଟଣାରେ ପ୍ରାଣ ହରାଇଥିବା ମୃତକଙ୍କ ମଧ୍ୟରେ ୩୫ ବର୍ଷୀୟ ମୌଲା ଅବଦୁଲ, ମୌଲାଙ୍କ ଦୁଇପୁଅ ରେହମାନ (୧୫ ବର୍ଷ) ଏବଂ ସମୀର (୧୦ ବର୍ଷ) ଅଛନ୍ତି। ମୌଲାଙ୍କ ସ୍ତ୍ରୀ ସଲିମା ବେଗମ, ତାଙ୍କ ମାଆ ଫାତିମା ଦୁର୍ଘଟଣାରେ ଗୁରୁତର ଆହତ ହୋଇଛନ୍ତି। ପୁଲିସ ଆହତଙ୍କୁ ଉଦ୍ଧାର କରି ତାଙ୍କୁ ବଲ୍ଲାରି ଭିଆଇଏମଏସ ହସ୍ପିଟାଲରେ ଭର୍ତ୍ତି କରିଛି। ରାମପୁର ପୁଲିସ ଘଟଣାସ୍ଥଳ ପରିଦର୍ଶନ କରି ଏକ ମାମଲା ରୁଜୁ କରିଛି।