ନୂଆଦିଲ୍ଲୀ: ହିମାଚଳ ପ୍ରଦେଶର କୁଲୁ ଜିଲ୍ଲାରେ ନିର୍ମାଣ ହୋଇଥିବା ୯.୦୨ କିଲୋମିଟର ଲମ୍ବା ଅଟଳ ଟନେଲରେ ଉଦଘାଟନ ପରେ ଦୁର୍ଘଟଣା ଘଟିବାରେ ଲାଗିଛି | ବିଶ୍ୱର ଦୀର୍ଘତମ ଟନେଲରେ ଉଦଘାଟନ ପରେ ପର୍ଯ୍ୟଟକମାନେ ଆସିବା ଆରମ୍ଭ କରିଥିଲେ, କିନ୍ତୁ ସେମାନେ ନିୟମ ପାଳନ କରୁନାହାନ୍ତି ଏବଂ ଦୁର୍ଘଟଣାର ଶିକାର ହେଉଛନ୍ତି। ଅକ୍ଟୋବର ୩ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଟନେଲର ଉଦଘାଟନ କରିଥିଲେ, କିନ୍ତୁ ପରଦିନ ବେପରୁଆ ଗାଡି ଚଳାଇବା ଏବଂ ସେଲଫି ନେବା ଦ୍ୱାରା ତିନୋଟି ଦୁର୍ଘଟଣା ଘଟିଥିଲା। ଏହାକୁ ନେଇ ବିଆର୍ଓ (ବର୍ଡର ରୋଡ୍ ଅର୍ଗାନାଇଜେସନ୍)ର ଚିଫ ଇଂଜିନିୟର ବ୍ରିଗେଡିୟର୍ କେ.ପି. ପୁରୁଷୋତ୍ତମ କହିଛନ୍ତି ଯେ ଡ୍ରାଇଭରମାନେ ଟ୍ରାଫିକ ନିୟମ ଉଲ୍ଲଂଘନ କରୁଛନ୍ତି।
Sambad is now on WhatsApp
Join and get latest news updates delivered to you via WhatsApp
ସିସିଟିଭିରେ ଦେଖିବାକୁ ମିଳିଛି ଯେ ସେଲଫି ନେବା ପାଇଁ ଡ୍ରାଇଭରମାନେ ଟନେଲ ଭିତରେ ସେମାନଙ୍କ ଗାଡି ଅଟକାଇଥିବା ବେଳେ ଟନେଲ ଭିତରେ କାହାକୁ ପାର୍କିଂ କରିବାକୁ ଦିଆଯାଇନଥିଲା। ସେ କହିଛନ୍ତି ଯେ ଟନେଲର ଡବଲ୍ ଲେନ୍ ସତ୍ତ୍ୱେ ଓଭରଟେକିଂ ମଧ୍ୟ ଅନୁମତି ନାହିଁ | ଅଧିକାଂଶ ପର୍ଯ୍ୟଟକ ଟନେଲ ଭିତରେ ଗାଡି ରଖି ସେଲ୍ଫି ନେଉଥିବାରୁ ଅଧିକ ଦୁର୍ଘଟଣା ଘଟୁଛି | ସୂଚନା ଥାଉ କି ବିଆର୍ଓ (ବର୍ଡର ରୋଡ୍ ଅର୍ଗାନାଇଜେସନ୍) ଦ୍ବାରା ଏହି ସୁଡ଼ଙ୍ଗ ନିର୍ମାଣ ହୋଇଛି। ଏହି ରାଜପଥ ସୁଡ଼ଙ୍ଗ ଦ୍ବାରା ମନାଲୀ ଏବଂ ଲେହ ମଧ୍ୟରେ ଦୂରତା ପ୍ରାୟ ୪୬ କିମି କମିଯିବ। ୯.୦୨ କିମିର ଏହି ସୁଡ଼ଙ୍ଗ ମନାଲିକୁ ଲହୌଲ୍ ସ୍ପିଟି ଉପତ୍ୟକା ସହ ସଂଯୋଗ କରିବ। ପୂର୍ବରୁ ଏହି ଉପତ୍ୟକା ପ୍ରତିବର୍ଷ ପ୍ରାୟ ୬ ମାସ ପାଇଁ ପ୍ରବଳ ବରଫପାତ ପାଇଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଏ।
ଉଲ୍ଲେଖଯୋଗ୍ୟ ଯେ, ଅଟଳ ବାଜପେୟୀ ସରକାର ଜୁନ୍ ୩, ୨୦୦୦ରେ ରୋହତଗ୍ ପାସ୍ ତଳେ ଏକ ଷ୍ଟ୍ରାଟେଜିକ୍ ସୁଡ଼ଙ୍ଗ ନିର୍ମାଣର ନିଷ୍ପତ୍ତି ନେଇଥିଲେ। ମେ’ ୨୬, ୨୦୦୦ରେ ଏଥିପାଇଁ ଶିଳାନ୍ୟାସ କରାଯାଇଥିଲା। ମୋଦୀ ସରକାର ଏହି ରୋହତଗ ସୁଡ଼ଙ୍ଗକୁ ଅଟଳ ସୁଡ଼ଙ୍ଗ ନାମରେ ନାମିତ କରିବାପାଇଁ ନିଷ୍ପତ୍ତି ନେଇଥିଲେ। ଗତ ବର୍ଷ ପରଲୋକ ଗମନ କରିଥିବା ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କୁ ସମ୍ମାନ ଦେବାକୁ ଯାଇ ଏହି ସୁଡ଼ଙ୍ଗର ନାମ ଅଟଳ ସୁଡ଼ଙ୍ଗ ରଖାଯାଇଛି।