ମୁମ୍ବାଇ: ବିଶିଷ୍ଟ ଅଭିନେତା ଗୁଫି ପେଣ୍ଟଲଙ୍କର ଆଜି ମୁମ୍ବାଇଠାରେ ପରଲୋକ ହୋଇଯାଇଛି। ତାଙ୍କୁ ୭୯ ବର୍ଷ ବୟସ ହୋଇଥିଲା। ବି. ଆର୍. ଚୋପ୍ରାଙ୍କ ପ୍ରସିଦ୍ଧ ଟିଭି ଧାରାବାହିକ ମହାଭାରତରେ ସେ ଶକୁନି ମାମା ଚରିତ୍ରରେ ଅଭିନୟ କରି ଖ୍ୟାତି ଅର୍ଜନ କରିଥିଲେ। ଦୀର୍ଘଦିନ ଧରି ଗୁଫି ଅସୁସ୍ଥ ଥିଲେ ଏବଂ ମେ ୩୧ ତାରିଖରେ ଡାକ୍ତରଖାନାରେ ଭର୍ତ୍ତି ହୋଇଥିଲେ। ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ଆଇସିୟୁରେ ଭେଣ୍ଟିଲେଟରରେ ରଖାଯାଇଥିଲା। ତାଙ୍କ ପରଲୋକରେ ବିଶିଷ୍ଟ ବ୍ୟକ୍ତିମାନେ ଶୋକବ୍ୟକ୍ତ କରିଛନ୍ତି। ପରିବାର, ବନ୍ଧୁ ଏବଂ ସିନେମା ଇଣ୍ଡଷ୍ଟ୍ରିର ସଦସ୍ୟମାନଙ୍କ ଗହଣରେ ଅନ୍ଧେରିଠାରେ ଆଜି ତାଙ୍କର ଶେଷକୃତ୍ୟ ସଂପନ୍ନ ହୋଇଛି। ତାଙ୍କ ଭାଇ ତଥା ଅଭିନେତା କନୱରଜିତ ପେଣ୍ଟଲ ଏବଂ ପୁଅ ହାରି ପେଣ୍ଟଲ ଶେଷକୃତ୍ୟ ସଂପନ୍ନ କରିଥିଲେ। ଶେଷକୃତ୍ୟ ବେଳେ ଶ୍ମଶାନରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ଗୁଫି ପେଣ୍ଟଲ ଅନେକ ଲୋକପ୍ରିୟ ଟିଭି କାର୍ଯ୍ୟକ୍ରମ ଓ ସିନେମାରେ ଅଭିନୟ କରି ଚର୍ଚ୍ଚିତ ହୋଇଥିଲେ। ମହାଭାରତ ବ୍ୟତୀତ ସେ କାନୁନ, ଓଁ ନମଃ ଶିବାୟ, ସିଆଇଡି, ସି କୋଇ ହୈ, ଦ୍ବାରକାଧୀଶ ଭଗବାନ ଶ୍ରୀକୃଷ୍ଣ, ରାଧାକୃଷ୍ଣ ଓ ଜୟ କହ୍ନେୟା ଲାଲ କୀ ରେ ଅଭିନୟ କରିଥିଲେ। ୧୯୭୫ରେ ରଫୁ ଚକ୍କର ସିନେମାରୁ ସେ ନିଜର ଅଭିନୟ ଯାତ୍ରା ଆରମ୍ଭ କରି ପରବର୍ତ୍ତୀ ସମୟରେ ଦିଲେଗି, ଦେଶ୍ ପରଦେଶ୍ ଓ ସୁହାଗ ଭଳି ସିନେମାରେ ଅଭିନୟର ଯାଦୁ ଦେଖାଇଥିଲେ।