ହଟିଲେ ମନୋଜ ତିୱାରୀ, ଆଦେଶ ଗୁପ୍ତା ଦିଲ୍ଲୀ ବିଜେପିର ନୂଆ ସଭାପତି
ନୂଆଦିଲ୍ଲୀ : ଦେଶରେ କରୋନା ଭାଇରସ ମହାମାରୀ ମଧ୍ୟରେ ଦିଲ୍ଲୀ ବିଜେପିରେ ଏକ ଛୋଟ ମାତ୍ର ମହତ୍ୱପୂର୍ଣ୍ଣ ପରିବର୍ତ୍ତନ ହୋଇଯାଇଛି । ଦଳ ପକ୍ଷରୁ ମନୋଜ ତିୱାରୀଙ୍କୁ ହଟାଇ ଆଦେଶ କୁମାର ଗୁପ୍ତାଙ୍କୁ ଦିଲ୍ଲୀ ବିଜେପିର ନୂଆ ସଭାପତି ନିଯୁକ୍ତ କରାଯାଇଛି । ଏ ସଂପର୍କରେ ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କ ପକ୍ଷରୁ ସୂଚନା ଦିଆଯାଇଛି । ସେହିପରି ପୂର୍ବତନ କେନ୍ଦ୍ରମନ୍ତ୍ରୀ ବିଷ୍ଣ ଦେଓ ସାଇଙ୍କୁ ଛତିଶଗଡ଼ ବିଜେପିର ସଭାପତି ଓ ପ୍ରଫେସର ଟିକେନ୍ଦ୍ର ସିଂ ଙ୍କୁ ମଣିପୁର ବିଜେପି ସଭାପତି ନିଯୁକ୍ତ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗତ ଦିଲ୍ଲୀ ବିଧାନସଭା ନିର୍ବାଚନରେ ବିଜେପିର ଶୋଚନୀୟ ପରାଜୟ ପରେ ମନୋଜ ତିୱାରୀଙ୍କୁ ହଟାଇବାକୁ ଦଳ ଭିତରୁ ଦାବି ଉଠିଥିଲା । କିନ୍ତୁ ସେତେବେଳେ ତାହାକୁ ଟାଳିଦିଆଯାଇଥିଲା । ଆଜି କାର୍ଯ୍ୟଭାର ଗ୍ରହଣ କରିବା ପରେ ଗୁପ୍ତା କହିଛନ୍ତି ଯେ ସେ ଦିଲ୍ଲୀରେ ଦଳର ସ୍ଥିତିକୁ ସୁଧାରିବାକୁ ଉଦ୍ୟମ କରିବେ । ସମସ୍ତଙ୍କୁ ନେଇ ସେ ଦଳରେ ଥିବା ମତଭେଦକୁ ଦୂର କରିବେ ଓ ଦିଲ୍ଲୀରେ ହେବାକୁ ଥିବା ଆଗାମୀ ନିଗର ନିଗମ ନିର୍ବାଚନ ଉପରେ ସେ ଗୁରୁତ୍ବ ଦେବେ ବୋଲି କହିଛନ୍ତି । ସେ ମଧ୍ୟ ଦିଲ୍ଲୀରେ କରୋନା ପରିଚାଳନା ବେଳେ ହେଉଥିବା ଅବ୍ୟବସ୍ଥାକୁ ନେଇ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କୁ ସମାଲୋଚନା କରିଛନ୍ତି ।
ସଭାପତି ପଦରୁ ହଟିବା ପରେ ପ୍ରତିକ୍ରିୟା ପ୍ରକାଶ କରି ମନୋଜ ତିୱାରୀ କହିଛନ୍ତି ଯେ ଗତ ସାଢେ ୩ ବର୍ଷ ଧରି ଦିଲ୍ଲୀ ବିଜେପି ସଭାପତି ଭାବେ ତାଙ୍କୁ ଯେଉଁ ସମର୍ଥ ମିଳଛି ସେଥିପାଇଁ ସେ କୃତଜ୍ଞ ।