ରାୟବରେଲି: ପଞ୍ଜାବର ନବାଁସହରରୁ ଗତଥର ଜିତିଥିବା ବିଧାୟକ ଅଙ୍ଗଦ ସିଂଙ୍କୁ ଏଥର କଂଗ୍ରେସ ଟିକେଟ୍ ଦେଇନାହିଁ। ଉତ୍ତର ପ୍ରଦେଶର ରାୟବରେଲି ସଦର ଆସନର ବିଧାୟକ ଅଦିତି ସିଂଙ୍କ ସ୍ୱାମୀ ହେଉଛନ୍ତି ଅଙ୍ଗଦ ସିଂ। ଏହି ଘଟଣା କେବଳ ପଞ୍ଜାବରେ ନୁହେଁ, ବରଂ ରାୟବରେଲିରେ ମଧ୍ୟ ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।
ବୁଧବାର ବିଜେପି ପ୍ରାର୍ଥୀ ଭାବେ ନାମାଙ୍କନ ଦାଖଲ କରିବାକୁ ଆସିଥିବା ଅଦିତି ଏହି ପ୍ରସଙ୍ଗରେ କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧିଙ୍କୁ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି ଯେ ପ୍ରିୟଙ୍କା ତାଙ୍କ ପରିବାରକୁ ବହୁତ ହଇରାଣ କରିଥିଲେ। ତାଙ୍କ ସ୍ୱାମୀଙ୍କ ଟିକେଟ୍ କଟାଯାଇଛି। ସ୍ୱାମୀ ଅଙ୍ଗଦ ସିଂଙ୍କୁ ଟିକେଟ୍ ଦିଆଯିବାର କଂଗ୍ରେସ ପକ୍ଷରୁ ସ୍ଥିରୀକୃତ ହୋଇଥିଲା। କିନ୍ତୁ ସେଥିରେ ଏକ ସର୍ତ୍ତ ରଖାଯାଇଥିଲା। ତାହା ହେଲା ଯେ କେବଳ ମୋ ବିରୁଦ୍ଧରେ ପ୍ରଚାର କରିବା।
ସେ କହିଛନ୍ତି, ପ୍ରିୟଙ୍କା ଗାନ୍ଧି ହିଁ ମୋ ସ୍ୱାମୀଙ୍କ ଟିକେଟ କାଟିଛନ୍ତି। ଏଥିପାଇଁ କୌଣସି ଯଥାର୍ଥତା ନାହିଁ, ଏପରି ଅନେକ ସ୍ୱାମୀ-ସ୍ତ୍ରୀ ଅଛନ୍ତି, ପରିବାର ସଦସ୍ୟ ଅଛନ୍ତି, ଯେଉଁମାନେ ବିଭିନ୍ନ ପାର୍ଟିରେ ଅଛନ୍ତି।
ସେ ଆହୁରି ମଧ୍ୟ କହିଛନ୍ତି, ଯଦି ପ୍ରିୟଙ୍କାଙ୍କର ଝିଅମାନଙ୍କର ଆତ୍ମସମ୍ମାନ ଉପରେ ବିଶ୍ବାସ ଅଛି, ତେବେ ସେ ଏପରି କରିନଥାନ୍ତେ। ମୋର ଆଦର୍ଶ କଂଗ୍ରେସ ସହିତ ମେଳ ଖାଉ ନାହିଁ, ଏହା ଅଙ୍ଗଦଙ୍କ ସହିତ ମେଳ ଖାଉଥିଲା। ଯଦି ପ୍ରିୟଙ୍କା ମହିଳା ସଶକ୍ତିକରଣ ବିଷୟରେ ଚିନ୍ତା କରୁଛନ୍ତି, ତେବେ ପଞ୍ଜାବ ଏବଂ ଉତ୍ତରାଖଣ୍ଡ ଓ ଗୋଆରେ ଏତେ କମ୍ ମହିଳାଙ୍କୁ କାହିଁକି ଟିକେଟ୍ ଦେଇଛନ୍ତି ବୋଲି ଅଦିତି ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ, ପୂର୍ବତନ ବିଧାୟକଙ୍କ କନ୍ୟା ଅଦିତି ସିଂ ୨୦୧୭ରେ ପ୍ରଥମ ଥର ପାଇଁ ରାୟବରେଲି ସଦର ଆସନରୁ ନିର୍ବାଚିତ ହୋଇ ବିଧାୟକ ପଦ ମଣ୍ଡନ କରିଥିଲେ। ସେ ପଞ୍ଜାବର ନବାଁସହରରୁ ନିର୍ବାଚିତ କଂଗ୍ରେସ ବିଧାୟକ ଅଙ୍ଗଦ ସିଂଙ୍କୁ ବିବାହ କରିଥିଲେ। ବିଧାନସଭା ନିର୍ବାଚନ ପୂର୍ବରୁ ଅଦିତି ବିଜେପିରେ ଯୋଗ ଦେଇଥିଲେ। ଏଥର ସେ ବିଜେପି ଟିକେଟରେ ନିର୍ବାଚନ ଲଢୁଛନ୍ତି।