ମହାରାଷ୍ଟ୍ର ରାଜନୀତି : ରାଜ୍ୟପାଳଙ୍କୁ ଭେଟି ସରକାର ଗଠନ ପାଇଁ ଦାବି କଲେ ଶିବସେନା ନେତା ଆଦିତ୍ୟ ଠାକରେ, ସମର୍ଥନ ନେଇ ଆଭିମୁଖ୍ୟ ସ୍ପଷ୍ଟ କରିନାହିଁ କଂଗ୍ରେସ
ମୁମ୍ବାଇ : ମହାରାଷ୍ଟ୍ର ନିର୍ବାଚନ ଫଳାଫଳ ପ୍ରକାଶ ପାଇବାର ୧୮ ଦିନ ହୋଇଥିଲେ ମଧ୍ୟ ଏ ପର୍ଯ୍ୟନ୍ତ ଅଚଳାବସ୍ଥା ଦୂର ହୋଇନାହିଁ । ତେବେ ଶିବସେନା ନେତୃତ୍ୱରେ ସରକାର ଗଠନ ନେଇ ଆଶା ସୃଷ୍ଟି ହୋଇଛି । ମିଳିଥିବା ସର୍ବଶେଷ ସୂଚନା ମୁତାବକ କିଛି ସମୟ ପୂର୍ବରୁ ଶିବସେନା ନେତା ଆଦିତ୍ୟ ଠାକରେ ଦଳର କେତେକ ବରିଷ୍ଠ ନେତାଙ୍କ ସହ ମହାରାଷ୍ଟ୍ର ରାଜଭବନରେ ପହଞ୍ଚିଛନ୍ତି ଓ ରାଜ୍ୟପାଳ ଭଗତ ସିଂ କୋସ୍ୟାରୀଙ୍କୁ ଭେଟି ସରକାର ଗଠନ ପାଇଁ ଦାବି କରିଛନ୍ତି । ଆଜି ସଂଧ୍ୟା ସାଢେ ୭ଟା ସୁଦ୍ଧା ଆବଶ୍ୟକ ବିଧାୟକଙ୍କ ସମର୍ଥନ ପ୍ରଦାନ ପାଇଁ ରାଜ୍ୟପାଳ ଶିବସେନାକୁ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କିଛି ସମୟ ପୂର୍ବରୁ ଶିବସେନା ମୁଖ୍ୟ ଉଦ୍ଧବ ଠାକରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧିଙ୍କ ସହ ଫୋନ ଯୋଗେ କଥା ହୋଇଛନ୍ତି । ଏହି ଅବସରରେ ସରକାର ଗଠନ ପାଇଁ ଉଦ୍ଧବ ସୋନିଆଙ୍କ ସମର୍ଥନ ଲୋଡିଥିଲେ । କିନ୍ତୁ ଏପର୍ଯ୍ୟନ୍ତ ସୋନିଆ ନିଜର ନିଷ୍ପତ୍ତି ସାର୍ବଜନୀନ କରିନାହାନ୍ତି । ସମର୍ଥନର ସର୍ତ୍ତାବଳୀ ସଂପର୍କରେ ଏବେ ବି କଂଗ୍ରେସରେ ବିଚାର ବିମର୍ଷ ଜାରି ରହିଥିବା ଜଣାଯାଇଛି । କିନ୍ତୁ କଂଗ୍ରେସ ସମର୍ଥନ ଦେଇପାରେ ବୋଲି ଆଲୋଚନା ହେଉଛି । ମାତ୍ର ଏ ଯାବତ୍ କଂଗ୍ରେସ ନିଜର ଆଭିମୁଖ୍ୟ ସ୍ପଷ୍ଟ କରିନାହିଁ।
ଆଜି ଶିବସେନା ମୁଖ୍ୟ ଉଦ୍ଧବ ଠାକରେ ଏନସିପି ନେତା ଶରଦ ପାଓ୍ଵାରଙ୍କ ସହ ଆଲୋଚନା କରି ସମର୍ଥନ ଲୋଡିଥିଲେ । ତେବେ ସମର୍ଥନ ବ୍ୟାପାରରେ କଂଗ୍ରେସର ନିଷ୍ପତ୍ତି ଉପରେ ସବୁକିଛି ନିର୍ଭର କରେ ବୋଲି ଶରଦ ଜଣାଇଦେଇଥିଲେ ।