ଇଲେକ୍ଟୋରାଲ୍ ବଣ୍ଡ ମାଧ୍ୟମରେ ୪୪୭ କୋଟି ଟଙ୍କା ଆୟ କରିଛନ୍ତି ୧୪ ଆଞ୍ଚଳିକ ରାଜନୈତିକ ଦଳ
ଭୁବନେଶ୍ୱର: ଦେଶର ବିଭିନ୍ନ ଆଞ୍ଚଳିକ ଦଳ ପକ୍ଷରୁ ନିର୍ବାଚନ ଆୟୋଗଙ୍କ ନିକଟରେ ଦାଖଲ ହୋଇଥିବା ଅଡିଟ ରିପୋର୍ଟରେ ଦିଆଯାଇଥିବା ଆୟ-ବ୍ୟୟର ହିସାବକୁ ନେଇ ରିପୋର୍ଟ ପ୍ରକାଶ କରିଛି ଇଲେକସନ୍ ୱାଚ୍ | ଏହି ରିପୋର୍ଟ ମୁତାବକ ୨୦୧୯-୨୦ ଆର୍ଥିକ ବର୍ଷରେ ୪୨ଟି ଦଳ ଇଲେକ୍ଟୋରାଲ୍ ବଣ୍ଡ ମାଧ୍ୟମରେ ମୋଟ ୮୭୭.୯୫ କୋଟି ଟଙ୍କା ଆୟ କରିଛନ୍ତି | ଏହି ୪୨ଟି ଦଳ ମଧ୍ୟରୁ ଟିଆରଏସ ସର୍ବାଧିକ ୧୩୦.୪୬ କୋଟି ଟଙ୍କା, ଶିବସେନା ୧୧୧.୪୦ କୋଟି ଟଙ୍କା ଆୟ କରିଛନ୍ତି | ଏହି କ୍ରମରେ ବିଜୁ ଜନତା ଦଳକୁ କେତେ ଟଙ୍କା ମିଳିଛି ଓ ଦଳ କେତେ ଟଙ୍କା ଖର୍ଚ୍ଚ କରିଛି ସେ ନେଇ ରିପୋର୍ଟରେ ତଥ୍ୟ ପ୍ରକାଶ ପାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ବିଜେଡ଼ି ଏହି ଆର୍ଥିକ ବର୍ଷରେ ମୋଟ ୯୦.୩୫ କୋଟି ଟଙ୍କା ଆୟ କରିଛି | ଏହି ରିପୋର୍ଟ ମୁତାବକ ୨୩ଟି ଦଳ ୨୦୧୮-୧୯ ଆର୍ଥିକ ବର୍ଷ ତୁଳନାରେ ୨୦୧୯-୨୦ରେ ନିଜର ଆୟରେ ବୃଦ୍ଧି ଦର୍ଶାଇଥିବାବେଳେ ୧୬ଟି ଦଳ ନିଜ ଆୟ କମିଥିବାର ଦର୍ଶାଇଛନ୍ତି | ଆର୍ଥିକ ବର୍ଷ ୨୦୧୯-୨୦ରେ ୨୪ଟି ଦଳ ନିଜର ଆୟ ତୁଳନାରେ କମ ଖର୍ଚ୍ଚ କରିଥିବାର କହିଥିଵାବେଳେ ୧୮ଟି ଦଳ ନିଜ ଆୟଠାରୁ ଅଧିକ ଖର୍ଚ୍ଚ କରିଛନ୍ତି | ଆଉ ଆୟ ତୁଳନାରେ ଅଧିକ ଖର୍ଚ୍ଚ ତାଲିକାରେ ବିଜେଡ଼ି ସବୁଠାରୁ ଆଗରେ ରହିଛି | ବିଜେଡ଼ି ନିଜ ଆୟ ତୁଳନାରେ ୯୫.୭୮ କୋଟି ଟଙ୍କା(୧୦୬.୦୧%) ଅଧିକ ଖର୍ଚ୍ଚ କରିଛି |
୨୦୧୯-୨୦ ଆର୍ଥିକ ବର୍ଷରେ ୪୨ଟି ଆଞ୍ଚଳିକ ଦଳ ସମୁଦାୟ ୭୪୨.୫୩ କୋଟି ଟଙ୍କା ଖର୍ଚ୍ଚ କରିଥିବାର ଦର୍ଶାଇଛନ୍ତି | ସବୁଠାରୁ ଅଧିକ ଖର୍ଚ୍ଚ କରିଥିବା ଦଳ ତାଲିକାରେ ବିଜେଡ଼ି(୧୮୬.୧୩କୋଟି), ଟିଡ଼ିପି(୧୦୮କୋଟି), ଶିବସେନା(୯୮ କୋଟି), ଡ଼ିଏମକେ(୭୧ କୋଟି) ଓ ସମାଜବାଦୀ ପାର୍ଟି(୫୫.୬୯ କୋଟି) ଖର୍ଚ୍ଚ କରିଛନ୍ତି | ବିଜେଡ଼ି ଆୟ କରିଥିବା ୯୦ କୋଟି ଟଙ୍କାରୁ ୫୦ କୋଟି ୫୦ ଲକ୍ଷ ଟଙ୍କା ଇଲେକ୍ଟ୍ରୋରାଲ ବଣ୍ଡ, ୨୮ କୋଟି ୨୦ ଲକ୍ଷ ଟଙ୍କା ଦାନ ଓ ୧୧ କୋଟି ୬୫ ଲକ୍ଷ ଟଙ୍କା ଅନ୍ୟ ସୂତ୍ରରୁ ମିଳିଥିବା ଦର୍ଶାଇଛି |