ନୂଆଦିଲ୍ଲୀ: ନିଜ ଯାତ୍ରା ଆରମ୍ଭ କରିବା ପୂର୍ବରୁ ବିଜ୍ଞାପନମୁକ୍ତ ଥିବା ହ୍ବାଟ୍‌ସଆପ୍‌ରେ ଖୁବ୍‌ଶୀଘ୍ର ବିଜ୍ଞାପନ ଦେଖିବାକୁ ମିଳିବ। କମ୍ପାନି ଏବେ ନିଜକୁ ଆୟର ଏକ ଉତ୍ସରେ ପରିଣତ କରିବାକୁ ଲକ୍ଷ୍ୟ ରଖିଛି। ଦୀର୍ଘଦିନ ଧରି ବିଜ୍ଞାପନ ରାଜସ୍ବ ହାସଲ କରି ନଥିଲେ ମଧ୍ୟ ଏହା ଆର୍ଥିକ ସ୍ଥିତିକୁ ନଜରରେ ରଖି ନିଜ ନୀତି ବଦଳାଇଛି। ତେବେ ବିଜ୍ଞାପନ କେବଳ ଅପ୍‌ଡେଟ୍‌ ଟ୍ୟାବ୍‌ରେ ରହିବ। ଲୋକମାନଙ୍କ ଚାଟ୍‌ ଉପ‌ରେ ତାହାର କୌଣସି ପ୍ରଭାବ ପଡ଼ିବ ନାହିଁ। ଅପ୍‌ଡେଟ୍‌ ଟ୍ୟାବ୍ ଅଧୀନରେ ‘ଚ୍ୟାନେଲ୍‌’ ଓ ‘ଷ୍ଟାଟସ୍‌’ ରହିଛି। 
ସାରା ବିଶ୍ବରେ ୧୫୦ କୋଟିରୁ ଅଧିକ ଲୋକ ହ୍ବାଟସ୍‌ଆପ୍ ବ୍ୟବହାର କରୁଛନ୍ତି। ଯୋଗାଯୋଗ ଲାଗି ଏହା ଏକ ବଳିଷ୍ଠ ମାଧ୍ୟମ ପାଲଟିଛି। ୨୦୧୪ରେ ମାର୍କ ଜକରବର୍ଗଙ୍କ କମ୍ପାନି ମେଟା ଏହାକୁ ଅଧିଗ୍ରହଣ କରିଥିଲା। କମ୍ପାନି ପକ୍ଷରୁ କୁହାଯାଇଛି ଯେ ଯେଉଁମାନେ କେବଳ ମେସେଜିଂ ପାଇଁ ହ୍ବାଟସ୍‌ଆପ୍ ବ୍ୟବହାର କରୁଛନ୍ତି, ସେମାନେ କୌଣସି ପ୍ରକାରରେ ପ୍ରଭାବିତ ହେବେ ନାହିଁ। ଚାଟ୍‌, କଲ୍‌ ଓ ଗ୍ରୁପ୍‌ରେ କୌଣସି ବିଜ୍ଞାପନ ଦେଖିବାକୁ ମିଳିବ ନାହିଁ। ସେଗୁଡ଼ିକ ପୂର୍ବଭଳି ଏଣ୍ଡ୍‌ ଟୁ ଏଣ୍ଡ୍‌ ଏନ୍‌କ୍ରିପ୍‌ସନ୍ ହୋଇରହିବ। ନୂଆ ବ୍ୟବସ୍ଥା‌ରେ ଡିସ୍‌କଭରି ସେକ୍ସନ୍‌ରେ ପ୍ରଚାରଧର୍ମୀ ଚ୍ୟାନେଲ୍‌ ରହିବ। ଷ୍ଟାଟସ୍‌ରେ ବିଜ୍ଞାପନ ଦେଖାଯିବ।
ହ୍ବାଟସ୍‌ଆପ୍‌ରେ ଏହ‌ି ପରିବର୍ତ୍ତନ ଆସନ୍ତା କିଛି ମାସ ମଧ୍ୟରେ ଆରମ୍ଭ ହେବ। ଅଳ୍ପ କିଛି ଦେଶରୁ ତାହା ଆରମ୍ଭ ହୋଇ ପରବର୍ତ୍ତୀ ସମୟରେ ବିଭିନ୍ନ ଦେଶକୁ ସମ୍ପ୍ରସାରିତ କରାଯିବ। ଦୀର୍ଘଦିନରୁ ବିଶେଷଜ୍ଞମାନେ ପୂର୍ବାନୁମାନ କରିଥିଲେ ଯେ ଯେଉଁଭଳି କୋଟି କୋଟି ଲୋକ ହ୍ବାଟସ୍‌ଆପ୍‌କୁ ବ୍ୟବହାର କରୁଛନ୍ତି, ତାହାର ଲାଭ ହାସଲ କରିବା ଲାଗି ଦିନେ ନା ଦିନେ ହ୍ବାଟସ୍‌ଆପ୍‌ରେ ବିଜ୍ଞାପନ ଦିଆଯିବ। ‌ତାହା ସତ ହେବାକୁ ଯାଉଛି।