ରାମଲାଲାଙ୍କ ପ୍ରାଣପ୍ରତିଷ୍ଠା କାର୍ଯ୍ୟକ୍ରମରେ ଯୋଗ ଦେଇପାରନ୍ତି ଆଡ଼ଭାନୀ ଓ ମୁରଲୀ ମନୋହର ଯୋଶୀ

ନୂଆଦିଲ୍ଲୀ: ଆସନ୍ତା ଜାନୁୟାରୀ ୨୨ ତାରିଖରେ ଅଯୋଧ୍ୟାରେ ପ୍ରଭୁ ଶ୍ରୀରାମଙ୍କ ପ୍ରାଣପ୍ରତିଷ୍ଠା କାର୍ଯ୍ୟକ୍ରମ ଆୟୋଜିତ ହେବ | ଆଉ ଏହି କାର୍ଯ୍ୟକ୍ରମରେ ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀ ଏବଂ ମୁରଲି ମନୋହର ଯୋଶୀ ମଧ୍ୟ ଯୋଗ ଦେଇପାରନ୍ତି | ବାସ୍ତବରେ ପୂର୍ବରୁ କୁହାଯାଇଥିଲା ଯେ ଏହି ଦୁଇ ନେତା ଯୋଗଦେବେ ନାହିଁ । ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ କହିଥିଲେ ଯେ ଉଭୟଙ୍କ ବୟସକୁ ବିଚାରକୁ ନେଇ ସେମାନେ ଏହି କାର୍ଯ୍ୟକ୍ରମରେ ଯୋଗ ନଦେବାକୁ ଅନୁରୋଧ କରାଯାଇଛି, ଯାହା ସେମାନେ ଗ୍ରହଣ କରିଛନ୍ତି। କିନ୍ତୁ ମଙ୍ଗଳବାର ଦିନ ବିଶ୍ୱ ହିନ୍ଦୁ ପରିଷଦ (ଭିଏଚପି) ପକ୍ଷରୁ ଉଭୟ ନେତାଙ୍କୁ ଏହି କାର୍ଯ୍ୟକ୍ରମରେ ଯୋଗଦେବାକୁ ନିମନ୍ତ୍ରଣ କରାଯାଇଛି, ଯାହାକୁ ଉଭୟ ଗ୍ରହଣ କରିଥିଲେ।

ବିଶ୍ୱ ହିନ୍ଦୁ ପରିଷଦର ଆନ୍ତର୍ଜାତୀୟ କାର୍ଯ୍ୟକାରିଣୀ ସଭାପତି ଆଲୋକ କୁମାର ଆଡଭାନୀ ଏବଂ ଯୋଶୀଙ୍କୁ ନିମନ୍ତ୍ରଣ ସମ୍ପର୍କରେ ସୂଚନା ଦେଇଛନ୍ତି। ସେ କହିଛନ୍ତି ଯେ ରାମ ମନ୍ଦିର ଆନ୍ଦୋଳନର ଅଗ୍ରଦୂତ, ଏଲ.କେ ଆଡଭାନୀ ଜୀ ଏବଂ ମୁରଲୀ ମନୋହର ଯୋଶୀଙ୍କୁ ୨୨ ଜାନୁୟାରୀରେ ଅଯୋଧ୍ୟାରେ ରାମ ମନ୍ଦିର ପ୍ରାଣପ୍ରତିଷ୍ଠା କାର୍ଯ୍ୟକ୍ରମରେ ଯୋଗଦେବାକୁ ନିମନ୍ତ୍ରଣ କରାଯାଇଛି। ସେମାନେ ଆସିବାକୁ ଯଥାସମ୍ଭବ ଚେଷ୍ଟା କରିବେ ବୋଲି କହିଛନ୍ତି । ଉଭୟ ନେତାଙ୍କ ଘରେ ପହଞ୍ଚି ଏହି ନିମନ୍ତ୍ରଣ ଦିଆଯାଇଛି। ଏହାପୂର୍ବରୁ ଲାଲକୃଷ୍ଣ ଆଡଭାନୀ ଏବଂ ମୁରଲୀ ମନୋହର ଯୋଶୀଙ୍କୁ ନିମନ୍ତ୍ରଣ କରାଯାଇ ନ ଥିବା ଖବର ଆସିଥିଲା। ଏନେଇ ଚମ୍ପତ ରାୟ କହିଥିଲେ ଯେ ଉଭୟ ନେତାଙ୍କ ବୟସ ଏବଂ ସ୍ୱାସ୍ଥ୍ୟକୁ ଦୃଷ୍ଟିରେ ରଖି ସେମାନଙ୍କୁ ସମାରୋହରୁ ଦୂରେଇ ରହିବାକୁ ଅନୁରୋଧ କରାଯାଇଛି, ଯାହାକୁ ସେମାନେ ଗ୍ରହଣ କରିଛନ୍ତି। ତେବେ ଚମ୍ପତ ରାୟଙ୍କ ଏହି ବିବୃତ୍ତି ପରେ ଆଡଭାନୀ ଏବଂ ଯୋଶୀଙ୍କୁ ନ ଡାକିବା ନେଇ ସମାଲୋଚନା ଜୋର ଧରିଥିଲା |