‘ସମଗ୍ର ପଶ୍ଚିମବଙ୍ଗରେ ପ୍ରତିକୂଳ ବାତାବରଣ’

ନୂଆଦିଲ୍ଲୀ: ସମଗ୍ର ପଶ୍ଚିମବଙ୍ଗରେ ପ୍ରତିକୂଳ ବାତାବରଣ ରହିଥିବା ଦର୍ଶାଇ ନିର୍ବାଚନ ପରବର୍ତ୍ତୀ ହିଂସା ମାମଲାକୁ ସ୍ଥାନାନ୍ତର କରିବାକୁ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଶୁକ୍ରବାର ସୁପ୍ରିମ୍‌କୋର୍ଟଙ୍କୁ ନିବେଦନ କରିଛି। ସର୍ବୋଚ୍ଚ ନ୍ୟାୟାଳୟ କେନ୍ଦ୍ରୀୟ ତଦନ୍ତକାରୀ ସଂସ୍ଥାର ଏପରି ମନ୍ତବ୍ୟକୁ କଡ଼ା ସମାଲୋଚନା କରି କହିଛନ୍ତି ଯେ କୌଣସି ନିର୍ଦ୍ଦିଷ୍ଟ ରାଜ୍ୟକୁ ପସନ୍ଦ ନ କରିବା ଦ୍ୱାରା ସେମାନେ ସମଗ୍ର ରାଜ୍ୟ ନ୍ୟାୟପାଳିକା ଉପରେ ଆପତ୍ତି ଉଠାଇପାରିବେ ନାହିଁ। ସିବିଆଇର ପ୍ରତିନିଧିତ୍ବ କରୁଥିବା ଅତିରିକ୍ତ ସଲିସିଟର ଜେନେରାଲଙ୍କୁ କୋର୍ଟ ପଚାରିଥିଲେ, ପଶ୍ଚିମବଙ୍ଗର ସମସ୍ତ ଅଦାଲତରେ ପ୍ରତିକୂଳ ପରିବେଶ ରହିଛି କି? ଏଏସ୍‌ଜି ରାଜୁ କହିଲେ ଯେ ଆବେଦନଟିକୁ ତ୍ରୁଟିପୂର୍ଣ୍ଣ ଭାବେ ପ୍ରସ୍ତୁତ କରାଯାଇଥିବାରୁ ଏହାକୁ ପ୍ରତ୍ୟାହାର କରି ନିଆଯିବ।

ସର୍ବୋଚ୍ଚ ନ୍ୟାୟାଳୟ ତାଙ୍କ ରାୟରେ ଉଲ୍ଲେଖ କରିଛନ୍ତି, ପଶ୍ଚିମବଙ୍ଗର ସମସ୍ତ ଅଦାଲତଙ୍କ ବିରୋଧରେ ଅପମାନଜନକ ଅଭିଯୋଗ ଆସିଛି। ଅଦାଲତରେ ପ୍ରତିକୂଳ ବାତାବରଣ ସୃଷ୍ଟି ହୋଇଛି ବୋଲି ବାରମ୍ବାର ଅଭିଯୋଗ ହେଉଛି। ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ କେନ୍ଦ୍ରୀୟ ଏଜେନ୍ସି ବି ପଶ୍ଚିମବଙ୍ଗର ଅଦାଲତଗୁଡ଼ିକ ଉପରେ ଏପରି ଆପତ୍ତି ଉଠାଇବାକୁ ପସନ୍ଦ କରିଛି। ଏଏସ୍‌ଜି କହିଛନ୍ତି ଯେ ଆପତ୍ତି ଉଠାଇବାର କୌଣସି ଉଦ୍ଦେଶ୍ୟ ନ ଥିଲା ଏବଂ ପ୍ରତ୍ୟାହାର ପାଇଁ ସେ ଅନୁମତି ମାଗିଛନ୍ତି। ୨୦୨୧ ମେ ୨ ତାରିଖରେ ବିଧାନସଭା ନିର୍ବାଚନ ଫଳାଫଳ ଘୋଷଣା ହେବା ପରେ ବିଭିନ୍ନ ସ୍ଥାନରେ ହିଂସାକାଣ୍ଡ ଘଟିଥିଲା। ଏହି ଘଟଣା ପରେ କେନ୍ଦ୍ର ଗୃହ ମନ୍ତ୍ରଣାଳୟ ପଶ୍ଚିମବଙ୍ଗ ସରକାରଙ୍କଠାରୁ ନିର୍ବାଚନ ପରବର୍ତ୍ତୀ ହିଂସା ସମ୍ପର୍କରେ ବିସ୍ତୃତ ରିପୋର୍ଟ ମାଗିଥିଲା, ଯେଉଁଥିରେ ଫଳାଫଳ ଦିନ ସନ୍ଧ୍ୟା ସୁଦ୍ଧା ୧୧ ଜଣଙ୍କ ମୃତ୍ୟୁ ଘଟିଥିଲା।