ଗୁଳିମାଡ଼ଠୁ ଆରମ୍ଭ କରି ଏସିଡମାଡ଼ ପର୍ଯ୍ୟନ୍ତ; ତାଲିବାନ ବର୍ବରତାର ଶିକାର ହୋଇଥିବା ଦୁଇ ମହିଳା ବଖାଣିଲେ ଛାତିଥରା କାହାଣୀ
କାବୁଲ: ଆଫଗାନିସ୍ତାନରେ ମହିଳାଙ୍କ ଉପରେ ତାଲିବାନର ବର୍ବରତା କାହାକୁ ଅଛପା ନାହିଁ । ୨୦ ବର୍ଷ ପୂର୍ବରୁ ତାଲିବାନ ମହିଳାଙ୍କ ପ୍ରତି ଅମାନବୀୟ ଓ ଅମାନୁଷିକ ଅତ୍ୟାଚାର କରୁଥିଲା ସେଥିରେ ଟିକିଏ ବି ପରିବର୍ତ୍ତନ ଦେଖିବାକୁ ମିଳିନାହିଁ । ଏବେ ମଧ୍ୟ ତାଲିବାନ ମହିଳାଙ୍କୁ ବିନା କାରଣରେ ମାଡ଼ ମାରିବାଠାରୁ ଆରମ୍ଭ କରି ବିଭିନ୍ନ କ୍ଷେତ୍ରରେ କଟକଣା ଲଗାଇ ନିଜର ଅସଲ ରୂପ ଦେଖାଉଛି । ଆଉ ଏବେ ତାଲିବାନର ଅସଲ ଚରିତ୍ର ଓ ଅସଲ ରୂପ ଭାରତୀୟ ଜାତୀୟ ଗଣମାଧ୍ୟମରେ ସାମ୍ନାରେ ରଖିଛନ୍ତି ଆଫଗାନିସ୍ତାନର ମହିଳା । ଆଫଗାନିସ୍ତାନରେ ତାଲିବାନ କିଭଳି ମହିଳାଙ୍କ ପାଇଁ ବିପଦ ସାଜିଛନ୍ତି ତାହାର କାହାଣୀ ବଖାଣିଛନ୍ତି ଦୁଇ ମହିଳା ।
Sambad is now on WhatsApp
Join and get latest news updates delivered to you via WhatsApp
ଖାତିରା ହାସମି, ଆଫଗାନିସ୍ତାନର ପୁଲିସ ଫୋର୍ସରେ ଇନସପେକ୍ଟର ଭାବେ କାମ କରୁଥିବା ଏହି ମହିଳାଙ୍କ ଜୀବନ ୨୦୨୦ ଯାଏଁ ବେଶ ଭଲରେ ବିତିଥିଲା । କିନ୍ତୁ ୨୦୨୦ରେ ଯେତେବେଳେ ତାଲିବାନର ପ୍ରାର୍ଦୁଭାବ ବଢ଼ିବା ଆରମ୍ଭ ହେଲା ସେତେବେଳେ ତାଲିବାନ ପକ୍ଷରୁ ଖାତିରାଙ୍କୁ ଧମକ ମିଳିଲା । ଜଣେ ମହିଳା କିପରି ପୁଲିସ ଫୋର୍ସରେ କାମ କରିବ ଏହାକୁ ନେଇ ଖାତିରା ଓ ତାଙ୍କ ପରିବାରକୁ ଧମକ ଦେଲା ତାଲିବାନ । ଆଉ ବାରମ୍ବାର ତାଲିବାନର ଧମକ ପରେ ଖାତିରାଙ୍କୁ ପୁଲିସ ଫୋର୍ସରେ କାମ ନ କରିବାକୁ ରୋକିଥିଲେ ତାଙ୍କ ସ୍ୱାମୀ । କିନ୍ତୁ ଖାତିରା ଏହାକୁ ଖାତିର ନକରି ପୁଲିସରେ କାମ କରିଚାଲିଲେ, ଯାହା ତାଲିବାନକୁ ସହଜରେ ହଜମ ହେଲା ନାହିଁ । ଖାତିରାଙ୍କୁ ଗୁଳି ମାରି ତାଙ୍କ ଆଖି ଫୁଟାଇ ଦେଇଥିଲେ ନୃଶଂସ ତାଲିବାନ। ଏହା ସହ ଖାତିରାଙ୍କୁ ମରିଯାଇଥିବା ଭାବି ରାସ୍ତା ମଝିରେ ଫୋପାଡ଼ି ଦେଇଥିଲେ । ତେବେ ପରବର୍ତ୍ତୀ ସମୟରେ ଖାତିରାଙ୍କୁ ପୁଲିସ ଉଦ୍ଧାର କରିବା ସହ ହସ୍ପିଟାଲରେ ଭର୍ତ୍ତି କରିଥିଲା, ଯେଉଁଠି ଦୀର୍ଘଦିନ ଧରି ଖାତିରାଙ୍କ ଚିକିତ୍ସା ଚାଲିଥିଲା । ଜୀବନ ସିନା ବଞ୍ଚିଗଲା କିନ୍ତୁ ଖାତିରାଙ୍କ ପାଇଁ ଦୁନିଆ ସବୁଦିନ ଅନ୍ଧକାର ହୋଇଗଲା ।
ତାଲିବାନ ନୃଶଂସତାର ଶିକାର ହୋଇଥିବା ଆଉ ଜଣେ ମହିଳା ହେଉଛନ୍ତି ଶାହିନ ମହମ୍ମଦି, ଯିଏ ଏବେ ଭାରତରେ ଶରଣାର୍ଥୀ ଭାବେ ରହୁଛନ୍ତି । ଶାହିନ ଦୀର୍ଘ ବର୍ଷ ହେବ ଆମେରିକା ପାଇଁ କାମ କରୁଥିଲେ । ପେସାରେ ସାମ୍ବାଦିକା ଥିବା ଶାହିନଙ୍କର ଆମେରିକା ସେନା ସହ ଉତ୍ତମ ସର୍ମ୍ପକ ଥିଲା । କିନ୍ତୁ ଯେତେବେଳେ ତାଲିବାନ ଏକଥା ଜାଣିଲା ସେତେବେଳେ ଶାହିନଙ୍କୁ ମାଡ଼ ମାରିବା ସହ ଏସିଡ ପକାଇ ମୁହଁକୁ ନଷ୍ଟ କରିଦିଆଗଲା । ତେବେ ପରବର୍ତ୍ତୀ ସମୟରେ ଶାହିନ ପ୍ଲାଷ୍ଟିକ ସର୍ଜରୀ କରି ନିଜ ଚେହେରାକୁ କିଛି ମାତ୍ରାରେ ଠିକ୍ କରିଥିଲେ । ଶାହିନଙ୍କ କହିବା ଅନୁଯାୟୀ, ଆମେରିକା ସହ ଯେଉଁମାନେ କାମ କରୁଥିଲେ କିମ୍ବା ଆମେରିକା ସେନାକୁ ସହଯୋଗ କରୁଥିଲେ ତାଲିବାନ ସେମାନଙ୍କ ପ୍ରତି ଅତି ନୃଶଂସ ପାଲଟି ଯାଉଥିଲା । ଏପରିକି କିଛି ଲୋକଙ୍କର ହାତ ମଧ୍ୟ କାଟି ଦେବା ସହ ଗରମ ତେଲ ପକାଇ ଦେଉଥିଲେ ତାଲିବାନୀ ଯୋଦ୍ଧା । ଉଭୟ ମହିଳା ଓ ପୁରୁଷ କାହା ପ୍ରତି ଦୟା ଦେଖାଉନଥିଲେ ତାଲିବାନୀ ।