ନୂଆଦିଲ୍ଲୀ : ଡିଜିଟାଲ ଲାଇଫ୍ ସାର୍ଟିଫିକେଟ୍ ଦାଖଲ କରିନଥିବାରୁ ପ୍ରାୟ ୬୦ ହଜାର ଅବସରପ୍ରାପ୍ତ ସେନା କର୍ମଚାରୀଙ୍କ ପେନସନ ଅଟକି ରହିଛି । ଏହାକୁ ନେଇ ଅବସରପ୍ରାପ୍ତ ସେନା କର୍ମଚାରୀମାନେ ଅସନ୍ତୋଷ ପ୍ରକଟ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ଡିଜିଟାଲ ଲାଇଫ ସାର୍ଟିଫିକେଟ୍ ଦେଇନଥିବାରୁ ପ୍ରାୟ ୫୮,୨୭୫ ଜଣ ଭେଟେରାନଙ୍କ ଏପ୍ରିଲ ମାସର ପେନସନ ଅଟକି ରହିଛି । ଏହି ଘଟଣାକୁ ନେଇ କଂଗ୍ରେସ ନେତା ରାହୁଲ ଗାନ୍ଧି କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । ଏକ ଟୁଇଟ କରି ସେ ଲେଖିଛନ୍ତି, “ଓ୍ବାନ ରାଙ୍କ –ଓ୍ବାନ ପେନସନ ଠକେଇ ପରେ ମୋଦୀ ସରକାର ଅଲ ରାଙ୍କ ନୋ ପେନସନ ନୀତି ଗ୍ରହଣ କରିଛନ୍ତି । ସୈନିକଙ୍କ ଅପମାନ ଦେଶର ଅପମାନ । “
କିନ୍ତୁ ସବୁଆଡୁ ବିରୋଧ ହେବା ପରେ ଆଜି ଅର୍ଥାତ ମେ ୪ ତାରିଖଦିନ ସେମାନଙ୍କୁ ପେନସନ ପଠାଯାଇଥିବା ପ୍ରତିରକ୍ଷା ମନ୍ତ୍ରାଳୟ କହିଛି । ତେବେ ନିଜର ଲାଇଫ ସାର୍ଟିଫିକେଟ ଦେବାକୁ ସେମାନଙ୍କୁ ଆସନ୍ତା ମେ ୨୫ ତାରିଖ ପର୍ଯ୍ୟନ୍ତ ସମୟ ଦିଆଯାଇଛି ।
ଅବସରପ୍ରାପ୍ତ କର୍ମଚାରୀମାନଙ୍କ ପେନସନ ଜାରି ରଖିବାକୁ ହେଲେ ସେମାନଙ୍କୁ ପ୍ରତିବର୍ଷ ଡିଜିଟାଲ ଲାଇଫ ସାର୍ଟିଫିକେଟ ଦେବାକୁ ହୁଏ । ଏହା ଦ୍ବାରା ସେମାନେ ଜୀବିତ ଅଛନ୍ତି ବୋଲି ପ୍ରମାଣିତ ହୁଏ । ପୂର୍ବରୁ ଏହା ମାନୁଆଲ ଉପାୟରେ ହେଉଥିବାବେଳେ ବିଗତ କିଛି ବର୍ଷ ହେଲା ଏହା ବାୟୋମେଟ୍ରିକ ବ୍ୟବହାର ମାଧ୍ୟମରେ କରାଯାଉଛି ।