ଅହମଦାବାଦ: ଏୟାର୍‌ ଇଣ୍ଡିଆର ବିମାନ ଏଆଇ-୧୭୧ (ବୋଇଂ ୭୮୭-୮ ଡ୍ରିମ୍‌ଲାଇନର୍) ଗୁରୁବାର ଅହମଦାବାଦରୁ ଉଡ଼ାଣ ଭରିବାର କିଛି ସମୟ ପରେ ଦୁର୍ଘଟଣାଗ୍ରସ୍ତ ହୋଇଛି। ଲଣ୍ଡନ ଅଭିମୁଖେ ଯାଉଥିବା ବିମାନଟି ଏକ ଆବାସିକ ଅଞ୍ଚଳ ନିକଟରେ ଖସି ପଡ଼ିଥିଲା। ୨୦୧୧ରେ ବାଣିଜ୍ୟିକ ସେବାରେ ପ୍ରବେଶ କରିବା ପରେ ପ୍ରଥମ ଥର ପାଇଁ ବୋଇଂ ୭୮୭ ବିମାନ ଦୁର୍ଘଟଣାଗ୍ରସ୍ତ ହୋଇଛି। ତେବେ ଏକଦା ପରବର୍ତ୍ତୀ ପିଢ଼ିର ବିମାନ ଚଳାଚଳର ପ୍ରତୀକ ଭାବରେ ପରିଚିତ ଥିବା ଏହି ବିମାନ ବୈଷୟିକ ତ୍ରୁଟି, ଉତ୍ପାଦନରେ ବିଳମ୍ବ ଏବଂ ନିରାପତ୍ତା ଚିନ୍ତାରେ ଦୀର୍ଘ ଦିନ ଧରି ଜଡ଼ିତ ଥିଲା। ବୋଇଂ ୭୮୭ ଡ୍ରିମ୍‌ଲାଇନର୍ ହେଉଛି ବୋଇଂ କମର୍ସିଆଲ ଏରୋପ୍ଲେନ୍ ଦ୍ୱାରା ବିକଶିତ ଏକ ଲମ୍ବା ଦୂରତା, ଵାଇଡ୍ ବଡି ଓ ଦୁଇ ଇଞ୍ଜିନ୍ ବିଶିଷ୍ଟ ବିମାନ। ୨୦୧୧ ମସିହାରେ ପ୍ରଚଳନ ହୋଇଥିବା ଏହି ବିମାନକୁ ଉନ୍ନତ ଇନ୍ଧନ ଦକ୍ଷତା, ଯାତ୍ରୀ ସୁବିଧା ଏବଂ ପରିଚାଳନାଗତ ଅର୍ଥନୀତି ପ୍ରଦାନ କରିବା ପାଇଁ ଡିଜାଇନ୍ କରାଯାଇଥିଲା। ଅକ୍ଟୋବର ୨୦୧୨ରେ ଏୟାର୍‌ ଇଣ୍ଡିଆ ପ୍ରଥମ ଏୟାର୍‌ଲାଇନ୍ସ ଭାବେ ବୋଇଂର ସାଉଥ କାରୋଲିନା କାରଖାନାରେ ନିର୍ମିତ ଡ୍ରିମ୍‌ଲାଇନର୍‌ର ଡେଲିଭରି ନେଇଥିଲା। ଭାରତୀୟ ରାଷ୍ଟ୍ରାୟତ୍ତ ଏୟାର୍‌ଲାଇନ୍ସ ବର୍ତ୍ତମାନ ୭୮୭-୮ର ଏକ ଫ୍ଲିଟ୍ ଚଳାଉଛି, ଯାହାକୁ ଏହା ବ୍ରିଟେନ, ଉତ୍ତର ଆମେରିକା ଓ ମଧ୍ୟପ୍ରାଚ୍ୟ ସମେତ ଦୀର୍ଘ ଦୂରତା ବିଶିଷ୍ଟ ଅନ୍ତର୍ଜାତୀୟ ମାର୍ଗ ପାଇଁ ବ୍ୟବହାର କରିଥାଏ। ଏହା ଥିଲା ତୃତୀୟ ୭୮୭ ଡ୍ରିମ୍‌ଲାଇନର୍‌; ପ୍ରଥମ ଦୁଇଟି ୱାସିଂଟନ୍ ରାଜ୍ୟର ଏଭରେଟ୍ ପ୍ଲାଣ୍ଟରୁ ପ୍ରଦାନ କରାଯାଇଥିଲା।
ଡ୍ରିମ୍‌ଲାଇନର୍‌ର ବିକାଶ ଏହାର ଆରମ୍ଭରୁ ହିଁ ବିପର୍ଯ୍ୟୟ ଦ୍ୱାରା ଚିହ୍ନିତ ହୋଇଛି:
ବ୍ୟାଟେରି ଅଗ୍ନିକାଣ୍ଡ: ୨୦୧୩ରେ ଏକାଧିକ ଜେଟ୍‌ରେ ଲିଥିୟମ୍ ଆୟନ ବ୍ୟାଟେରିରେ ନିଆଁ ଲାଗିବା ପରେ ଏଫ୍ଏଏ ସମଗ୍ର ବିଶ୍ୱର ୭୮୭ ଫ୍ଲିଟ୍‌କୁ ବନ୍ଦ କରିଦେଇଥିଲା।
ଉତ୍ପାଦନ ତ୍ରୁଟି: ୨୦୧୯ ପରଠାରୁ ୭୮୭ ପ୍ରୋଗ୍ରାମ୍‌ରେ ଫ୍ୟୁଜଲେଜ୍ ସଂଯୋଗରେ ବ୍ୟବଧାନ, ଅନୁପଯୁକ୍ତ ସିମିଂ ଏବଂ ବିମାନ ଭିତରେ ବାହ୍ୟ ଆବର୍ଜନା ସମେତ ଗମ୍ଭୀର ଗୁଣବତ୍ତା ନିୟନ୍ତ୍ରଣ ସମସ୍ୟାର ସମ୍ମୁଖୀନ ହୋଇଥିଲା।
ଜାନୁଆରି ୨୦୨୧ରୁ ଅଗଷ୍ଟ ୨୦୨୨ ମଧ୍ୟରେ ବୋଇଂ ଏଫଏଏ ତଦାରଖ ଓ ଆଭ୍ୟନ୍ତରୀଣ ଅଡିଟ୍ ମଧ୍ୟରେ ପ୍ରାୟ ସମସ୍ତ ଡ୍ରିମ୍‌ଲାଇନର୍‌ ଡେଲିଭରିକୁ ବନ୍ଦ କରିଦେଇଥିଲା।
ବୋଇଂ ୭୮୭ ସିରିଜ୍ ସହ ପରିଚାଳନାଗତ ସମସ୍ୟା
ଜାନୁଆରି ୮, ୨୦୧୩: ବୋଷ୍ଟନରେ ଜେଏଏଲ୍ ୭୮୭ ଇନ୍ଧନ ଲିକ୍; ବିମାନ ବାତିଲ ହୋଇଥିଲା।
ଜାନୁଆରି ୯, ୨୦୧୩: ୟୁନାଇଟେଡ୍ ଏୟାର୍‌ଲାଇନ୍ସ ମୁଖ୍ୟ ବ୍ୟାଟେରି ନିକଟରେ ସମସ୍ୟା ଠାବ କଲା; ଆମେରିକାର ଏନ୍‌ଟିଏସ୍‌ବି ତଦନ୍ତ ଆରମ୍ଭ କରିଥିଲା।
ଜାନୁଆରି ୧୧ ଓ ୧୩: ଟୋକିଓ ନାରିଟାରେ ପୁଣି ଥରେ ଇନ୍ଧନ ଲିକ୍ କଲା ସେହି ଜେଏଏଲ୍ ବିମାନ। ଜାପାନର ପରିବହନ ମନ୍ତ୍ରଣାଳୟ ତଦନ୍ତ କରୁଛି।
ଜାନୁଆରି ୧୧, ୨୦୧୩: ଏଫ୍‌ଏଏ ୭୮୭ ସିଷ୍ଟମ୍‌ର ବ୍ୟାପକ ସମୀକ୍ଷା ଆରମ୍ଭ କଲା।
ଜୁଲାଇ ୧୨, ୨୦୧୩: ଲଣ୍ଡନର ହିଥ୍ରୋରେ ଇଥିଓପିଆନ୍ ଏୟାର୍‌ଲାଇନ୍ସ ୭୮୭ରେ ନିଆଁ ଲାଗି ବ୍ୟାପକ କ୍ଷୟକ୍ଷତି ହେଲା। ଏହା ଜରୁରିକାଳୀନ ଲୋକେଟର୍‌ ଟ୍ରାନ୍ସମିଟରରେ ଥିବା ଲିଥିୟମ୍ ବ୍ୟାଟେରି ଯୋଗୁ ହୋଇଥିଲା।
ଜୁଲାଇ ୨୬, ୨୦୧୩: ଏଏନ୍‌ଏ ୨ଟି ବିମାନରେ ତାର ନଷ୍ଟ ହୋଇଥିବା ଠାବ କଲା। 
ଅଗଷ୍ଟ ୧୪, ୨୦୧୩: ୩ଟି ଏଏନ୍‌ଏ ବିମାନରେ ଅଗ୍ନି ନିର୍ବାପକ ତ୍ରୁଟି ଦେଖିବାକୁ ମିଳିଥିଲା, ଗଠନ ପ୍ରକ୍ରିୟାରେ ତ୍ରୁଟି ଯୋଗୁଁ ଏହା ହୋଇଥିଲା।
ନଭେମ୍ବର ୨୨, ୨୦୧୩: ଆଇସିଂ ବିପଦ କାରଣରୁ ଅଧିକ ଉଚ୍ଚତା ବିଶିଷ୍ଟ ଝଡ଼ରୁ ରକ୍ଷା ପାଇବା ପାଇଁ ବୋଇଂ ଜିଇ ଇଞ୍ଜିନ ବ୍ୟବହାର କରୁଥିବା ଏୟାର୍‌ଲାଇନ୍ସଗୁଡ଼ିକୁ ଚେତାବନୀ ଦେଇଥିଲା।
ଜାନୁଆରି ୨୧, ୨୦୧୪: ନର୍‌ୱେର ଏୟାର୍‌ ଶଟଲ ୭୮୭ ବିମାନରେ ଇନ୍ଧନ ଲିକ୍ ହୋଇଥିଲା। ୧୯ ଘଣ୍ଟା ବିଳମ୍ବ ହେଲା। ଯାତ୍ରୀମାନେ ଲିକ୍ ଦେଖିବା ପରେ ସମସ୍ୟା ଜଣାପଡ଼ିଥିଲା। ତ୍ରୁଟିଯୁକ୍ତ ଭାଲ୍ଭ ଏହାର କାରଣ ଥିଲା।
ମାର୍ଚ୍ଚ ୨୦୧୬: ଏଫ୍‌ଏଏ ଚେତାବନୀ ଦେଇଛି ଯେ ଅବାସ୍ତବ ନିମ୍ନ ଏୟାର୍‌ସ୍ପିଡ୍ ଡିସ୍‌ପ୍ଲେ, ହଠାତ୍ ପାଇଲଟ୍ ଇନପୁଟ୍‌ରୁ ଢାଞ୍ଚାଗତ ବିଫଳତାର ଆଶଙ୍କା ରହିଛି।
ଏପ୍ରିଲ ୨୨, ୨୦୧୬: ଫ୍ୟାନ୍ ଆଇସ୍ ଅସନ୍ତୁଳନ କାରଣରୁ ଜେନ୍ ଏକ୍ସ ଇଞ୍ଜିନ ଅଚଳ ହେବା ପରେ ଏଫ୍ଏଏ ନିର୍ଦ୍ଦେଶନାମା ଜାରି କରିଥିଲା।
ଜୁନ୍ ୧୮, ୨୦୨୧: ବ୍ରିଟିସ ଏୟାର୍‌ୱେଜ୍‌ର ୭୮୭-୮ର ନୋଜ୍ ଗିଅର ହିଥ୍ରୋରେ ପାର୍କିଂ ବେଳେ ଭୁଶୁଡ଼ି ପଡ଼ିଥିଲା।
ମାର୍ଚ୍ଚ ୧୧, ୨୦୨୪: ଲାଟାମ୍ ଫ୍ଲାଇଟ୍ ୮୦୦ ହଠାତ୍  ଅଳ୍ପ ଉଚ୍ଚତାରୁ ଖସିପଡ଼ିଲା।  ଦୁର୍ଘଟଣାରେ ୫୦ ଆହତ ହୋଇ‌ଥିଲେ ଏବଂ ୧୨ ଜଣ ହସ୍ପିଟାଲରେ ଭର୍ତ୍ତି ହୋଇଥିଲେ।  
ଜୁନ୍ ୧୨, ୨୦୨୫: ଅହମଦାବାଦରୁ ଲଣ୍ଡନ ଅଭିମୁଖେ ଉଡ଼ାଣ ଭରିବା ପରେ ଏୟାର୍‌ ଇଣ୍ଡିଆର ବିମାନ ଏଆଇ-୧୭୧ ଦୁର୍ଘଟଣାଗ୍ରସ୍ତ ହୋଇଥିଲା।
୨୦୨୪ ମସିହା ପ୍ରାରମ୍ଭରେ ବୋଇଂ ଇଞ୍ଜିନିୟର ତଥା ହ୍ୱିସିଲବ୍ଲୋୟର ସାମ୍ ସାଲେହପୁର ନ୍ୟୁୟର୍କ ଟାଇମ୍ସ ଓ ସିଏନ୍‌ଏନ୍‌କୁ ଦେଇଥିବା ସାକ୍ଷାତ୍‌କାରରେ ଅଭିଯୋଗ କରିଥିଲେ ଯେ ଅନୁପଯୁକ୍ତ ସମାବେଶ ଓ ତରବରିଆ ଉତ୍ପାଦନ ଅଭ୍ୟାସ ସମୟକ୍ରମେ ବିପଜ୍ଜନକ ପରିସ୍ଥିତି ସୃଷ୍ଟି କରୁଛି ଏବଂ ଜେଟ୍‌ଗୁଡ଼ିକର ନୂଆ ସମସ୍ୟା ସାମନାକୁ ଆସୁଛି।