‘ବାୟୁବାହୀ’ ପରେ କୋଭିଡ୍‌-୧୯କୁ ନେଇ ମିଳିଲା ଆଉ ଏକ ବଡ଼ ପ୍ରମାଣ; ସଂକ୍ରମିତ ଗର୍ଭବତୀ ମହିଳାଙ୍କ ଗର୍ଭସ୍ଥ ଶିଶୁକୁ ମଧ୍ୟ ଆକ୍ରାନ୍ତ କରିଥାଏ ଭୂତାଣୁ!

ନୂଆଦିଲ୍ଲୀ: ସଂପ୍ରତି ସମଗ୍ର ବିଶ୍ୱ ପାଇଁ ଆତଙ୍କର କାରଣ ସାଜିଥିବା ନୋଭେଲ କରୋନାଭାଇରସ୍‌ ବା କୋଭିଡ୍‌-୧୯ ମହାମାରୀକୁ କେନ୍ଦ୍ରକରି ଏବେ ନୂଆ ନୂଆ ତଥ୍ୟ ଓ ପ୍ରମାଣ ସବୁ ସାମନାକୁ ଆସିବାରେ ଲାଗିଛି। କୋଭିଡ୍‌-୧୯ ଭୂତାଣୁ ବାୟୁବାହୀ ବା ବାୟୁ ମଣ୍ଡଳରେ ବିସ୍ତାରିତ ହୋଇ ମଧ୍ୟ ସଂକ୍ରମଣ ଘଟାଇପାରେ ବୋଲି ଗତ ଦୁଇଦିନ ତଳେ ଜଣାପଡ଼ିଥିବା ବେଳେ ଆଜି କୋଭିଡ୍‌-୧୯ ଭୂତାଣୁକୁ ନେଇ ସାମନାକୁ ଆସିଛି ଆଉ ଏକ ବଡ଼ ତଥ୍ୟ।

କୋଭିଡ୍‌-୧୯କୁ ନେଇ ମିଳିଥିବା ଏହି ନୂତନ ତଥ୍ୟରୁ ଜାଣିବାକୁ ମିଳିଛି ଯେ କୋଭିଡ୍‌-୧୯ ଦ୍ୱାରା ସଂକ୍ରମିତ ହୋଇଥିବା ଗର୍ଭବତୀ ମହିଳାମାନଙ୍କର ଗର୍ଭସ୍ଥ ଶିଶୁ ମଧ୍ୟ କୋଭିଡ୍‌-୧୯ ଭୂତାଣୁ ଦ୍ୱାରା ଆକ୍ରାନ୍ତ ହୋଇଥାଏ। ଏବଂ ଏମାନଙ୍କ ଗର୍ଭରୁ ଜନ୍ମିତ ଶିଶୁ ମଧ୍ୟ କୋଭିଡ୍‌-୧୯ ଦ୍ୱାରା ସଂକ୍ରମିତ ହୋଇଥାଏ। ଏନେଇ ଏବେ ଦୃଢ଼ ପ୍ରମାଣ ପାଇଛନ୍ତି କୋଭିଡ୍‌-୧୯ ଉପରେ ପରୀକ୍ଷା ନିରୀକ୍ଷା ଜାରି ରଖିଥିବା ଏକ ଗବେଷକ ଗୋଷ୍ଠୀ।

WHO

ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ, ବିଶ୍ୱ ସ୍ୱାସ୍ଥ୍ୟ ସଂଗଠନ ବା ଡବ୍‌ଲ୍ୟୁଏଚ୍‌ଓ (ହୁ) ଗତ ମାସରେ କହଥିଲା ଯେ କୋଭିଡ୍‌-୧୯ ଦ୍ୱାରା ସଂକ୍ରମିତ ନୂତନ ମା’ ମାନେ ସ୍ତନ୍ୟପାନ ଜାରି ରଖିବା ଉଚିତ୍‌। ସେହପରି କୋଭିଡ୍‌-୧୯ ଭୂତାଣୁ ବାୟୁବାହୀ ନୁହେଁ ବୋଲି ମଧ୍ୟ ପୂର୍ବରୁ କହୁଥିଲା ହୁ। କିନ୍ତୁ, ଏବେ କୋଭିଡ୍‌-୧୯ ଭୂତାଣୁ ବାୟୁବାହୀ ଥିବା ସ୍ୱୀକାର କରୁଛି ହୁ।

ସେହିପରି ଏବେ କୋଭିଡ୍‌-୧୯ ଉପରେ ପରୀକ୍ଷା ନିରୀକ୍ଷା ଜାରି ରଖିଥିବା ଏକ ଗବେଷକ ଗୋଷ୍ଠୀ କୋଭିଡ୍‌-୧୯ ଆକ୍ରାନ୍ତ ଥିବା ଗର୍ଭବତୀ ମାତାମାନେ ସେମାନଙ୍କର ଜନ୍ମିତ ଶିଶୁଙ୍କୁ ମଧ୍ୟ କୋଭିଡ୍‌-୧୯ ସଂକ୍ରମିତ କରିପାରିବେ ବୋଲି ଦୃଢ଼ ପ୍ରମାଣ ପାଇଛନ୍ତି। ଏଥିସହ ମହାମାରୀ ସମୟରେ ଗର୍ଭବତୀ ମହିଳା ଓ ସେମାନଙ୍କ ନବଜାତକମାନଙ୍କୁ କିପରି ଏଥିରୁ ରକ୍ଷା କରାଯାଇ ପାରିବ ସେଥିନେଇ ଅଧିକ ଗବେଷଣା ଜାରି ରଖିଛନ୍ତି। ଏବଂ ଏକ୍ଷେତ୍ରରେ ଗର୍ଭଧାରଣର ପ୍ରଥମ ପର୍ଯ୍ୟାୟରେ ରହିଥିବା ଗର୍ଭବତୀ ମହିଳାମାନଙ୍କର ବିଶେଷ ଧ୍ୟାନ ନେବାକୁ ପରାମର୍ଶ ଦେଇଛନ୍ତି ଏହି ଗବେଷକ ଗୋଷ୍ଠୀ।

ସମ୍ବନ୍ଧିତ ଖବର

Comments are closed.