ଇସଲାମାବାଦ: ପାକିସ୍ତାନର ଅଶାନ୍ତ ବଲୁଚିସ୍ତାନ ପ୍ରଦେଶକୁ ବଲୋଚ ନେତାମାନେ ସ୍ବାଧୀନ ଘୋଷଣା କରିଥିବା ବେଳେ ଏବେ ସିନ୍ଧରେ ମଧ୍ୟ ସ୍ବାଧୀନତା ଦାବି ଜୋର ଧରିଛି। ନିଖୋଜ ଓ ଜେଲରେ ଥିବା ସିନ୍ଧି ଜାତୀୟତାବାଦୀଙ୍କୁ ମୁକ୍ତ କରିବା ଦାବିରେ ସିନ୍ଧୁ ଦେଶ ପାଇଁ ଲଢ଼ୁଥିବା ଏକ ରାଜନୈତିକ ସଙ୍ଗଠନ ଜୟ ସିନ୍ଧ ଫ୍ରିଡମ୍ ମୁଭମେଣ୍ଟ (ଜେଏସ୍‌ଏଫ୍‌ଏମ୍) ଶୁକ୍ରବାର ପାକିସ୍ତାନର ଏକ ରାଜପଥରେ  ଆନ୍ଦୋଳନ ଆରମ୍ଭ କରିଛି।

Advertisment

ସିନ୍ଧ ଓ ବଲୁଚିସ୍ତାନରେ ବେଆଇନ ଅଟକ ଏବଂ ମାନବାଧିକାର ଉଲ୍ଲଂଘନ ନେଇ ଉଭୟ ପ୍ରଦେଶର ବିଦ୍ରୋହୀ ନେତାମାନେ ଏବେ ସମଗ୍ର ବିଶ୍ୱର ଦୃଷ୍ଟି ଆକର୍ଷଣ କରିଛନ୍ତି।  ଜେଏସ୍‌ଏଫ୍‌ଏମ୍‌ ଅଧ୍ୟକ୍ଷ ସୋହେଲ୍ ଅବ୍ରୋ, ଜୁବେର ସିନ୍ଧି ଓ ଅମର ଆଜାଦିଙ୍କ ସମେତ  ଅନ୍ୟ ନେତାମାନେ ଜାହିଦ ଚନ୍ନା, ସଜାଦ ଚନ୍ନା, ଅଦନାନ ବଲୋଚ, ବାଦଶାହ ବଲୋଚ, ରଫିକତ ମଙ୍ଗନହର ଓ ସାହିଦ ସୁମ୍ରୋଙ୍କୁ ତୁରନ୍ତ ମୁକ୍ତ କରିବାକୁ ଦାବି କରିଥିଲେ। ସେମାନଙ୍କ ବିରୋଧରେ ମିଥ୍ୟା ଅଭିଯୋଗ ପ୍ରତ୍ୟାହାର କରିବା ସହ ଜବରଦସ୍ତ ଗିରଫ କରାଯାଇଥିବା ସମସ୍ତଙ୍କୁ ମୁକ୍ତ କରିବାକୁ ସେମାନେ ଦାବି କରିଛନ୍ତି। 

‘ଏହି ଶାନ୍ତିପୂର୍ଣ୍ଣ ଧାରଣା ଆମର ଜାତୀୟତାବାଦୀ ନେତାମାନଙ୍କର ବେଆଇନ ଗିରଫଦାରୀ, ଜେଲରେ ଘଟୁଥିବା ନିର୍ଯାତନା ଏବଂ ଜବରଦସ୍ତ ନିଖୋଜ ଘଟଣାର ପ୍ରତିବାଦ ଭାବରେ କାର୍ଯ୍ୟ କରେ। ଆମର ପ୍ରୟାସ ଶାନ୍ତିପୂର୍ଣ୍ଣ ଓ ଗଣତାନ୍ତ୍ରିକ ଏବଂ ଆମର ଲୋକମାନେ ମୁକ୍ତ ନ ହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ’ ବୋଲି ଏକ ସାମୂହିକ ବିବୃତିରେ କୁହାଯାଇଛି। ସେମାନେ ଜାତିସଂଘ, ଆମ୍ନେଷ୍ଟି ଇଣ୍ଟର୍‌ନ୍ୟାସନାଲ୍‌ ଏବଂ ହ୍ୟୁମାନ ରାଇଟ୍ସ ୱାଚ୍ ଭଳି ଅନ୍ତର୍ଜାତୀୟ ସଂଗଠନକୁ ମଧ୍ୟ ଆହ୍ୱାନ କରି ପାକିସ୍ତାନର ମାନବାଧିକାର ଉଲ୍ଲଂଘନ ଉପରେ ହସ୍ତକ୍ଷେପ ଏବଂ ବିଶ୍ୱବ୍ୟାପୀ ନିନ୍ଦା କରିବାକୁ ଅନୁରୋଧ କରିଛନ୍ତି। ସିନ୍ଧିମାନେ ଐତିହାସିକ ଭାବରେ ପରିଚୟ ଓ ସ୍ୱାଧୀନତା ପାଇଁ ସଂଘର୍ଷ କରି ଆସୁଛନ୍ତି। ସେମାନେ ଅଭିଯୋଗ କରିଛନ୍ତି ଯେ, ପାକିସ୍ତାନ ସରକାର ବ୍ୟବସ୍ଥାଗତ ଅତ୍ୟାଚାର ମାଧ୍ୟମରେ ସ୍ଥାନୀୟ ସଂସ୍କୃତିକୁ ଲୋପ କରୁଛନ୍ତି।