ପୁଅର ମୃତ୍ୟୁ ପରେ ସମ୍ପତ୍ତି ଉପରେ ମା ନା ସ୍ତ୍ରୀ, କାହାକୁ ମିଳିଥାଏ ଅଧିକ ଅଧିକାର?
ଭୁବନେଶ୍ୱର: ଆଜିକାଲି ଆପଣ ଅନେକ ସମୟରେ ଦେଖିଥିବେ ଯେ କୌଣସି ପୁଅର ମୃତ୍ୟୁ ପରେ ତାଙ୍କର ସମ୍ପତ୍ତିକୁ ନେଇ ବିବାଦ ଦେଖାଯାଇଥାଏ | ଏହି ସମ୍ପତ୍ତି ଉପରେ କାହାର ଅଧିକାର ଅଛି ତାହାକୁ ନେଇ ତର୍କବିତର୍କ ମଧ୍ୟ ହୋଇଥାଏ | ଯଦି ପୁଅ ମରିଯାଏ, ତେବେ ସମ୍ପତ୍ତି ଉପରେ ମା’ଙ୍କର ଅଧିକାର ଥାଏ କି? କାରଣ ଆଜିକାଲି ପୁଅର ମୃତ୍ୟୁ ପରେ ଅନେକ କାରଣରୁ, ମାଟିଏ ନିଜ ପୁଅର ସମ୍ପତ୍ତିରେ ଅଧିକାର ପାଆନ୍ତି ନାହିଁ | ଅନେକ ମା’ ଏହା ବିଷୟରେ ମଧ୍ୟ ଜାଣନ୍ତି ନାହିଁ ଏବଂ ବୃଦ୍ଧାବସ୍ଥାରେ ନିଜ ଜୀବନ ବହୁତ କଷ୍ଟରେ ବିତାନ୍ତି | ଗୋଟିଏ ପଟେ ମୃତ ପୁଅର ପତ୍ନୀ ନିଜ ସ୍ୱାମୀଙ୍କର ସମ୍ପତ୍ତିରେ ଅଧିକାର ଥିବାର କହି ପୁଅର ମାକୁ ହତାଦର କରିଥାନ୍ତି | ତେବେ ଭାରତର ଆଇନ ବ୍ୟବସ୍ଥାରେ ଏଭଳି କିଛି ଅଧିକାର ଅଛି ଯାହାକୁ ଆଧାର କରି ଜଣେ ମା’ ତାଙ୍କ ଅଧିକାର ପାଇଁ ଲଢ଼ିପାରିବେ. ଯାହା ତାଙ୍କୁ ମୃତ ପୁଅର ସମ୍ପତ୍ତିରେ ଅଧିକାର ଦେବ। ଏହି ଅଜଣା ଅଧିକାର ବାବଦରେ ଆଜି ବିସ୍ତୃତ ଭାବେ ସୂଚନା ଦେଇଛନ୍ତି ଓଡିଶା ହାଇକୋର୍ଟର ଓକିଲ ଗାୟତ୍ରୀ ପାତ୍ର |
Sambad is now on WhatsApp
Join and get latest news updates delivered to you via WhatsApp
ଗାୟତ୍ରୀ କହିଛନ୍ତି ଯେ ପୁଅର ସମ୍ପତ୍ତି ଉପରେ ଅଧିକାର ସମ୍ବନ୍ଧରେ ହିନ୍ଦୁ ଉତ୍ତରାଧିକାର ଅଧିନିୟମ, ୧୯୫୬ରେ ଏକ ବ୍ୟବସ୍ଥା କରାଯାଇଛି। ଆଜିକାଲି ଅନେକ ମାମଲା ସାମ୍ନାକୁ ଆସିଥାଏ ଯେଉଁଥିରେ ମୃତ ପୁଅର ସମ୍ପତ୍ତିରେ ମା’ଙ୍କୁ ଅଧିକାର ଦିଆଯାଇନଥାଏ, ଯାହା ଆଇନ ବିରୁଦ୍ଧ, କିନ୍ତୁ ଅନେକ ମା’ ଏହା ବିଷୟରେ ମଧ୍ୟ ଜାଣନ୍ତି ନାହିଁ ଏବଂ ବୃଦ୍ଧାବସ୍ଥାରେ ନିଜ ଜୀବନ କଷ୍ଟରେ ବିତାଇଥାନ୍ତି | ହିନ୍ଦୁ ଉତ୍ତରାଧିକାର ଅଧିନିୟମର ଧାରା ୮ ଅନୁଯାୟୀ, ଶିଶୁର ସମ୍ପତ୍ତି ଉପରେ ପିତାମାତାଙ୍କ ଅଧିକାର ବ୍ୟାଖ୍ୟା କରାଯାଇଛି। ଏହା ଅଧୀନରେ ମା ହେଉଛି ଶିଶୁର ସମ୍ପତ୍ତିର ପ୍ରଥମ ଉତ୍ତରାଧିକାରୀ ଓ ପିତା ଶିଶୁର ସମ୍ପତ୍ତିର ଦ୍ୱିତୀୟ ଉତ୍ତରାଧିକାରୀ | ଯଦି ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଯାଏ, ତେବେ ତାଙ୍କ ସମ୍ପତ୍ତି ତାଙ୍କ ମା, ପତ୍ନୀ ଏବଂ ପିଲାମାନଙ୍କ ମଧ୍ୟରେ ସମାନ ଭାବରେ ବାଣ୍ଟି ଦିଆଯାଏ। ହିନ୍ଦୁ ଉତ୍ତରାଧିକାର ଆଇନ ଅନୁଯାୟୀ ଯଦି ଜଣେ ପୁରୁଷ ଅବିବାହିତ ତେବେ ତା’ର ସମ୍ପତ୍ତିର ପ୍ରଥମ ଉତ୍ତରାଧିକାରୀ, ତାଙ୍କ ମା ଏବଂ ଦ୍ୱିତୀୟ ଉତ୍ତରାଧିକାରୀ, ତାଙ୍କ ପିତାଙ୍କୁ ହସ୍ତାନ୍ତର କରାଯିବ |